Read ბიბლია ეზეკ. 29 Bible Online

ეზეკ. 29 - ბიბლია bible

ეზეკ. 29

¹მეათე წელს, მეათე თვის მეთორმეტე დღეს იყო სიტყვა უფლისა ჩემდამი:

²„ძეო კაცისავ! მიმართე პირი ეგვიპტის მეფის, ფარაონის, მიმართ, და იწინასწარმეტყველე მასზე და მთელ ეგვიპტეზე,

³ელაპარაკე და უთხარი: ‘ასე თქვა უფალმა ღმერთმა: აჰა, შენ წინააღმდეგ ვარ, ფარაონო, ეგვიპტის მეფევ, დიდო ნიანგო, გაწოლილო მის მდინარეთა შორის, რომელიც ამბობ: ჩემია ჩემი მდინარე და მე წარმოვშვი იგი.

⁴და მე გაგიყრი ჩანგლებს ყბებში და მოგაკრავ შენი მდინარეების თევზებს შენს ქერცლებზე, და ამოგიყვან შენი მდინარეებიდან ყველა შენი მდინარის თევზითურთ, რომელნიც შენს ქერცლებს მიეკრობიან,

⁵და დაგაგდებ უდაბნოში, შენ და ყველა თევზს შენი მდინარეებისა. გაშლილ ველზე დაეცემი შენ, არ შეიკრიბები და არ შეგროვდები, მიწის მხეცებს და ცის ფრინველთ მიგცემ შესაჭმელად.

⁶და გაიგებს ეგვიპტის ყველა მცხოვრები, რომ მე ვარ უფალი, რადგან ისინი ლერწმის საყრდენი იყვნენ ისრაელის სახლისთვის.

⁷როდესაც ისინი გიჭერდნენ შენ ხელით, ტყდებოდი და უპობდი მათ მთელ ფერდს. და როდესაც გეყრდნობოდნენ შენ, იმტვრეოდი და არყევდი მათ წელს.’

⁸ამიტომ ასე თქვა უფალმა ღმერთმა: ‘აჰა, მე მომაქვს შენზე მახვილი და მოვკვეთ შენგან ადამიანსა და საქონელს.

⁹და იქნება ეგვიპტის ქვეყანა აოხრებული და დანგრეული, და მიხვდებიან, რომ მე ვარ უფალი, თქვი: ‘ჩემია მდინარე და მე წარმოვშვი იგი!

¹⁰ამიტომ აჰა, შენს წინააღმდეგ ვარ და შენი მდინარეების წინააღმდეგ, და გავხდი ეგვიპტის ქვეყანას უდაბურად, უკაცრიელად, მიგდოლიდან სევენემდე და ქუშის საზღვრამდე.

¹¹არ გაივლის მასში ადამიანის ფეხი და საქონლის ფეხი არ გაივლის მასში, და არ დასახლდება ორმოც წელიწადს.

¹²და გავხდი ეგვიპტის ქვეყანას უკაცრიელად უკაცრიელ ქვეყნებს შორის და მისი ქალაქები უდაბურ ქალაქებს შორის უკაცრიელი იქნება ორმოც წელიწადს. და გავფანტავ ეგვიპტეს ხალხებში და გავაბნევ ქვეყნებში.’

¹³რადგან ასე თქვა უფალმა ღმერთმა: ‘ორმოცი წლის ბოლოს შევკრებ ეგვიპტეს ხალხებიდან, რომლებშიც გაიფანტნენ ისინი.

¹⁴და დავაბრუნებ ეგვიპტის ტყვეებს. და დავაბრუნებ მათ ფათროსის ქვეყანაში, მათი წარმოშობის ქვეყანაში, და იქნებიან იქ დამდაბლებულ სამეფოდ.

¹⁵სამეფოებს შორის იქნება დამდაბლებული და აღარ აღზევდება ხალხებზე, და მე შევამცირებ მათ, რათა არ იბატონონ ხალხებზე.

¹⁶და აღარ იქნება ისრაელის სახლისათვის იმედად, გამხსენებლად ურჯულოებისა, როდესაც მიმართავდნენ მას. და მიხვდებიან, რომ მე ვარ უფალი ღმერთი.’“

¹⁷ოცდამეშვიდე წელს, თვის პირველ დღეს, იყო სიტყვა უფლისა ჩემდამი:

¹⁸„ძეო კაცისავ! ნაბუქოდონოსორი, ბაბილონის მეფე, აშრომებდა თავის ლაშქარს დიდი შრომით ცორის წინააღმდეგ. ყველა ქაჩლდებოდა და ყველა ბეჭი ტყავდებოდა, მაგრამ გასამრჯელო არ ჰქონდა მას და მის ლაშქარს ცორიდან იმ შრომისათვის, რასაც შრომობდა მის წინააღმდეგ.

¹⁹ამიტომ ასე თქვა უფალმა ღმერთმა: ‘აჰა, მე ვაძლევ ნაბუქოდონოსორს, ბაბილონის მეფეს, ეგვიპტის ქვეყანას, და წაიღებს ის მის ქონებას, მიიტაცებს მის ნადავლს, და გაძარცვავს მას და ექნება გასამრჯელო მის ლაშქარს.

²⁰მისი შრომის გამო, რომელიც გასწია მან იქ, მივეცი მას ეგვიპტის ქვეყანა, რადგან მოქმედებდნენ ჩემთვის!“ — სიტყვა უფალი ღმერთისა. —

²¹„იმ დღეს აღმოვუცენებ რქას ისრაელის სახლს და მოგცემ შენ ბაგეხსნილობას მათ შორის. და მიხვდებიან, რომ მე ვარ უფალი!“