Read ბიბლია გოდ. 3 Bible Online

გოდ. 3 - ბიბლია bible

გოდ. 3

¹მე ვარ კაცი, მისი წყრომის კვერთხისაგან ჭირის მნახველი.

²მან წამიყვანა და მატარა ბნელში და არა ნათელში.

³მხოლოდ ჩემს წინააღმდეგ აბრუნებს თავის ხელს ისევ და ისევ მთელ დღეს.

⁴დააბერა ჩემი ხორცი და ჩემი კანი, დალეწა ჩემი ძვლები.

⁵შემომადგა მე და მომიცვა სიმწარითა და შეჭირვებით.

⁶ბნელში დამასახლა, როგორც საუკუნოდ მკვდარნი.

⁷ზღუდე შემომავლო, რომ ვერ გამოვიდე და დაამძიმა ჩემი ბორკილები.

⁸კიდევაც რომ ვიკივლო და ვუხმო მშველელს, ჩაახშობს ჩემს ვედრებას.

⁹თლილი ქვებით გადაღობა ჩემი გზები, გაამრუდა ჩემი ბილიკები.

¹⁰ჩასაფრებული დათვია ის ჩემთვის, ლომია შეფარებული.

¹¹გააუკუღმართა ჩემი გზები და დამფლითა მე, დამდო მე ტიალად.

¹²მოზიდა თავისი მშვილდი და მე დამაყენა სამიზნედ ისრისა.

¹³გაატარა ჩემს თირკმელებში ძენი თავისი კაპარჭისა.

¹⁴სასაცილო გავხდი მთელი ჩემი ხალხისა, მათ საშაიროდ მთელ დღეს,

¹⁵სიმწარით გამაძღო, აბზინდით დამათრო.

¹⁶ხრეშით დამამტვრევინა კბილები, გამახვია ფერფლში.

¹⁷და მშვიდობისგან მიტოვებულ იქნა ჩემი სული, დამავიწყდა კეთილდღეობა.

¹⁸და ვთქვი მე: დაიკარგა ჩემი ძალა და ჩემი იმედი უფლისაგან.

¹⁹გაიხსენე, უფალო, ჩემი უბედურება და ტანჯვა და სიმწარე.

²⁰იხსენებს და დამცირებულია ჩემში სული.

²¹ამას ვუპასუხებ ჩემს გულს, ამის გამო ვესავ,

²²რომ უფლის მოწყალება არ დასრულებულა, რომ მისი სიბრალული არ გამოლეულა.

²³განახლდებიან ისინი ყოველ დილით, დიდია შენი ერთგულება.

²⁴ჩემი ხვედრია უფალი, ამბობს ჩემი სული, ამის გამო ვესავ მას.

²⁵კეთილია უფალი მისი მოიმედისთვის, მისი მაძიებელი სულისთვის.

²⁶სიკეთე მას, ვინც მდუმარედ ელოდება უფლისაგან ხსნას.

²⁷სიკეთე კაცს, რომ ზიდა უღელი თავის სიყმაწვილეში,

²⁸დაჯდეს მარტოდ და მდუმარედ, რადგან მან დაადო მას იგი.

²⁹მტვერში დადოს ის თავისი ბაგე — იქნებ არის იმედი.

³⁰ლოყა მიუშვიროს თავის მცემელს, გაძღეს შერცხვენით.

³¹რადგან არ მიატოვებს უფალი საუკუნოდ.

³²რადგან, თუ დაამწუხრებს, შეიბრალებს კიდევაც თავისი დიდი მოწყალებით.

³³რადგან არა თავისი ნებით აყენებს ის ტანჯვას და ამწუხრებს ადამიანის ძეთ,

³⁴რომ გათელოს თავის ფეხქვეშ ქვეყნის ყველა ტუსაღი,

³⁵რომ გაამრუდოს კაცის სამართალი უზენაესის წინაშე,

³⁶რომ გააბათილოს ადამიანი მის საქმეში — არ ხედავს ამას უფალი?

³⁷ვინ არის, რომ თქვა და შესრულდა, განა უფალს არ უბრძანებია?

³⁸განა უზენაესის პირიდან არ გამოდის უბედურება და სიკეთე?

³⁹რას ჩივის ცოცხალი ადამიანი? იჩივლოს კაცმა თავის ცოდვებზე.

⁴⁰მოვძებნოთ ჩვენი გზა და გამოვიძიოთ და მოვბრუნდეთ უფლისაკენ.

⁴¹ავწიოთ ჩვენი გულები ხელებით ღმერთისაკენ ზეცაში.

⁴²ჩვენ შევცოდეთ და ავჯანყდით, შენ არ გვაპატიე.

⁴³შენ შეიმოსე რისხვით და გვდევნე, გვხოცავდი და არ გვიბრალებდი.

⁴⁴შენ შეიმოსე ღრუბლით, რათა არ მოეღწია ჩვენს ლოცვას.

⁴⁵ნაგვად და სიბინძურედ გვაქციე ხალხებს შორის.

⁴⁶დააღო ჩვენზე პირი ყველა ჩვენმა მტერმა.

⁴⁷შიში და ორმო გვხვდა წილად, ნგრევა და შემუსვრა.

⁴⁸წყლის ნაკადულებად მდის ცრემლები თვალთაგან ჩემი ერის ასულის შემუსვრის გამო.

⁴⁹ჩემი თვალი ცრემლსა ღვრის მუდმივად და განუწყვეტლივ,

⁵⁰სანამ გადმოხედავს და დაინახავს უფალი ციდან.

⁵¹ჩემ თვალს ტანჯვა მოაქვს ჩემი სულისათვის ჩემი ქალაქის ყველა ასულის გამო.

⁵²ჩიტივით მომინადირეს მე უმიზეზოდ ჩემმა მტრებმა.

⁵³ჩემი ცხოვრება დილეგში დაღუპეს და ქვებს მესროდნენ მე.

⁵⁴წყალმა გადამიარა თავზე, ვთქვი: „დავიღუპე“.

⁵⁵შავეთის დილეგიდან ვუხმობდი შენს სახელს, უფალო.

⁵⁶ისმინე ჩემი ხმა, ნუ მოარიდებ შენს ყურს ჩემს ღაღადს, ჩემს ამოსუნთქვას.

⁵⁷მომიახლოვდი იმ დღეს, როდესაც მოგიხმე, ამბობდი: „ნუ გეშინია,“

⁵⁸შენ იცავდი, უფალო, ჩემი სულის საქმეს, შენ იხსენი ჩემი სიცოცხლე.

⁵⁹დაინახე, უფალო, ხელმრუდეობა ჩემზე, განსაჯე ჩემი საქმე.

⁶⁰დაინახე მთელი მათი შურისძიება, ყოველი მათი განზრახვა ჩემზე!

⁶¹ისმინე მათგან ლანძღვა, უფალო, ყოველი მათი განზრახვა ჩემს წინააღმდეგ.

⁶²ბაგე ჩემს მომხდურთა და მათი ჩანაფიქრი ჩემს წინააღმდეგაა ყოველ დღე.

⁶³შეხედე მათ დაჯდომისას და ადგომისას, დამცინიან მე თავიანთ სიმღერებში.

⁶⁴მიუზღე მათ მისაგებელი, უფალო, მათი ხელის ნამოქმედარის მიხედვით.

⁶⁵მიეცი მათ გულის ჯანღი, შენი წყევლა იყოს მათზე.

⁶⁶დევნე ისინი რისხვაში და გაანადგურე უფლის ცის ქვეშ.