Read ბიბლია ეზეკ. 32 Bible Online

ეზეკ. 32 - ბიბლია bible

ეზეკ. 32

¹მეთორმეტე წელს, მეთორმეტე თვის პირველ დღეს იყო სიტყვა უფლისა ჩემდამი:

²„ძეო კაცისავ! წამოიწყე მოთქმა ფარაონზე, ეგვიპტის მეფეზე, და უთხარი მას: ‘ხალხთა ლომის ბოკვერს ჰგავდი, მაგრამ შენ ურჩხულივითა ხარ ზღვებში; და შენ მიაწყდი შენს მდინარეებს და აამღვრიე წყალი შენი ფეხებით, და აატალახე მათი მდინარენი.’

³ასე თქვა უფალმა ღმერთმა: ‘გავშლი შენზე ჩემს ბადეს მრავალი და ამოგიყვანენ ისინი ჩემი სათხევლით

⁴და მიგაგდებ ქვეყანაზე. მინდვრის პირას მიგატოვებ და დავაბინავებ შენზე ცის ყველა ფრინველს, და გავაძღობ შენით ქვეყნის ყველა ცხოველს.

⁵და დავყრი შენს ხორცს მთებზე და გავავსებ ხეობებს შენი გვამებით.

⁶მოვრწყავ ქვეყანას შენი სისხლით და კალაპოტები გაივსება შენით.

⁷და როდესაც ჩაქრები, მე დავფარავ ზეცას და დავაბნელებ მის ვარსკვლავებს. მზეს ღრუბლით დავფარავ და მთვარე არ გაანათებს თავისი ნათელით.

⁸სინათლის ყველა მანათებელს დაგიბნელებ ცაში და სიბნელეს დავამკვიდრებ შენს ქვეყანაზე!’ — სიტყვა უფალი ღმერთისა. —

⁹შევაშფოთებ ბევრი ხალხის გულს, როდესაც მივიტან შენს განადგურებას ხალხებში, ქვეყნებში, რომლებიც შენ არ იცი.

¹⁰და გავაოგნებ შენზე ბევრ ხალხს და მათი მეფენი შეძრწუნდებიან შენს გამო, როდესაც მოვიქნევ ჩემს მახვილს მათ წინაშე, და იკანკალებს ყოველ წამს თითოეული თავისი სიცოცხლისთვის დაცემის დღეს.’

¹¹რადგან ასე თქვა უფალმა ღმერთმა: ‘ბაბილონის მეფის მახვილი მოვა შენზე.

¹²მამაცთა მახვილით დავცემ შენს ურდოებს. ყველანი ისინი უსასტიკესნი არიან ხალხთა შორის, და გაძარცვავენ ეგვიპტის სიამაყეს და განადგურდება მთელი სიმრავლე მისი.

¹³მოვსპობ მთელს მის საქონელს ბევრ წყლებთან, და ადამიანის ფეხი აღარ აამღვრევს მათ მეტად და არც საქონლის ჩლიქები აამღვრევს მათ.

¹⁴მაშინ დავაფონებ მათ წყლებს და მათ მდინარეებს ზეთივით ვადინებ!’ — სიტყვა უფალი ღმერთისა. —

¹⁵‘როდესაც უდაბურად ვაქცევ ეგვიპტის ქვეყანას და დაცარიელდება ქვეყანა მისი სისავსისაგან, როდესაც განვგმირავ მასში ყველა მცხოვრებს, მიხვდებიან, რომ მე ვარ უფალი.

¹⁶გოდებაა ეს და გოდებენ მას ხალხთა ასულნი, გოდებენ, ეგვიპტესა და მის სიმრავლეზე გოდებენ მას,’“ — სიტყვა უფალი ღმერთისა.

¹⁷მეთორმეტე წელს, იმ თვის მეთხუთმეტე დღეს იყო სიტყვა უფლისა ჩემდამი:

¹⁸„ძეო კაცისავ! იგლოვე ეგვიპტის სიმრავლე, ჩაიყვანე იგი და ასულნი ძლიერი ხალხებისა ქვემო ქვეყანაში საფლავად ჩასულებთან.

¹⁹ვის სჯობიხარ? ჩადი და დაწექი წინადაუცვეთელებთან.

²⁰მახვილით დახოცილთა შორის დაეცემიან ისინი. მიცემულია მახვილს. წამოათრიეს ის და მთელი მისი სიმრავლე.

²¹ილაპარაკებენ უძლიერესნი ძლიერთა შორის შავეთიდან მასზე და მის შემწეებზე: ჩავიდნენ, დაწვნენ, წინადაუცვეთელნი, მახვილით დახოცილნი!

²²იქაა აშური და მთელი მისი კრებული, მის ირგვლივ მისი საფლავებია, ყველანი დახოცილნი არიან, მახვილით დაცემულნი.

²³რომელთაც მისცეს საფლავები ორმოთა კიდეებში და იყო მისი კრებული მისი საფლავების ირგვლივ. ყველანი დახოცილნი არიან, მახვილით დაცემულნი, რომელნიც შიშის ზარს ჰგვრიდნენ ცოცხალთა ქვეყანას.

²⁴იქაა ყელამი და მთელი მისი სიმრავლე — მისი საფლავების ირგვლივაა. ყველანი დახოცილნი არიან, მახვილით დაცემულნი, წინადაუცვეთელებთან რომ ჩავიდნენ ქვემო ქვეყანაში, შიშის ზარს რომ ჰგვრიდნენ ცოცხალთა ქვეყანას და ატარეს თავიანთი შერცხვენა ჩასულებთან ერთად.

²⁵დახოცილთა შორის მისცეს მას საწოლი, მთელ მის სიმრავლეს, მის ირგვლივ იყო მისი საფლავები, ყველანი წინადაუცვეთელნი იყვნენ, მახვილით დახოცილნი, რადგან შიშისზარი იყო მოგვრილი მათგან ცოცხალთა ქვეყანაში და ატარეს თავიანთი შერცხვენა საფლავში ჩასულებთან ერთად. დახოცილთა შორის მიეცა იგი.

²⁶იქ არიან მეშექი, თუბალი და მთელი მისი სიმრავლე. მის ირგვლივაა მისი საფლავები, ყველანი წინადაუცვეთელნი არიან, მახვილით დახოცილნი, რადგან შიშისზარი იყო მოგვრილი მათგან ცოცხალთა ქვეყანაში.

²⁷და არ დაწვებიან ისინი ძლიერებთან, წინადაუცვეთელთაგან დაცემულებთან, რომელნიც ჩავიდნენ შავეთში თავიანთი საომარი იარაღით და თავქვეშ ამოიდეს თავიანთი მახვილები და მათ ძვლებზე იყო მათი ურჯულოება, რადგან ძლიერთა შიშისზარი იყო ცოცხალთა ქვეყანაში.

²⁸და შენ წინადაუცვეთელთა შორის დაილეწები და მახვილით დახოცილებთან დაწვები.

²⁹იქაა ედომი, მისი მეფენი და ყველა მისი მთავარნი, რომელნიც თავიანთი ძლიერებით მიცემულნი არიან მახვილით დახოცილებთან. ისინი წინადაუცვეთელებთან და საფლავში ჩასულებთან დაწვებიან.

³⁰იქ არიან უფლისწულნი ჩრდილოეთისა, ყველანი, და ყველა ციდონელი, რომელნიც ჩავიდნენ დახოცილებთან ერთად, შერცხვენილნი თავიანთი ზარდამცემი ძლიერების გამო. დაწვნენ ისინი, წინადაუცვეთელნი, მახვილით დახოცილებთან და ატარეს თავიანთი სირცხვილი საფლავში ჩასულებთან.

³¹მათ იხილავს ფარაონი და ნუგეშცემული იქნება მთელი მისი სიმრავლის გამო — მახვილით დახოცილნი, ფარაონი და მთელი მისი ლაშქარი!’ — სიტყვა უფალი ღმერთისა. —

³²‘რადგან მე მოვგვარე შიშისზარი ცოცხალთა ქვეყანას, დაწვება ის წინადაუცვეთელთა შორის მახვილით დახოცილებთან, ფარაონი და მთელი მისი სიმრავლე!’ სიტყვა უფალი ღმერთისა.“