Read ბიბლია იერ. 37 Bible Online

იერ. 37 - ბიბლია bible

იერ. 37

¹და გამეფდა მეფე ციდკიაჰუ, იოშიაჰუს ძე, იეჰოიაკიმის ძის იექონიაჰუს ნაცვლად, რომელიც ბაბილონის მეფე ნაბუქოდონოსორმა გაამეფა იუდას ქვეყანაში.

²და არ ისმინეს მან და მისმა მსახურებმა და ქვეყნის ერმა უფლის სიტყვები, რომელიც იერემია წინასწარმეტყველის ხელით წარმოთქვა.

³და გაგზავნა მეფე ციდკიაჰუმ იეჰუქალ შელემიას ძე და ცეფანია მაყასეია მღვდლის ძე იერემია წინასწარმეტყველთან, რომ ეთქვათ: „შეევედრე ჩვენთვის უფალს, ჩვენს ღმერთს.“

⁴იერემია კი დადიოდა ხალხში და ჯერ არ იყო დაპატიმრებული.

⁵გამოვიდა ფარაონის ლაშქარი ეგვიპტიდან; და ქალდეველებმა, იერუსალიმს რომ ადგნენ გარს, შეიტყვეს ეს ამბავი და უკუიქცნენ იერუსალიმისაგან.

⁶და იყო სიტყვა უფლისა იერემია წინასწარმეტყველის მიმართ:

⁷„ასე თქვა უფალმა, ისრაელის ღმერთმა: უთხარით იუდას მეფეს, რომელიც თქვენ გგზავნით ჩემთან ჩემს შესაკითხავად: „ფარაონის ლაშქარი, რომელიც თქვენს დასახმარებლად გამოვიდა, თავის ქვეყანაში, ეგვიპტეში დაბრუნდება.

⁸და მობრუნდებიან ქალდეველნი და შეებრძოლებიან ამ ქალაქს და დაიპყრობენ მას და ცეცხლში დაწვავენ.’

⁹ასე თქვა უფალმა: ‘ნუ მოიტყუებთ თქვენს თავს: წავლენ ჩვენგან ქალდეველნიო, რადგან არ წავლენ.

¹⁰რადგან, კიდევაც რომ დაამარცხოთ ქალდეველთა ლაშქარი, რომელიც თქვენ გებრძვით, და დარჩნენ მათგან კაცნი, მახვილით დაკოდილნი, ისინი აღდგებიან თითოეული თავისი კარვიდან და დაწვავენ ამ ქალაქს ცეცხლში.’“

¹¹და როდესაც ქალდეველთა ლაშქარი უკუიქცა იერუსალიმისაგან ფარაონის ლაშქრის გამო,

¹²გამოვიდა იერემია იერუსალიმიდან ბენიამინის ქვეყანაში წასასვლელად, რათა გასცლოდა იქიდან ხალხს.

¹³ბენიამინის კარიბჭეში იყო, რომ იქ ზედამხედველთა უფროსმა, სახელად ირიამ, ხანანიას ძის, შელემიას ძემ დაიჭირა იერემია წინასწარმეტყველი და უთხრა: „ქალდეველებს უვარდები ტყვედ.“

¹⁴და უპასუხა იერემიამ: „ტყუილია, მე არ ჩაუვარდები ქალდეველებს ტყვედ.“ მაგრამ არ უსმინა მას და დაიჭირა ირიამ იერემია და მიიყვანა მთავრებთან.

¹⁵და განრისხდნენ მთავრები იერემიაზე და სცემეს და ჩასვეს ის საპატიმროში, იონათან მწერლის სახლში, რადგან საპყრობილედ დაადგინეს იგი.

¹⁶და შევიდა იერემია დილეგში და თაღებში, და იჯდა იქ იერემია მრავალი დღე,

¹⁷გაგზავნა მეფე ციდკიაჰუმ და წაიყვანეს იგი; და თავის სახლში მეფე ფარულად შეეკითხა მას: „არის რამე სიტყვა უფლისაგან?“ და უპასუხა იერემიამ: „არის!“ და უთხრა: „ბაბილონის მეფეს გადაეცემი ხელთ.

¹⁸უთხრა იერემიამ მეფე ციდკიაჰუს: „რა შევცოდე მე შენს წინაშე და შენს მსახურთა წინაშე და ამ ერის წინაშე, რომ საპყრობილეში ჩამსვით?

¹⁹სად არიან თქვენი წინასწარმეტყველნი, რომლებიც ასე გიწინასწარმეტყველებდნენ: ‘არ წამოვა ბაბილონის მეფე თქვენს წინააღმდეგ და ამ ქვეყნის წინააღმდეგ?’

²⁰ახლა კი, მისმინე, ბატონო მეფევ! და შეწყნარებულ იქნეს ჩემი ვედრება შენს წინაშე და ნუ დამაბრუნებ იონათან მწერლის სახლში, რათა არ მოვკვდე იქ.“

²¹და ბრძანა მეფე ციდკიაჰუმ და გადასცეს იერემია ზედამხედველებს საყარაულო ეზოში და აძლევდნენ მას პურის კოკორს დღეში მცხობელთა ქუჩიდან ვიდრე ქალაქში პური არ გამოილია. და იჯდა იერემია საყარაულო ეზოში.