Read ბიბლია იერ. 29 Bible Online

იერ. 29 - ბიბლია bible

იერ. 29

¹ეს არის სიტყვები წერილისა, რომელიც იერემია წინასწარმეტყველმა გაუგზავნა იერუსალიმიდან გადასახლებულ დანარჩენ უხუცესებს და მღვდლებს, და წინასწარმეტყველთ და მთელ ერს, რომლებიც ნაბუქოდონოსორმა გადაასახლა იერუსალიმიდან ბაბილონში

²(ეს იყო მას შემდეგ, რაც იერუსალიმიდან გავიდნენ მეფე იექონია და დედამისი — დედოფალი, და იუდასა და იერუსალიმის საჭურისნი და მთავარნი, ხურონი და მჭედელნი.),

³ელყასა შაფანის ძის, და გემარია ხილკიას ძის ხელით, რომლებიც ციდკიაჰუმ, იუდას მეფემ, გაგზავნა ბაბილონის მეფე ნაბუქოდონოსორთან, ბაბილონში, რომ ეთქვათ:

⁴„ასე ეუბნება უფალი ცაბაოთ, ისრაელის ღმერთი, ყველა გადასახლებულს, რომლებიც მე გადავასახლე იერუსალიმიდან ბაბილონში:

⁵‘აიშენეთ სახლები და დასახლდით, და გააშენეთ ბაღები და ჭამეთ მათი ნაყოფი,

⁶მოიყვანეთ ცოლები და შობეთ ძენი და ასულნი, და მოუყვანეთ თქვენს ძეთ ცოლები და თქვენი ასულნი გაათხოვეთ, და შობონ მათ ძენი და ასულნი და გამრავლდით იქ და არ შემცირდეთ.

⁷და შესთხოვეთ მშვიდობა იმ ქალაქისათვის, სადაც გადაგასახლეთ თქვენ, და ევედრეთ მისთვის უფალს, რადგან მისი მშვიდობით თქვენც გექნებათ მშვიდობა.’

⁸რადგან ასე თქვა უფალმა ცაბაოთმა, ისრაელის ღმერთმა: ‘ნუ გაცთუნებენ თქვენ თქვენი წინასწარმეტყველნი, რომელნიც თქვენს შორის არიან, და თქვენი ჯადოსანნი, და ნუ დაუჯერებთ თქვენს სიზმრებს, რომელნიც გესიზმრებათ.

⁹რადგან ტყუილს გიწინასწარმეტყველებენ ისინი ჩემი სახელით: ‘მე არ გამომიგზავნია ისინი!’ — სიტყვა უფლისა.

¹⁰რადგან ასე თქვა უფალმა: ‘როდესაც ბაბილონს შეუსრულდება სამოცდაათი წელი, მოგიკითხავთ მე თქვენ და ავასრულებ თქვენზე ჩემს სასიკეთო სიტყვას, რათა დაგაბრუნოთ ამ ადგილას.

¹¹რადგან მე ვიცი ის ზრახვები, რაც მე განვიზრახე თქვენზე,’ — სიტყვა უფლისა, — ‘ზრახვები მშვიდობაზე, რომ მოგცეთ თქვენ მომავალი და იმედი.

¹²და მომიხმობთ მე, და წახვალთ და შემევედრებით, და მე მოგისმენთ თქვენ.

¹³მეძიეთ მე და მიპოვნით, როდესაც მეძიებთ მთელი თქვენი გულით.

¹⁴ნაპოვნი ვიქნები თქვენს მიერ,’ — სიტყვა უფლისა, — ‘და დაგაბრუნებთ თქვენი ტყვეობიდან და შეგკრებთ ყველა ხალხიდან და ყველა ადგილიდან, სადაც გაგაძევეთ,’ — სიტყვა უფლისა, — ‘და დაგაბრუნებთ იმ ადგილას, საიდანაც გადაგასახლეთ.’

¹⁵რადგან ამბობთ თქვენ: ‘უფალმა დაგვიყენა ჩვენ წინასწარმეტყველნი ბაბილონში.’

¹⁶რადგან ასე ამბობს უფალი დავითის ტახტზე მჯდომ მეფეზე და ამ ქალაქში მცხოვრებ მთელ ერზე, თქვენს ძმებზე, რომლებიც თქვენთან ერთად არ გავიდნენ გადასახლებაში,

¹⁷ასე თქვა უფალმა ცაბაოთმა: ‘აჰა, მე გავგზავნი მათში მახვილს, შიმშილსა და შავ ჭირს და ვაქცევ მათ გადამსკდარ ლეღვად, რომლის ჭამაც არ შეიძლება მისი უვარგისობის გამო.

¹⁸დავედევნები მათ მახვილით, შიმშილითა და შავი ჭირით, და საშინელებად გავხდი მათ ქვეყნის ყველა სამეფოსათვის, საწყევლად და გასაოცებლად, თავზარდასაცემად, დასაცინად და შესარცხვენად ყველა ხალხში, რომლებშიც მე გავაძევე ისინი.

¹⁹იმის სანაცვლოდ, რომ არ უსმინე ჩემს სიტყვებს,’ — სიტყვა უფლისა, — ‘რომ ვუგზავნიდი და ვუგზავნიდი მათ ჩემს მსახურთ, წინასწარმეტყველებს, მაგრამ თქვენ არ უსმინეთ მათ,’ — სიტყვა უფლისა.

²⁰და ისმინეთ თქვენ სიტყვა უფლისა, ყველა გადასახლებულო, ვინც კი გაგაგზავნეთ იერუსალიმიდან ბაბილონში.

²¹ასე თქვა უფალმა ცაბაოთმა, ისრაელის ღმერთმა, ახაბზე, კოლაიას ძეზე და ციდკიაჰუზე, მაყასეიას ძეზე, რომლებიც ჩემი სახელით ტყუილს გიწინასწარმეტყველებდნენ: ‘აჰა, მე მივცემ მათ ბაბილონის მეფეს ნაბუქოდონოსორს ხელში და ის დახოცავს მათ თქვენს თვალწინ.

²²და აღებული იქნება მათგან წყევლა იუდას ყველა გადასახლებულისათვის, რომლებიც ბაბილონში არიან: უფალმა გაგხადოს შენ ციდკიაჰუსავით და ახაბივით, რომელნიც ცეცხლზე შეწვა ბაბილონის მეფემ.

²³იმის გამო, რომ საზიზღრობა ჩაიდინეს მათ ისრაელში და მრუშობდნენ ისინი თავიანთ მოყვასთა ცოლებთან და ტყუილს ამბობდნენ ჩემი სახელით, რომელიც მე არ მიბრძანებია. და მე ვარ მცოდნე და მოწმე!’ — სიტყვა უფლისა.

²⁴და შემაია ნეხელამელს უთხარი:

²⁵„ასე თქვა უფალმა ცაბაოთმა, ისრაელის ღმერთმა: ‘იმის გამო, რომ შენი სახელით უგზავნიდი წერილებს იერუსალიმის მთელ ერს და ცეფანია მაყასეიას ძეს, მღვდელს და ყველა მღვდელთ, რომ:

²⁶უფალმა დაგაყენა შენ მღვდლად იოეჰოიადაყის ნაცვლად, რომ გეზრუნა იმისათვის, რომ ყოფილიყვნენ უფლის ტაძარში ყოველი შეშლილი კაცისა და წინასწარმეტყველის ზედამხედველნი, და რომ გაგეკრა ის ბოძზე და ჩაგესვა საკანში.

²⁷და ახლა რატომ არ დატუქსავთ იერემია ყანათოთელს, რომელიც თქვენ გიწინასწარმეტყველებდათ?

²⁸იმიტომ, რომ ჩვენთანაც გამოგზავნა ბაბილონში სათქმელად: ხანგრძლივი იქნება დევნილობა; აიშენეთ სახლები და დასახლდით და გააშენეთ ბაღები და ჭამეთ მათი ნაყოფი.“

²⁹და წაიკითხა მღვდელმა ცეფანიამ ეს წერილი იერემია წინასწარმეტყველის გასაგონად;

³⁰და იყო სიტყვა უფლისა იერემიას მიმართ:

³¹„გაგზავნე, უთხრან ყველა გადასახლებულს: ‘ასე თქვა უფალმა შემაყია ნეხელამელზე: იმის გამო, რომ შემაყიამ გიწინასწარმეტყველათ თქვენ, მე კი არ გამომიგზავნია იგი, და დაგაიმედათ ტყუილზე,

³²ამიტომ ასე თქვა უფალმა: ‘აჰა, მე დავსჯი შემაყია ნეხელამელს და მის თესლს. არავინ არ ეყოლება მას ამ ერს შორის მცხოვრები და ვერ იხილავს ის სიკეთეს, რომელსაც მე ვუყოფ ჩემს ერს,’ — სიტყვა უფლისა, — ‘რადგან განდგომას ლაპარაკობდა უფლის წინააღმდეგ!’“