Read ბიბლია იერ. 51 Bible Online

იერ. 51 - ბიბლია bible

იერ. 51

¹და თქვა უფალმა: „მე აღვძრავ ბაბილონში და ქალდეაში მცხოვრებლებზე დამღუპველ ქარს.

²გავგზავნი ბაბილონში გამნიავებელს და გაანიავებენ მას, და გაატიალებენ მის ქვეყანას, რადგან ყოველი მხრიდან დაესხმიან თავს მისი უბედურების დღეს.

³ნუ მოზიდავს მომზიდველი თავის მშვილდს და ნუ გაამაყდება თავის ჯავშანში, და ნუ დაინდობთ მის ჭაბუკებს, გაანადგურეთ მთელი მისი ჯარი.

⁴და დაეცემიან მოკლულნი ქალდეველთა ქვეყანაში და განგმირულნი მის ქუჩებში,

⁵რადგან არ დაქვრივებულან ისრაელი და იუდა მათი უფლის, ცაბაოთ ღმერთისაგან, მათი ქვეყანა კი დანაშაულითაა სავსე ისრაელის წმიდის წინაშე.

⁶გაიქეცით ბაბილონიდან და თითოეულმა გადაარჩინოს თავისი სული, ნუ დაიღუპებით მისი ურჯულოების გამო, რადგან შურისგების ჟამია ეს უფლისათვის, მისაგებელს მიუზღავს მას.

⁷ოქროს თასი იყო ბაბილონი უფლის ხელში, დამათრობელი მთელი ქვეყნისა, მისგან სვამდნენ ხალხები ღვინოს, იმიტომ შეიშალნენ ხალხები.

⁸უცებ დაეცა ბაბილონი და დაილეწა, იქვითინეთ მასზე, მალამო აიღეთ მისი ჭრილობისათვის — იქნებ განიკურნოს.

⁹ვმკურნალობდით და ვერ განიკურნა; დავტოვოთ იგი და წავიდეთ ჩვენ-ჩვენს ქვეყანაში, რადგან ცას უწია მისმა განაჩენმა და ღრუბლებამდე ავიდა.

¹⁰უფალმა გამოამჟღავნა ჩვენი სიმართლე, მოდით და მოვუთხროთ სიონში საქმე უფლისა, ჩვენი ღმერთისა.

¹¹გალესეთ ისრები, შეავსეთ კაპარჭები! გამოაღვიძა უფალმა მიდიელ მეფეთა სული, რადგან ბაბილონის განადგურება განიზრახა, რადგან უფლის შურისგებაა ეს, შურისგება მისი ტაძრის გამო.

¹²ბაბილონის გალავნის წინააღმდეგ აღმართეთ ალამი, გაამაგრეთ დაცვა, დააყენეთ მცველნი, მოამზადეთ საფარი, რადგან განიზრახა უფალმა და კიდეც შეასრულებს, რაც თქვა ბაბილონის მცხოვრებლებზე.

¹³მრავალ წყლებზე დასახლებულო, მრავალი განძეულის მფლობელო, მოვიდა შენი აღსასრული, შენი ანგარების წილისამებრ.

¹⁴დაიფიცა უფალმა ცაბაოთმა: „მართლაც გაგავსებ შენ ადამიანებით, როგორც კალიებით და საომარ ყიჟინას დაგძახებენ.“

¹⁵მან შექმნა ქვეყანა თავისი ძალით, სამყარო განამტკიცა თავისი სიბრძნით და თავისი გონებით განავრცო ცა.

¹⁶როცა ხმას გამოსცემს, წყალი ხმაურობს ცაში და ამოჰყავს ღრუბლები ქვეყნის ბოლოდან, ელვას წვიმად აქცევს და ქარი გამოჰყავს თავის საუნჯეთაგან.

¹⁷გონებაჩლუნგია ყოველი კაცი თავის ცოდნაში, სცხვენია ყოველ ოქრომჭედელს თავისი გამოჭედილი კერპისა, რადგან სიცრუეა მისი გამოდნობილი და სული არაა მათში.

¹⁸ამაოებაა ისინი — საქმენი ცთომილებისა, მათი განკითხვისას გაქრებიან ისინი.

¹⁹მათ არ ჰგავს იაკობის წილხვედრი, რადგან ყველაფრის შემქმნელია იგი, და მათ შორის თავისი სამკვიდრებელი ტომისაც — უფალი ცაბაოთია მისი სახელი.

²⁰შენ ჩემი საბრძოლო კომბალი იყავი, საომარი იარაღი, და ვაცამტვერებდი შენით ხალხებს და ვსპობდი შენით სამეფოებს,

²¹ვაცამტვერებდი შენით ცხენსა და მის მხედარს, ვაცამტვერებდი შენით ეტლსა და მხედარს;

²²ვაცამტვერებდი შენით კაცსა და ქალს, ვაცამტვერებდი შენით მოხუცსა და ყმაწვილს, ვაცამტვერებდი შენით ჭაბუკსა და ქალწულს;

²³ვაცამტვერებდი შენით მწყემსსა და მის ფარას, ვაცამტვერებდი შენით მიწათმოქმედსა და მის უღლეულს, ვაცამტვერებდი შენით სარდლებს და გამგებლებს.

²⁴და თქვენს თვალწინ მივუზღავ ბაბილონსა და ქალდეას ყველა მცხოვრებს ყველა იმ ბოროტების გამო, რაც ჩაიდინეს სიონის მიმართ!“ — სიტყვა უფლისა. —

²⁵„აჰა, შენს წინააღმდეგ ვარ, დამღუპველო მთავ,“ — სიტყვა უფლისა, — „დამღუპველო მთელი ქვეყნისა; და გავიწვდენ ხელს შენს წინააღმდეგ და დაგაგორებ კლდეებზე და მიგცემ ცეცხლმოკიდებულ მთას.

²⁶და არ აიღებენ შენგან ქვას ქვაკუთხედისა და საძირკვლისათვის, რადგან საუკუნო უდაბნოდ იქცევი!“ — სიტყვა უფლისა. —

²⁷„ალამი აღმართეთ ქვეყანაში, ჩაჰბერეთ საყვირს ხალხთა შორის, დარაზმეთ ხალხები, მოუხმეთ მის წინააღმდეგ არარატის, მინისა და აშქენაზის სამეფოებს, დააყენეთ მის წინააღმდეგ სპასპეტი, წამოაყენეთ ცხენები ბურძგლიან კალიასავით.

²⁸დარაზმეთ მის წინააღმდეგ ხალხები, მიდიის მეფენი და მისი ერისმთავრები, და ყველა მისი განმგებელი და მთელი მისი სახელმწიფო ქვეყანა.

²⁹და ზანზარებს მიწა და თრთის, რადგან ბაბილონზე სრულდება უფლის განზრახვა: უკაცრიელ უდაბნოდ აქციოს ბაბილონის ქვეყანა.

³⁰ბაბილონის მამაკაცებმა შეწყვიტეს ბრძოლა, ჩასხდნენ ციხე-სიმაგრეებში, გამოილია მათი ძალა, ქალებს დაემსგავსნენ; გადაწვეს მისი საცხოვრებლები, დაილეწა მათი ურდულები.

³¹მალემსრბოლი მალემსრბოლის შესახვედრად გარბის და მოამბე — მოამბის შესახვედრად, რათა აუწყონ ბაბილონის მეფეს, რომ დაპყრობილია მისი ქალაქი ყოველი კიდიდან,

³²ფონები დაკავებულია და ტბის ლერწამნი ცეცხლით გადაწვეს, და მებრძოლნი გაიფანტნენ.“

³³რადგან ასე თქვა უფალმა ცაბაოთმა, ისრაელის ღმერთმა: „ბაბილონის ასული არის, როგორც კალო მისი ლეწვის ჟამს, ცოტაც და მოვა მისი გადახვნის ჟამიც.

³⁴შემჭამა მე, დამღეჭა მე ბაბილონის მეფემ — ნაბუქოდონოსორმა — ცარიელ ჭურჭლად მაქცია! როგორც ვეშაპმა, გაივსო თავისი მუცელი ჩემი ტკბილეულით, ამომანთხია.

³⁵მძლავრება ჩემზე და ჩემს ხორცზე ბაბილონზე იყოს,“ იტყვის სიონის მცხოვრები, „და ჩემი სისხლი იყოს ქალდეის მცხოვრებლებზე,“ იტყვის იერუსალიმი.

³⁶ამიტომ ასე ამბობს უფალი: „მე გავარჩევ შენს საქმეს და შურს ვიძიებ შენს გამო, და ამოვაშრობ მის ზღვას და დავწრიტავ მის წყაროს.

³⁷და იქცევა ბაბილონი ნანგრევების გროვად, ტურების ბუნაგად, შიშისზარად და დასაცინად, უკაცრიელად.

³⁸ლომებივით ერთად დაიბუხუნებენ, ლომის ბოკვერებივით იღრიალებენ.

³⁹მათი გახურებისას მოვუწყობ ნადიმს და დავათრობ მათ, რომ გამხიარულდნენ და დაიძინონ საუკუნო ძილით და აღარ გამოიღვიძონ.“ — სიტყვა უფლისა. —

⁴⁰„ჩამოვიყვან მათ კრავებივით დასაკლავად, როგორც ვერძებს ვაცებითურთ.

⁴¹როგორ იქნა დაპყრობილი შეშაქი და დაჭერილ იქნა მთელი ქვეყნის დიდება! როგორ იქცა ბაბილონი ხალხებში შიშისზარად!

⁴²ზღვამ აიწია ბაბილონზე, თავისი მრავალი ტალღით ფარავს მას.

⁴³გაუკაცრიელდნენ მისი ქალაქები, ურწყულ და ტრამალ ქვეყნად იქცნენ, სადაც კაციშვილი არ დასახლდება და ადამის ძე არ გაივლის მასში.

⁴⁴და მე განვიკითხავ ბელს ბაბილონში და გამოვაცლი გადაყლაპულს პირიდან. და აღარ ივლიან მისკენ ხალხები, ბაბილონის გალავანიც ჩამოიქცევა.

⁴⁵გამოდი მისი წიაღიდან, ჩემო ერო, და იხსენით თითოეულმა თავისი სული უფლის რისხვის ალისგან.

⁴⁶არ დაუძლურდეს თქვენი გული ნუ შეგეშინდებათ ამბისა, ქვეყანაზე რომ ისმის; და მოვა ის ამბავი ერთ წელს, და მას შემდეგ სხვა ამბავიც მომდევნო წელს, და იქნება ძალადობა ქვეყანაში და ხელმწიფე ხელმწიფის წინააღმდეგ.

⁴⁷ამიტომ აჰა, მოდის დღეები, როდესაც განვიკითხავ ბაბილონის კერპებს, და მთელი მისი ქვეყანა შერცხვება და ყველა მისი მოკლული დაეცემა მასში.

⁴⁸და გაიხარებენ ბაბილონზე ცა და ქვეყანა და ყოველივე, რაც მათშია, რადგან ჩრდილოეთიდან დაესხმიან მძარცველნი,“ — სიტყვა უფლისა. —

⁴⁹„როგორც ბაბილონმა დასცა, ისრაელის დახოცილნი, ბაბილონშიც დაეცემიან დახოცილნი მთელი ქვეყნისა.

⁵⁰მახვილისაგან თავდაღწეულნო, წადით, ნუ დადგებით, შორიდან გახსოვდეთ უფალი, და იერუსალიმი გაიხსენეთ თქვენს გულში.

⁵¹შეგვრცხვა ჩვენ, რადგან ვისმინეთ გინება, აუგმა დაფარა ჩვენი პირი, რადგან უცხონი მოვიდნენ უფლის საკურთხეველში.

⁵²ამიტომ მოდის დღეები,“ — სიტყვა უფლისა, — „და მე განაჩენს გამოვუტან მის კერპებს და მთელ მის ქვეყანაში იკვნესებენ სასიკვდილოდ დაჭრილნი.

⁵³კიდევაც რომ აიწიოს ბაბილონმა ცამდე და კიდევაც რომ გაამაგროს მაღალზე თავისი ძლიერება, მიუვლენ მას მძარცველნი ჩემგან,“ — სიტყვა უფლისა. —

⁵⁴„კივილის ხმა ისმის ბაბილონიდან და დიდი ნგრევა ქალდეველთა ქვეყნიდან.

⁵⁵რადგან უფალი ძარცვავს ბაბილონს და ჩააწყვეტინებს მას მაღალ ხმას და იხმაურებენ მისი ტალღები დიდი წყლებივით და გაისმება ხმაური მათი ხმებისა.

⁵⁶რადგან დაესხმის მას, ბაბილონს, მძარცველი და შეიპყრობიან მისი მამაცნი, დაილეწება მათი მშვილდები, რადგან ღმერთი, შურისგების უფალი, მიუზღავს მათ.

⁵⁷დავათრობ მის მთავრებსა და მის ბრძენთ, მის გამგებლებს და მის სარდლებს, და მის მებრძოლებს და დაიძინებენ საუკუნო ძილით და აღარ გაიღვიძებენ,“ — სიტყვა მეფისა, უფალი ცაბაოთია მისი სახელი.

⁵⁸ასე თქვა უფალმა ცაბაოთმა: „ბაბილონის განიერი გალავნები საძირკვლამდე დაინგრევა და მისი მაღალი კარიბჭენი ცეცხლში დაიწვება; და ამაოდ იშრომებენ ხალხები და მხოლოდ ცეცხლისათვის დაშვრებიან ერები.“

⁵⁹სიტყვა, რომელიც წინასწარმეტყველმა უბრძანა სერაიას, ძეს ნერაიასი, ძისა მახსეიასი, როდესაც ის იუდას მეფე ციდკიაჰუსთან ერთად წავიდა ბაბილონში მისი მეფობის მეოთხე წელს. და სერაია იყო მთავარი მესაწოლე.

⁶⁰და ჩაწერა ერთ წიგნში ყველა ის უბედურება, რომელიც ბაბილონზე მოსახდენია, ბაბილონზე დაწერილი ყველა ის სიტყვა.

⁶¹და უთხრა იერემიამ სერაიას: „როდესაც ბაბილონში მიხვალ, მაშინ ნახავ და წაიკითხავ ყველა ამ სიტყვას.

⁶²და იტყვი: ‘უფალო, შენ წარმოთქვი ამ ადგილზე, რომ ისე გაანადგურებ მას, რომ ვერავინ იცხოვრებს მასში ადამიანიდან საქონლამდე, რადგან საუკუნო უდაბნოდ იქცევა იგი.’

⁶³და როდესაც შენ დაასრულებ ამ წიგნის კითხვას, შეაბი მას ქვა და ჩააგდე ევფრატში.

⁶⁴და თქვი: ‘ასე ჩაიძირება ბაბილონი და აღარ წამოდგება იმ უბედურების გამო, რომელსაც მე მოვაწევ მასზე, და ქანცი გაუწყდებათ!’“ აქამდეა იერემიას სიტყვები.