Read ბიბლია ეზეკ. 42 Bible Online

ეზეკ. 42 - ბიბლია bible

ეზეკ. 42

¹გამიყვანა მე გარეთა ეზოში ჩრდილოეთის გზით და მომიყვანა სენაკთან, რომელიც ტაძრის დარბაზის მოპირდაპირედ და ჩრდილოეთისაკენ მიქცეული შენობის პირისპირ იყო.

²ჩრდილოეთის შესასვლელის წინა მხარის სიგრძე ასი წყრთა იყო, სიგანე ორმოცდაათი წყრთა.

³ოც წყრთაზე შიგნითა ეზოში და ქვაფენილის გასწვრივ, გარეთა ეზოში, დერეფანი დერეფნის პირისპირ იყო სამ სართულზე.

⁴და სენაკთა წინ გასავლელი ათი წყრთა სიგანისა ეზოს შიგნით, გზა ერთი წყრთა და მათი შესასვლელები ჩრდილოეთით.

⁵ზედა სენაკები იყო მოკლე, რადგან დერეფნებს მათგან უფრო მეტი ადგილი ეჭირათ, ვიდრე ქვემო და შუა სართულებს შენობისას,

⁶რადგან სამსართულიანები იყო ისინი და არ ჰქონდათ სვეტები, მსგავსი ეზოს სვეტებისა, და ამის გამო დაშორებული იყო ქვემო და შუა სართულებს ნიადაგიდან.

⁷და ზღუდე, რომელიც გარედან იყო სენაკთა პირისპირ გარეთა ეზოსკენ. მისი სიგრძე — ორმოცდაათი წყრთა,

⁸რადგან სენაკთა სიგრძე, რომლებიც გარეთა ეზოში იყო, ორმოცდაათი წყრთა იყო, ხოლო ტაძრის პირდაპირ — ასი წყრთა.

⁹ამ სენაკთა ქვევით იყო შემოსასვლელი აღმოსავლეთით, გარეთა ეზოდან შესასვლელად.

¹⁰ეზოს ზღუდის სიგანეზე აღმოსავლეთით ტაძრის დარბაზის პირდაპირ და შენობის პირდაპირ სენაკები იყო.

¹¹გზა მათ წინ იყო მსგავსი იმ სენაკებისა, რომლებიც ჩრდილოეთის გზაზე იყო: სიგრძით, სიგანით, და ყველა მათი შესასვლელ-გამოსასვლელით,

¹²და როგორიც იყო შესასვლელები სენაკებისა, რომლებიც სამხრეთის გზაზეა, ისეთივე შესასვლელი იყო გზის დასაწყისში. გზა ამბიონის ზღუდის წინ აღმოსავლეთით მათში შესასვლელად.

¹³და მითხრა მან: ‘ჩრდილოეთის სენაკები, სამხრეთის სენაკები, რომლებიც ტაძრის დარბაზის წინაა, წმიდა სენაკებია, სადაც მღვდლები ჭამენ, რომელნიც წმიდათა წმიდის უფალს უახლოვდებიან. იქ ინახავენ წმიდათა წმიდას და ძღვენს და ცოდვის შესაწირავს და დანაშაულის შესაწირავს, რადგან წმიდაა ეს ადგილი.

¹⁴როდესაც მოდიან მღვდლები, არ გადიან ისინი წმიდიდან გარეთა ეზოში და აქ აწყობენ თავიანთ სამოსელს, რომლითაც მსახურობენ, რადგან წმიდაა ისინი, და იცვამენ ისინი სხვა სამოსელს და მერე უახლოვდებიან იმას, რაც ხალხისთვის არის.“

¹⁵დაასრულა მან შიგნითა სახლის გაზომვა და გამომიყვანა კარიბჭის გზით, რომელიც აღმოსავლეთითაა მიმართული, და გაზომა ის ირგვლივ.

¹⁶და გაზომა აღმოსავლეთის მხარე ლერწმის საზომით: ირგვლივ ხუთასი ლერწამი.

¹⁷გაზომა ჩრდილოეთის მხარე: ხუთასი ლერწამი საზომი ლერწმით, ირგვლივ.

¹⁸სამხრეთის მხარე გაზომა: ხუთასი ლერწამი საზომი ლერწმით.

¹⁹მიტრიალდა ზღვის მხარეს, გაზომა ხუთასი ლერწამი საზომი ლერწმით.

²⁰ოთხივ კუთხით გაზომა მან იგი, გალავანი მის ირგვლივ, სიგრძე — ხუთასი და სიგანე — ხუთასი, რათა გამოეცალკევებინა ერთმანეთისგან წმიდა და სადაგი.