Read ბიბლია ეზეკ. 21 Bible Online

ეზეკ. 21 - ბიბლია bible

ეზეკ. 21

¹და იყო სიტყვა უფლისა ჩემდამი:

²„ძეო კაცისავ! მიმართე შენი პირი იერუსალიმისაკენ და უქადაგე საწმიდრებს და უწინასწარმეტყველე ისრაელის მიწას,

³და უთხარი ისრაელის მიწას: ‘ასე ამბობს უფალი: აჰა, შენს წინააღმდეგ ვარ: გამოვიღებ ჩემს მახვილს მისი ქარქაშიდან და მოვკვეთ შენგან მართალსა და ბოროტმომქმედს.

⁴რომ მოვკვეთო შენგან მართალი და ბოროტმომქმედი, ამიტომ გამოვა ჩემი მახვილი მისი ქარქაშიდან ყველა ხორციელზე სამხრეთიდან ჩრდილოეთამდე.

⁵და მიხვდება ყველა ხორციელი, რომ მე, უფალმა, გამოვიღე ჩემი მახვილი მისი ქარქაშიდან, და აღარ ჩაბრუნდება უკან.

⁶და შენ, ძეო კაცისავ! ამოიხვნეშე წელმოწყვეტით და სიმწრით ამოიხვნეშე მათ თვალწინ.

⁷და რადგან გკითხავენ შენ: ‘რისთვის ხვნეში?’ და ეტყვი: ‘ხმის გამო, რომელიც მოდის — და დადნება ყოველი გული, და მოდუნდება ყოველი ხელი, და დაუძლურდება ყოველი სული, და ყველა მუხლები გაწყალდება. აჰა, მოდის და იქნება!’ — სიტყვა უფალი ღმერთისა.“

⁸და იყო სიტყვა უფლისა ჩემდამი:

⁹„ძეო კაცისავ! იწინასწარმეტყველე და თქვი: ‘ასე თქვა უფალმა: თქვი, მახვილი, მახვილი გალესილი და გაპრიალებული,

¹⁰რომ დახოცოს, იმისათვის გაილესა, რათა ელვა ჰქონდეს, გაპრიალდა! გვიხაროდეს ჩვენ, ჩემი ძის კვერთხმა მოიძულა ყველა ხე.

¹¹და მიეცა გასაპრიალებლად, ხელში დასაჭერად. გაილესა ეს, მახვილი და გაპრიალდა იგი მკვლელის ხელში გადასაცემად.

¹²იკივლე და იტირე, ძეო კაცისავ! რადგან ის ჩემი ერის, ისრაელის ყველა მთავრის წინააღმდეგ არის! მახვილს არიან მიცემულნი ჩემს ერთან ერთად, ამიტომ ირტყი შენს ბარძაყზე.

¹³რადგან განსაცდელი იყო და რა არის, თუ კვერთხიც არ მოიძულა.“ — სიტყვა უფალი ღმერთისა. —

¹⁴„და შენ, ძეო კაცისავ! იწინასწარმეტყველე და შემოჰკარი ხელი ხელს და გაორდება მახვილი მესამეგზის. განგმირულთა მახვილია ის, დიდის მოსაკლავი მახვილი, რომელიც გარს უვლის მათ.

¹⁵რათა დადნეს გული და გამრავლდეს დაბრკოლებანი, ყველა მათ კარიბჭეზე დავდე მე სასტიკი მახვილი — გაკეთებულია ელვასავით, გაპრიალებულია დასახოცავად.

¹⁶გაერთიანდი მარჯვნივ, გაემართე მარცხნივ, საითკენაც შენი პირია განკუთვნილი,

¹⁷და მეც შემოვკრავ ხელს ხელზე და დავაცხრობ ჩემს გულისწყრომას, მე, უფალმა ვთქვი.“

¹⁸და იყო სიტყვა უფლისა ჩემდამი:

¹⁹„და შენ, ძეო კაცისავ! დაადგინე შენთვის ორი გზა ბაბილონის მეფის მახვილის მოსასვლელად. ორივენი ერთი ქვეყნიდან გამოვლენ, და ამოირჩიე ადგილი, ქალაქის გზის დასაწყისში ამოარჩიე.

²⁰გზა დაადგინე მახვილის მოსასვლელად ყამონიანთა რაბასა და იუდაში, გამაგრებულ იერუსალიმში.

²¹რადგან დადგა ბაბილონის მეფე გზის გასაყართან, ორი გზის დასაწყისში, სამისნოდ: შეარხია ისრები, ჰკითხა თერაფიმებს, დახედა ღვიძლს.

²²მის მარჯვენა ხელში იყო მისნობა — იერუსალიმი, დაედგა კედელსანგრევი მანქანები, გაეხსნა პირი სიკვდილისათვის, აეწია ხმა მხედრული შეძახილით, დაედგა კედელსანგრევი მანქანები კარიბჭეებთან, დაეყარათ მიწაყრილი, აეშენებინათ ციხე-სიმაგრენი.

²³და იქნება ეს მათ თვალში, როგორც ფუჭი მკითხაობა, ფიცთა ფიცი აქვთ დადებული, მაგრამ ის ახსენებს იმ ურჯულოებას, რის გამოც დაჭერილ იქნებიან.

²⁴და თქვა უფალმა ღმერთმა: ‘რადგან თქვენ გაიხსენეთ თქვენი ურჯულოება, როდესაც გამოამჟღავნეთ თქვენი დანაშაულებანი, რათა გეჩვენებინათ თქვენი ცოდვანი თქვენს ყველა ნამოქმედარში, ისე, როგორც თქვენ იყავით გახსენებულნი, ხელით იქნებით დაჭერილნი.

²⁵და შენ, შებღალულო ბოროტმომქმედო, მთავარო ისრაელისა, რომლის დღეც მოვიდა უკანასკნელი სასჯელის დროს,’

²⁶და თქვა უფალმა ღმერთმა: ‘მოიშორე დოლბანდი და ჩამოიღე გვირგვინი. ასე აღარ იქნება. დამდაბლებული ამაღლდება და ამაღლებული დამდაბლდება.

²⁷ნანგრევებად, ნანგრევებად, ნანგრევებად ვაქცევ მას. არც ეს აღარ იქნება, სანამდე არ მოვა ის, ვისიც არის სამართალი — და გადავცემ მას.’

²⁸და შენ, ძეო კაცისავ! იწინასწარმეტყველე და თქვი: ‘ასე თქვა უფალმა ღმერთმა ყამონიანებზე და მათ შერცხვენაზე’ — და თქვი: ‘მახვილი, მახვილია გაშიშვლებული დასახოცავად, გაპრიალებულია ამოსაწყვეტად, რათა ელვასავით ელავდეს.

²⁹როდესაც წინასწარ გეუბნებოდნენ შენ ამაოს, გიმკითხავებდნენ სიცრუეს, რათა დადებულიყავი დახოცილ ბოროტმომქმედთა კისრებზე, რომელთა დღეც მოვიდა უკანასკნელი სასჯელის დროს.

³⁰ჩააბრუნე იგი თავის ქარქაშში. იმ ადგილას, სადაც შეიქმენი, შენი წარმოშობის ქვეყანაში განვსჯი.

³¹და გადმოვღვრი შენზე ჩემს რისხვას, ჩემი წყრომის ცეცხლს დავბერავ შენზე და მიგცემ შენ მძვინვარე, მკვლელობაში გაწაფულ ადამიანთა ხელთ.

³²ცეცხლის შესაჭმელი იქნები შენ, შენი სისხლი ქვეყნის შიგნით იქნება. არ გაგიხსენებენ, რადგან მე, უფალმა, ვთქვი.