Read ბიბლია ეზეკ. 40 Bible Online

ეზეკ. 40 - ბიბლია bible

ეზეკ. 40

¹ოცდამეხუთე წელს ჩვენი განდევნისა, წლის დასაწყისში, თვის მეათე დღეს, მეთოთხმეტე წელს ქალაქის დაცემის შემდეგ, ზუსტად იმ დღეს იყო ჩემზე ხელი უფლისა და მიმიყვანა მე იქ.

²ღმერთის ჩვენებებში მომიყვანა მე ისრაელის ქვეყანაზე და დამსვა ძალიან მაღალ მთაზე და მასზე იყო ქალაქის მსგავსი ნაშენები, სამხრეთის მხრიდან.

³და მიმიყვანა იქ და ვნახე კაცი, რომლის შესახედაობა სპილენძისავით იყო და ხელში საზომი ლერწამი ჰქონდა და იდგა იგი კარიბჭეში.

⁴და მელაპარაკა ის კაცი: „ძეო კაცისავ! ნახე შენი თვალით და შენი ყურით მოისმინე და შენი გული დაუდე ყოველივეს, რასაც მე გიჩვენებ, რადგან მოყვანილი ხარ აქ, იმისათვის, რომ გიჩვენო. ყოველივე, რასაც შენ ნახავ, უთხრა ისრაელის სახლს.

⁵აჰა, გალავანი სახლის ირგვლივ გარედან და იმ კაცის ხელთ საზომი ლერწამი ექვსი წყრთისა, წყრთაში — წყრთა და მტკაველი. და გაზომა სიგანე ამ შენობისა — ერთი ლერწამი და სიმაღლე — ერთი ლერწამი.

⁶და მივიდა კარიბჭესთან, რომელიც აღმოსავლეთის გზისაკენ იყო მიმართული, და ავიდა მის საფეხურებზე და გაზომა კარიბჭის ზღურბლი: ერთი ლერწამი სიგანე და მეორე ზღურბლი: ერთი ლერწამი სიგანე.

⁷და ოთახი — ერთი ლერწამი სიგრძე და ერთი ლერწამი სიგანე, და ოთახებს შორის — ხუთი წყრთა, და კარიბჭის ზღურბლი, რომელიც ჭიშკრის დარბაზის ახლოს იყო, შიგნით — ერთი ლერწამი.

⁸და გაზომა კარიბჭის დარბაზი შიგნით — ერთი ლერწამი.

⁹და გაზომა კარიბჭის დარბაზი — რვა წყრთა და მისი სვეტები — ორი წყრთა და ჭიშკრის დარბაზი შიგნით.

¹⁰და კარიბჭის ოთახი აღმოსავლეთის გზიდან: სამი — ერთ მხარეს და სამი — მეორე მხარეს. ერთი ზომა ჰქონდათ სამივეს, და ერთი ზომა სვეტებს ორივე მხრიდან.

¹¹და გაზომა სიგანე კარიბჭის შესასვლელისა — ათი წყრთა. სიგრძე კარიბჭისა — ცამეტი წყრთა,

¹²და საზღვარი ოთახების წინ — ერთი წყრთა და ერთი წყრთაც იქიდან, და ოთახი — ექვსი წყრთა ერთი მხრიდან და ექვსი წყრთა — მეორე მხრიდან.

¹³და გაზომა მან ის კარიბჭე ერთი ოთახის სახურავიდან მეორის სახურავამდე; სიგანე — ოცდახუთი წყრთა, შესასვლელი შესასვლელის პირდაპირ იყო.

¹⁴და გაზომა მან სვეტები და კარიბჭის ეზოს სვეტისა: სამოცი წყრთა ირგვლივ.

¹⁵და შემოსასვლელის კარიბჭის წინა ნაწილიდან შიგნითა კარიბჭის დარბაზის წინა ნაწილამდე — ორმოცდაათი წყრთა.

¹⁶და სარკმელნი დახშულნი ოთახებსა და მათ სვეტებში კარიბჭის შიგნით ირგვლივ და ასევე დარბაზები, სარკმელნი ყოველი მხრიდან შიგნით და სვეტებზე — პალმები.

¹⁷და მიმიყვანა მე გარეთა ეზოში და ვნახე ოთახები და ქვაფენილი, დაგებული ეზოს ირგვლივ, ოცდაათი ოთახი ამ ქვაფენილზე.

¹⁸და ეს ქვაფენილი კარიბჭის გვერდებზე კარიბჭის სიგრძის შესაბამისად; ეს იყო ქვემო ქვაფენილი.

¹⁹და მან გაზომა სიგანე ქვემო კარიბჭის წინიდან შიგნითა ეზოს გარეთა მხარემდე: ასი წყრთა აღმოსავლეთით და ჩრდილოეთით.

²⁰გაზომა კარიბჭე გარეთა ეზოსი, რომელიც ჩრდილოეთის გზისკენაა მიმართული, მისი სიგრძე და სიგანე.

²¹და მისი ოთახები — სამი ერთი მხრიდან და სამი მეორე მხრიდან. სამი სვეტი და მისი დარბაზები იმავე ზომისა იყო, რაც პირველი კარიბჭისა, ორმოცდაათი წყრთა იყო მათი სიგრძე და ოცდახუთი წყრთა — მათი სიგანე.

²²და მისი სარკმელნი, დარბაზები და პალმები იმ ჭიშკრის ზომისა იყო, რომელიც აღმოსავლეთის გზისკენ იყო მიმართული და შვიდი საფეხურით ადიოდნენ მასზე, და მათი დარბაზნი მათ წინაშე.

²³და იყო კარიბჭე შიგნითა ეზოსი ჩრდილო კარიბჭის, ასევე აღმოსავლეთის პირისპირ. და გადაზომა ჭიშკრიდან ჭიშკრამდე ასი წყრთა.

²⁴და წამიყვანა მან სამხრეთის გზაზე და ვნახე კარიბჭე სამხრეთის გზისა. და გაზომა მისი სვეტები და მისი დარბაზები — იგივე ზომები, რაც სხვა კარიბჭეებს ჰქონდათ.

²⁵და ჰქონდა სარკმელნი მას და მის დარბაზებს ირგვლივ, იმ სარკმელთა მსგავსი. ორმოცდაათი წყრთა სიგრძე და სიგანე ოცდახუთი წყრთა,

²⁶შვიდი საფეხური იყო მასზე ასასვლელი და მათი დარბაზები მათ წინაშე და პალმები — ერთი ერთი მხრიდან და ერთი მეორე მხრიდან, მის სვეტებზე.

²⁷და იყო კარიბჭე შიგნითა ეზოსი სამხრეთის გზისაკენ. და გადაზომა იმ კარიბჭიდან მეორე კარიბჭემდე სამხრეთის გზისაკენ — სულ ასი წყრთა.

²⁸და შემიყვანა სამხრეთის კარიბჭით შიგნითა ეზოში, და გაზომა სამხრეთის კარიბჭე — იგივე ზომები, რაც სხვა კარიბჭეებისა.

²⁹და მისი ოთახები, მისი სვეტები და მისი დარბაზები, იმავე ზომისა იყო. და ჰქონდა სარკმელები მას და მის დარბაზებს ირგვლივ, ორმოცდაათი წყრთა იყო სიგრძე და სიგანე — ოცდახუთი წყრთა.

³⁰და დარბაზები ეზოს ირგვლივ — სიგრძე ოცდახუთი წყრთა და სიგანე ხუთი წყრთა.

³¹მისი დარბაზები გადიოდა გარეთა ეზოსაკენ; და პალმები იყო დახატული მის სვეტებზე და რვა საფეხური იყო მასზე ასასვლელი.

³²და შემიყვანა აღმოსავლეთის კარიბჭით შიგნითა ეზოში და გაზომა ის კარიბჭე — იგივე ზომები, რაც სხვა კარიბჭეებისა.

³³მისი ოთახები, მისი სვეტები და მისი დარბაზები იმავე ზომისა იყო. და სარკმელები მისი დარბაზების ირგვლივ — სიგრძე ორმოცდაათი წყრთა და სიგანე ოცდახუთი წყრთა.

³⁴მისი დარბაზები გადიოდა გარეთა კარიბჭისაკენ. და მისი სვეტები პალმებით იყო მოხატულნი ორივე მხრიდან და რვა საფეხური ჰქონდა მასზე ასასვლელი.

³⁵მომიყვანა მე ჩრდილოეთის კარიბჭესთან და გაზომა — იგივე ზომები იყო.

³⁶მისი ოთახები, მისი სვეტები, მისი დარბაზები და სარკმელნი მის გარშემო იყო — სიგრძით ორმოცდაათი წყრთა და სიგანით ოცდახუთი წყრთა.

³⁷მისი სვეტები მიმართული იყო გარეთა ეზოსაკენ. ისინი პალმებით იყო მოხატული ორივე მხრიდან და რვა საფეხური ჰქონდათ ასასვლელი.

³⁸და სენაკი და მასში შესასვლელი იყო კარიბჭეთა სვეტებთან. იქ ასუფთავებდნენ სრულადდასაწველს.

³⁹და კარიბჭის დარბაზში იყო ორი მაგიდა ერთი მხრიდან და ორი მაგიდა მეორე მხრიდან, რათა დაეკლათ მათზე სრულადდასაწველი და ცოდვის შესაწირავი და დანაშაულის შესაწირავი.

⁴⁰და გვერდით, გარედან, ჩრდილო კარიბჭის შესასვლელში ასასვლელთან იდგა ორი მაგიდა, და ასევე მეორე გვერდზე, რომელიც კარიბჭის დარბაზს ჰქონდა, იყო ორი მაგიდა.

⁴¹ოთხი მაგიდა ერთი მხრიდან და ოთხი მაგიდა მეორე მხრიდან კარიბჭის გვერდით — სულ რვა მაგიდა, რომლებზეც უნდა დაეკლათ მსხვერპლი.

⁴²და ოთხი მაგიდა სრულადდასაწველისათვის გამოთლილი ქვისაგან. სიგრძე ერთნახევარი წყრთა, სიგანე ერთნახევარი წყრთა და სიმაღლე ერთი წყრთა. მასზე აწყობდნენ იარაღს, რომლითაც უნდა დაეკლათ სრულადდასაწველი და სხვა მსხვერპლი.

⁴³და ორმაგი კაუჭები, ერთი მტკაველი სიგრძისა, მიმაგრებული იყო სახლზე ირგვლივ. მაგიდებზე კი სამსხვერპლო ხორცი ეწყო.

⁴⁴შიგნითა კარიბჭის გარედან იყო მომღერალთა ოთახები შიგნითა ეზოში, ჩრდილო კარიბჭის მხარეს, სამხრეთისკენ მიქცეული, და ერთი აღმოსავლეთის კარიბჭის მხარეს, ჩრდილოეთისკენ მიქცეული.

⁴⁵და მითხრა მან: ‘ეს ოთახი, რომელიც სამხრეთისკენ არის მიქცეული მღვდლებისათვისაა, რომლებიც სახლის სამსახურს ეწევიან. ოთახნი მომღერლებისა და მღვდლებისათვის

⁴⁶და სენაკი, რომელიც ჩრდილოეთისკენ იყო მიქცეული, მღვდლებისთვის იყო განკუთვნილი, რომლებიც სამსხვერპლოს სამსახურს ეწევიან. ისინი ცადოკის ძენი იყვნენ, ლევის ძეთაგან, უფალთან ახლოს მყოფნი მის სამსახურად.’

⁴⁷და გადაზომა მან ოთხკუთხედი ეზო: სიგრძე ასი წყრთა და სიგანე ასი წყრთა. სამსხვერპლო სახლის წინ იყო.

⁴⁸და მიმიყვანა სახლის დარბაზში და გადაზომა დარბაზის სვეტები: ხუთი წყრთა ერთი მხრიდან და ხუთი წყრთა მეორე მხრიდან. და კარიბჭის სიგანე სამი წყრთა ერთი მხრიდან და სამი წყრთა მეორე მხრიდან.

⁴⁹დარბაზის სიგრძე იყო ოცი წყრთა და სიგანე თერთმეტი წყრთა; და ჰქონდათ საფეხურები, რომლითაც მასზე ადიოდნენ, და საყრდენები სვეტებთან, ერთი ერთი მხრიდან და ერთი მეორე მხრიდან.