Read ბიბლია იერ. 50 Bible Online

იერ. 50 - ბიბლია bible

იერ. 50

¹სიტყვა, რომელიც წარმოთქვა უფალმა ბაბილონზე და ქალდეველთა ქვეყანაზე წინასწარმეტყველ იერემიას მეშვეობით.

²„აუწყეთ და ასმინეთ ხალხებში, და აღმართეთ ალამი, ასმინეთ, ნუ დამალავთ და თქვით: ‘შეპყრობილია ბაბილონი, შერცხვენილია ბელი, დალეწილია მარდუქი, შერცხვენილია მისი კერპები, დალეწილია მათი ძეგლები!’

³რადგან მის წინააღმდეგ აღდგა ხალხი ჩრდილოეთიდან, უდაბნოდ აქცევს მის ქვეყანას და არ იქნება მასში მცხოვრები; ადამიანიდან საქონლამდე — ყველა დაიძრა და წავიდა.

⁴იმ დღეებში და იმ დროს,“ — სიტყვა უფლისა, — „მოვლენ ისრაელის ძენი, ისინი და იუდას ძენი ერთად ივლიან ტირილით, და დაუწყებენ ძებნას უფალს, თავიანთ ღმერთს.

⁵სიონზე იკითხავენ, ამ გზას მიაქცევენ პირს: ‘მოდით შევუერთდეთ უფალს, საუკუნო აღთქმა არ იქნება დავიწყებული!’

⁶გზააბნეული ცხვარი იყო ჩემი ერი, მათმა მწყემსებმა აცთუნეს ისინი, მთებისაკენ შეაბრუნეს, მთიდან ბორცვზე ხეტიალობდნენ, დაივიწყეს თავიანთი წამოსაწოლი.

⁷ყველა მათი მპოვნელი ჭამდა მათ და მათი მტრები ამბობდნენ: ‘არ ვართ დამნაშავე, რადგან შესცოდეს უფალს, სიმართლის სავანეს, და უფალს, მათი მამების იმედს.’

⁸დაიძარით ბაბილონიდან და ქალდეველთა ქვეყნიდან გამოდით; და იქნებით, როგორც ვაცები ფარის წინამძღოლნი,

⁹რადგან აჰა, მე გამოვაღვიძებ და აღვძრავ ბაბილონზე ბრბოს დიდი ხალხისა ჩრდილოეთის ქვეყნიდან, და დაეწყობიან ისინი მის წინააღმდეგ და შეპყრობილ იქნება იგი; მისი ისრები მსგავსად ნაცადი მეომრისა, არ ბრუნდებიან ამაოდ.

¹⁰და ქალდეა ნადავლად იქცევა და გაძღება ყველა მისი მძარცველი,“ — სიტყვა უფლისა, —

¹¹„რადგან გიხაროდათ და ილხენდით, წამგლეჯელნო ჩემი სამკვიდრებლისა; რადგან გასუქდით, როგორც დეკეული ბალახზე, და ჭიხვინებდით, როგორც ბედაურნი.

¹²დიდად შერცხვება თქვენი დედა, გაწითლდება თქვენი მშობელი; აჰა, ბოლო ხალხებისა — უდაბნო, ურწყული და ტრამალი.

¹³უფლის რისხვის გამო არ დასახლდება და უდაბნოდ იქცევა ერთიანად. ყოველი, ბაბილონზე გამვლელი, გაოცდება და დასცინებს მის ყველა ჭრილობას.

¹⁴ჩამწკრივდით ბაბილონის ირგვლივ, ყველა მშვილდის მომზიდველნო, ესროლეთ მას, ნუ დაინანებთ ისარს, რადგან შესცოდა მან უფალს.

¹⁵დასძახეთ მის წინააღმდეგ ირგვლივ, ხელი ჩაუშვა მან, ჩაიქცა მისი საფუძვლები, დაინგრა მისი გალავნები, რადგან უფლის შურისძიებაა ეს; შური იძიეთ მასზე, როგორც მოიქცა, ისე მოექეცით მას.

¹⁶მთესველი მოსპეთ ბაბილონიდან და ნამგლის დამჭერი მოსავლის აღებისას. ყოველი თავისი ერისაკენ მიბრუნდეს და ყოველი თავის ქვეყანაში გაიქცეს დამღუპველი მახვილისაგან.

¹⁷გაფანტული ცხვარია ისრაელი, ლომებმა გააძევეს იგი. პირველმა აშურის მეფემ შეჭამა იგი და ამ უკანასკნელმა, ბაბილონის მეფემ ნაბუქოდონოსორმა ძვლები დაუმტვრია მას.“

¹⁸ამიტომ ასე თქვა უფალმა ცაბაოთმა, ისრაელის ღმერთმა: „მე დავსჯი ბაბილონის მეფეს და მის ქვეყანას, როგორც დავსაჯე მეფე აშურისა.

¹⁹და დავაბრუნებ მე ისრაელს თავის საძოვარზე და დამწყესავს ის ქარმელზე და ბაშანზე, და ეფრემისა და გილყადის ბორცვებზე გაძღება მისი სული.

²⁰იმ დღეებში და იმ დროს,“ — სიტყვა უფლისა, — „მოიკითხავს ისრაელის ურჯულოებას და არ იქნება იგი, და იუდას ცოდვებს — და ვერ იპოვნიან, რადგან მივუტევებ მათ, ვისაც ცოცხლებში დავტოვებ.

²¹მერათაიმის ქვეყანაზე გაილაშქრე, მასზე და ფეკოდის მცხოვრებლებზე და ააოხრე და გაანადგურე ყველაფერი მათ შემდეგ,“ — სიტყვა უფლისა, — „და გააკეთე ყოველივე, როგორც მე გიბრძანე!

²²ბრძოლის ხმაა ქვეყანაში და დიდი ნგრევა.

²³როგორ გატყდა და დაიმტვრა ჩაქუჩი მთელი ქვეყნისა! როგორ იქცა ბაბილონი შიშისზარად ხალხებში?

²⁴მახე დაგიგე და შეპყრობილ იქენ, ბაბილონო, შენ კი არ იცოდი. აღმოჩენილი და დაჭერილი ხარ, რადგან აუჯანყდი უფალს.

²⁵გახსნა უფალმა თავისი საცავი და გამოიტანა ჭურჭელი თავისი რისხვისა, რადგან უფალს, ცაბაოთ ღმერთს საქმე აქვს ქალდეველთა ქვეყანაში.

²⁶მოდით მასზე ყოველი კიდიდან, გახსენით მისი ბეღლები, გათელეთ იგი ზვინებივით და მოსრეთ სრულად, რათა არ დარჩეს მისგან ნატამალი.

²⁷მახვილს მიეცით მისი ყველა მოზვერი, ჩავიდნენ დასაკლავად; ვაი მათ, რადგან მოვიდა მათი დღე, ჟამი მათი განკითხვისა.

²⁸გაქცეულთა და ლტოლვილთა ხმაა ბაბილონის ქვეყნიდან, რათა სიონზე გამოაცხადონ უფლის, ჩვენი ღმერთის შურისძიება მისი ტაძრის გამო.

²⁹მოუხმეთ ბაბილონის წინააღმდეგ მრავალთ, ყველა მშვილდის მომზიდველს, ბანაკად შემოეწყვეთ მის ირგვლივ, რათა არ იყოს მისთვის ხსნა, მისი საქმისამებრ მიუზღეთ მას. როგორც მოიქცა, ისე მოექეცით, რადგან ბოროტი განიზრახა უფლის, ისრაელის წმიდის წინააღმდეგ.

³⁰ამიტომ მისი ჭაბუკნი მის მოედნებზე დაეცემიან და ყველა მისი მებრძოლი დაიღუპება იმ დღეს.“ — სიტყვა უფლისა. —

³¹„აჰა, შენს წინააღმდეგ ვარ, ბოროტგანმზრახველო,“ — სიტყვა უფლისა, ცაბაოთ ღმერთისა, — „რადგან მოვიდა შენი დღე, ჟამი შენი განკითხვისა.

³²და წაიბორძიკებს ბოროტგანმზრახველი და დაეცემა, და არავინ იქნება მისი ამყენებელი; ცეცხლს დავანთებ მის ქალაქებში და შეჭამს ყოველივეს მის ირგვლივ.“

³³ასე თქვა უფალმა ცაბაოთმა: „ჩაგრულნი არიან ისრაელის ძენი და იუდას ძენი მათთან ერთად და ყველა მათ დამტყვევებელს მაგრად უჭირავთ ისინი, არ უნდათ მათი გაშვება.

³⁴მაგრამ ძლიერია მათი გამომხსნელი, უფალი ცაბაოთია მისი სახელი, ის გაარჩევს მათ საქმეს, რათა დაამშვიდოს ქვეყანა და ააკანკალოს ბაბილონის მცხოვრებნი.

³⁵მახვილი ქალდეველებზე,“ — სიტყვა უფლისა, — „და ბაბილონის მცხოვრებლებზე, მის მთავრებზე და მის ბრძენებზე;

³⁶მახვილი მატყუარებზე და შეიშლებიან ისინი, მახვილი მის მამაცებზე და დაილეწებიან ისინი;

³⁷მახვილი მის ცხენებზე და მის ეტლებზე და ყველა მის უცხოტომელ მებრძოლზე, რომლებიც მასში არიან, და დიაცებად იქცევიან ისინი, მახვილი მის საგანძურებს და დატაცებული იქნებიან.

³⁸სიმშრალე მის წყლებს და ამოშრებიან ისინი, რადგან ქანდაკთა ქვეყანაა ის და შეიშლებიან ისინი კერპთა საფრთხობელებით.

³⁹ამიტომ იცხოვრებენ იქ აფთარნი ტურებთან ერთად, და სირაქლემები იცხოვრებენ მასში! და აღარ დასახლდება არასოდეს და არ გაკაცრიელდება თაობიდან თაობამდე.

⁴⁰როგორც ღვთისგან დაქცეული სოდომი და გომორა და მისი მეზობელი ქალაქები,“ — სიტყვა უფლისა, — „ასევე იქაც კაციშვილი არ იცხოვრებს და ადამის ძე არ დასახლდება მასში.

⁴¹აჰა, ერი მოდის ჩრდილოეთიდან, დიდი ხალხი, და მრავალი მეფე იღვიძებს ქვეყნის კიდეებიდან;

⁴²მშვილდი და ლახვარი უჭირავთ მათ; სასტიკნი არიან და შეუბრალებელნი, მათი ხმა ზღვასავით გრგვინავს და ცხენებზე არიან ამხედრებულნი; როგორც ერთი, მზად არიან შენთან საბრძოლველად, ბაბილონის ასულო!

⁴³მოესმა ბაბილონის მეფეს მათზე ამბავი და ხელები მოუდუნდა, ტანჯვამ და ტკივილმა შეიპყრო იგი მშობიარესავით.

⁴⁴ლომივით ამოვა მტერი იორდანეს უღრანიდან მტკიცე საცხოვრებლებზე, მე წამში გავაქცევ მათ იქიდან და, ვინც ამორჩეულია, იმას დავადგენ მასზე; რადგან ვინ არის ჩემი მსგავსი და ვინ დამიწესებს ჟამს? და ვინაა ის მწყემსი, ვინც წინ დამიდგება მე?“

⁴⁵ამიტომ ისმინეთ უფლის გადაწყვეტილება, რაც ბაბილონზე გადაწყვიტა და მისი განზრახვები, რაც ქალდეველთა ქვეყანაზე განიზრახა. მართლაც ყველაზე პატარა ბატკნები ათრევენ მათ; მართლაც ააოხრებენ მათ საცხოვრებელს.

⁴⁶ბაბილონის დაპყრობის ხმისაგან იზანზარებს ქვეყანა და კივილი გაისმება ხალხებში.