Read ბიბლია ეზეკ. 35 Bible Online

ეზეკ. 35 - ბიბლია bible

ეზეკ. 35

¹და იყო სიტყვა უფლისა ჩემდამი:

²„ძეო კაცისავ! მიმართე შენი პირი სეყირის მთას და იწინასწარმეტყველე მასზე.

³და უთხარი მას: ასე თქვა უფალმა ღმერთმა: ‘აჰა, შენს წინააღმდეგ ვარ, სეყირის მთავ, და გამოვიწვდენ ჩემს ხელს შენს წინააღმდეგ და გაქცევ ოხრად და ტიალად

⁴შენს ქალაქებს ნანგრევებად ვაქცევ და გატიალდები და მიხვდებით, რომ მე ვარ უფალი.

⁵იმის გამო, რომ შენ საუკუნო მტრობა გქონდა და მახვილს გადასცემდი ისრაელის ძეთ მათი უბედურების ჟამს, უკანასკნელი ურჯულოების ჟამს,

⁶ამიტომ, ცოცხალი ვარ მე,’ — სიტყვა უფალი ღმერთისა, — ‘სისხლად გაგცევ და სისხლი დაგედევნება. სისხლი არ გძულდა და სისხლი დაგედევნება შენ.

⁷და ვაქცევ სეყირის მთას ოხრად და ტიალად, და მოვკვეთ მისგან გამვლელსა და გამომვლელს.

⁸და გავავსებ მის მთებს დახოცილებით. შენს ბორცვებზე და შენს ხეობებში, და შენს ყველა კალაპოტში, მახვილით დახოცილები დაეცემიან.

⁹საუკუნო ოხრებას მიგცემ შენ და შენი ქალაქები არ დასახლდებიან, და მიხვდებით, რომ მე ვარ უფალი.

¹⁰იმის გამო, რომ ამბობდი შენ: ‘ეს ორი ხალხი და ეს ორი ქვეყანა ჩემი იქნება და ჩვენ დავიმკვიდრებთ მათ!’ უფალი კი იქ იყო.

¹¹ამიტომ, ცოცხალი ვარ მე!“ — სიტყვა უფალი ღმერთისა, — ‘და მოგექცევი შენი რისხვისამებრ და შენი შურისამებრ, როგორც მოექეცი მათ შენი სიძულვილისამებრ და გამოვეცხადები მათ, როდესაც განგსჯი შენ.

¹²და მიხვდები, რომ მე, უფალმა, მოვისმინე ყველა შენი ლანძღვა, რომელიც წარმოთქვი ისრაელის მთების მიმართ: აოხრდნენ ისინი, ჩვენ მოგვეცა შესაჭმელად!

¹³და მედიდურობდით ჩემს წინააღმდეგ თქვენი პირით და ამრავლებდით სიტყვებს ჩემს წინააღმდეგ, მე მოვისმინე.

¹⁴ასე თქვა უფალმა ღმერთმა: როდესაც გაიხარებს მთელი ქვეყანა, უდაბურად გაქცევ შენ.

¹⁵როგორც ხარობდი შენ ისრაელის სახლის სამკვიდროს გაუდაბურებაზე, ისე მოგექცევი შენ: გაუდაბურდები, სეყირის მთავ და მთელო ედომო მთლიანად, და მიხვდებიან, რომ მე ვარ უფალი.“