Read ბიბლია ეზეკ. 1 Bible Online

ეზეკ. 1 - ბიბლია bible

ეზეკ. 1

¹როცა ოცდამეათე წელს, მეოთხე თვის მეხუთე დღეს მე დევნილთა შორის ვიყავი ქებარის მდინარის ნაპირზე, გაიხსნა ცა და ვიხილე ღვთიური ჩვენებანი.

²თვის მეხუთე დღეს, მეხუთე წელს მეფე იეჰოაქინის განდევნიდან

³იყო სიტყვა უფლისა მღვდელ ეზეკიელისადმი, ბუზის ძისა ქალდეველთა ქვეყანაში, მდინარე ქებარის ნაპირზე. და იყო იქ მასზე უფლის ხელი.

⁴და მე ვიხილე, აჰა, გრიგალი მოვიდა ჩრდილოეთიდან, დიდი ღრუბელი და აელვარებული ცეცხლი, და იყო კაშკაში მის ირგვლივ და მის შიგნიდან, როგორც ფოლადის ელვარება ცეცხლში.

⁵და მის შიგნიდან გადმოვიდნენ მსგავსნი ოთხი ცხოველისა. და მათი შესახედაობა ადამიანის მსგავსი იყო.

⁶და თითოეულ მათგანს ოთხი სახე და ოთხი ფრთა ჰქონდა.

⁷მათი ფეხები სწორი იყო და მათ ფეხთა ტერფი იყო მსგავსი ხბოს ფეხის ტერფისა. და ბრწყინავდნენ, როგორც ლაპლაპა სპილენძი.

⁸და ადამიანის ხელები იყო მათი ფრთების ქვეშ, ოთხივე მხარეზე. და სახე და ფრთები ოთხივეს ჰქონდათ.

⁹ერთმანეთს ეხებოდა მათი ფრთები, არ ტრიალდებოდნენ სიარულისას, თითოეული თავისი სახის მიმართულებით მიდიოდა.

¹⁰შესახედაობა მათი სახისა: სახე ადამიანისა და სახე ლომისა ოთხივეს ჰქონდათ მარჯვნივ და სახე ხარისა — ოთხივეს მარცხნივ, და სახე არწივისა ჰქონდა ოთხივეს.

¹¹მათი ფრთები გაყოფილი იყო ზევიდან, თითოეულს ორი ფრთა აერთებდა ერთმანეთთან და ორი ფარავდა მათ ტანს.

¹²თითოეული თავისი სახის მიმართულებით მიდიოდა იქ, საითაც სურვილი ჰქონდათ წასვლისა. მიდიოდნენ, არ ტრიალდებოდნენ სიარულისას.

¹³შესახედაობა ამ ცხოველთა: მათი შესახედაობა — როგორც ცეცხლმოკიდებული ნაკვერცხლისა, მსგავსი ჩირაღდნებისა. ცეცხლი მიმოდიოდა ცხოველებს შორის და ბრწყინვა ჰქონდა ცეცხლს და ცეცხლიდან ელვა გამოდიოდა.

¹⁴ცხოველები გარბოდნენ იქით-აქეთ, მსგავსად ელვისა.

¹⁵და მე შევხედე ცხოველებს და აჰა, თითო ბორბალი იყო მიწაზე ცხოველებთან, ოთხივე სახისთვის.

¹⁶შესახედაობა ამ ბორბლებისა და მათი ნაკეთობა მსგავსი იყო ქრიზოლითისა. და ერთი სახე ჰქონდა ოთხივეს. მათი შესახედაობა და მათი ნაკეთობა ისეთი იყო, როგორც ბორბალში ჩადებული ბორბლისა.

¹⁷თავიანთი ოთხი მხრის მიმართულებით თავიანთი სვლით მიდიოდნენ, არ ტრიალდებოდნენ სვლისას.

¹⁸და მათი ბორბლის ფერსოები მაღალი იყო და საშინელი. და მათი ბორბლის ფერსოები სავსე იყო თვალებით ოთხივეს გარშემო.

¹⁹და როდესაც ცხოველები მიდიოდნენ, ბორბლებიც მიდიოდნენ მათთან და ცხოველთა მიწიდან აწევისას, ბორბლებიც იწეოდნენ.

²⁰საითაც გაიწევდა სული წასასვლელად, იქით მიდიოდნენ, სადაც არ უნდა გაეწია წასასვლელად, ბორბლებიც იწეოდნენ მათ კვალობაზე, რადგან ცოცხალი სული იყო ბორბლებში.

²¹მათი სვლისას მიდიოდნენ ისინიც და გაჩერებისას ისინიც ჩერდებოდნენ. მათი აწევით იწეოდნენ ბორბლები მიწიდან მათ კვალობაზე, რადგან ცოცხალი სული იყო ბორბლებში,

²²ცხოველთა თავზე იყო ცის თაღის მსგავსი, როგორც საშინელი ყინული, გადმოხრილი მათ თავებზე მაღლიდან.

²³თაღის ქვეშ მათი ფრთები გასწორებული იყო ერთიმეორესთან. ერთს ორი ფრთა უფარავდა სხეულს ერთი მხრიდან და ერთს ორი ფრთა — მეორე მხრიდან.

²⁴და მესმოდა მათი ფრთების ხმა, როგორც ხმა მრავალი წყლისა, როგორც ხმა ყოვლადძლიერისა მათი სვლისას, ხმა ღრიანცელისა, როგორც ხმა ბანაკისა. გაჩერებისას კეცავდნენ თავიანთ ფრთებს.

²⁵და ისმოდა ხმა თაღის ზემოდან, რომელიც მათ თავს ზემოთ იყო. გაჩერებისას კეცავდნენ თავიანთ ფრთებს.

²⁶და თაღის ზემოთ, რომელიც თავსზეით ჰქონდათ, იყო მსგავსი საფირონის ქვისა, მსგავსი ტახტისა, და ამ ტახტის მსგავსზე იყო ადამიანის მსგავსი სახება, მის მაღლა.

²⁷და მე ვიხილე თითქოსდა სინათლე, ცეცხლის სახებასავით მის შიგნით და ირგვლივ, მისი წელის სახებიდან და მაღლა. და მისი წელის სახებიდან და დაბლა ვიხილე ცეცხლის სახებასავით და ნათება იყო მის ირგვლივ.

²⁸როგორც სახება ცისარტყელასი, რომელიც ღრუბელშია წვიმიან დღეს, ასეთი სახება ჰქონდა ამ ნათებას ირგვლივ. ეს იყო სახება მსგავსი უფლის დიდებისა. და როცა ვიხილე ეს, პირქვე დავემხე და მომესმა მოლაპარაკის ხმა.