Read ბიბლია ეზეკ. 44 Bible Online

ეზეკ. 44 - ბიბლია bible

ეზეკ. 44

¹და დამაბრუნა მან საწმიდრის აღმოსავლეთისაკენ მიქცეული გარეთა კარიბჭის გზით და დახშული იყო იგი.

²და მითხრა მე უფალმა: ‘ეს კარიბჭე დახშული იქნება, არ გაიღება და კაცი არ შევა მასში, რადგან ისრაელის უფალი ღმერთი შევიდა მასში. და იქნება იგი დახშული.

³მთავარი კი — იგი იჯდება ვით მთავარი, რათა ჭამოს პური უფლის წინაშე. დარბაზის გზით მოვა და იმავე გზით წავა.

⁴და მომიყვანა მან ჩრდილოეთის კარიბჭის გზით სახლის წინ და დავინახე, რომ უფლის დიდებამ გაავსო ტაძარი უფლისა. და პირქვე დავემხე.

⁵და მითხრა უფალმა: „ძეო კაცისავ! დაუდე შენი გული და დაინახე შენი თვალებით, და გაიგონე შენი ყურებით ყოველივე, რასაც გეუბნები უფლის სახლის ყველა წესზე და მის რჯულზე, და დაუდე გული შენი ტაძარში შესასვლელს, საწმიდრის ყველა გასასვლელს.

⁶და ეტყვი ისრაელის მეამბოხე სახლს: ‘ასე თქვა უფალმა ღმერთმა: გეყოფათ თქვენ მთელი თქვენი სისაძაგლენი, სახლო ისრაელისა!

⁷როდესაც მოგყავდათ უცხოტომელნი წინადაუცვეთელნი გულით და ხორცით, რათა ყოფილიყვნენ ისინი ჩემს საწმიდარში, რომ შეებღალათ ჩემი სახლი, როდესაც მსხვერპლად მოგქონდათ ჩემი პური, ქონი და სისხლი და არღვევდით ჩემს აღთქმას მთელი თქვენი სისაძაგლეებით,

⁸არ ასრულებდით მოვალეობას ჩემს სიწმიდეთა მიმართ და მათ აყენებდით ჩემი საწმიდრის მოვალეობის აღმსრულებლებად.’

⁹და თქვა უფალმა ღმერთმა: ‘არც ერთი უცხოელი, რომელიც ისრაელის ძეთა შორის ცხოვრობს წინადაუცვეთელი გულითა და წინადაუცვეთელი ხორცით, არ შემოვა ჩემს საწმიდარში.

¹⁰რადგან ლევიანები, რომელნიც მომშორდნენ ისრაელის განდგომისას, რომელნიც განდგნენ ჩემგან და მიჰყვებოდნენ უკან თავიანთ კერპებს, იტვირთავენ სასჯელს თავიანთი ურჯულოების გამო.

¹¹და იქნებიან ისინი ჩემს საწმიდარში აღმსრულებლებად, ტაძრის კარიბჭეთა ზედამხედველებად და ტაძრის სამსახურის აღმსრულებლებად. ისინი დაკლავენ სრულადდასაწველს და მსხვერპლს ერისათვის და იდგებიან მათ წინაშე, რათა მოემსახურონ მათ.

¹²რადგან ისინი ემსახურებოდნენ მათ თავიანთი კერპების წინაშე და იყვნენ ისრაელის სახლისათვის დაბრკოლებად ურჯულოებისა, ამის გამო მე ავწიე ხელი მათზე!’ — სიტყვა უფალი ღმერთისა, — ‘და იტვირთავენ ისინი თავიანთ ცოდვებს.’

¹³ვერ მომეახლებიან ისინი, რომ მღვდლობა გამიწიონ და მიეახლონ ყოველ ჩემს სიწმიდეს, ჩემს წმიდათა წმიდას, და იტვირთავენ თავიანთ სირცხვილს და თავიანთ სისაძაგლეს, რომელიც ჩაიდინეს.

¹⁴და დავაყენებ მათ სახლში მოვალეობის აღმსრულებლებად ყველა მისი სამსახურისა და ყველაფრისა, რაც მასში სრულდება.

¹⁵მღვდლები კი — ლევიანები, ცადოკის ძენი, რომელნიც ასრულებდნენ ჩემი საწმიდრის მოვალეობას, როდესაც განდგნენ ისრაელის ძენი ჩემგან, მომიახლოვდნენ მე, რათა მემსახურონ და იდგნენ ჩემს წინაშე, რათა შემომწირონ მე ქონი და სისხლი!“ — სიტყვა უფალი ღმერთისა. —

¹⁶„ისინი შემოვლენ ჩემს საწმიდარში და ისინი მოუახლოვდებიან ჩემს ტაბლას, რათა მემსახურონ მე და აღმისრულონ მოვალეობა.

¹⁷და როდესაც შევლენ შიგნითა ეზოს კარიბჭეში, ჩაიცვამენ სელის სამოსელს და არ იქნება მათზე მატყლი სამსახურისას შიგნითა ეზოს კარიბჭეში და სახლში.

¹⁸სელის კიდარი იქნება მათ თავზე და სელის წვივის სამოსელი იქნება მათ წელზე და არ შემოირტყამენ გამაოფლიანებელს.

¹⁹და როდესაც გამოვლენ გარეთა ეზოში ხალხთან, გაიხდიან თავიანთ სამოსელს, რომლითაც ისინი მსახურობენ, და დააწყობენ მათ წმიდას სენაკებში, და ჩაიცვამენ სხვა სამოსელს, რათა არ გადასდონ სიწმიდე ხალხს თავიანთი სამოსლით.

²⁰და თავს არ გადაიპარსავენ, ქოჩორს არ დაიგრძელებენ და გაიკრეჭენ თავებს.

²¹და ღვინოს არ დალევს არც ერთი მღვდელი შიგნითა ეზოში შესვლისას.

²²ქვრივი და ქმარგანაშვები არ უნდა შეირთონ ცოლად, არამედ მხოლოდ ქალწულნი ისრაელის სახლის თესლიდან და ქვრივი, რომელიც მღვდლისგან იქნება დაქვრივებული.

²³ჩემს ერს ასწავლონ გარჩევა წმიდისა და სადაგისა და განსხვავება უსუფთაოსა და სუფთას შორის აუწყონ მათ.

²⁴როცა დავის დროს დადგებიან განსასჯელად, ჩემი სამართლით განსაჯონ, და ჩემი რჯული და ჩემი წესები ჩემს ყველა დღესასწაულზე დაიცვან და ჩემი შაბათები წმიდაჰყონ.

²⁵მკვდარ კაცთან არ მივიდნენ, რათა არ შეიბილწონ, არამედ მხოლოდ მამასთან და დედასთან, და ძესთან და ასულთან, ძმასთან და იმ კაცგაუკარებელ დასთან — ამათთან შეიძლება შეიბილწონ.

²⁶და მისი განწმედის შემდეგ შვიდ დღეს გადაუთვლიან მას.

²⁷და იმ დღეს, როდესაც შევა ის წმიდაში, შიგნითა ეზოში, რათა იმსახუროს წმიდაში, შესწირავს იგი თავისი ცოდვის მსხვერპლს,“ — სიტყვა უფალი ღმერთისა. —

²⁸‘და ექნებათ მათ სამკვიდრებლად, რომ მე ვარ მათი სამკვიდრებელი; და საკუთრებას ნუ მისცემთ მათ ისრაელში, რადგან მე ვარ მათი საკუთრება.

²⁹ძღვენი და მსხვერპლი ცოდვისა და დანაშაულისა ჭამონ, და ყოველი დარისხებული ისრაელში მათი იქნება.

³⁰და ნათავარი ყოველი პირველნაყოფისგან და შეწირულებისგან, ყოველი თქვენი აღსამართისგან — მღვდელთათვის იქნება და ნათავარს თქვენი ცომეულისაგან მისცემთ მღვდლებს, რათა გადმოვიდეს კურთხევა თქვენს სახლზე.

³¹არავითარი მძორი და ნამხეცავი ფრინველისგან და პირუტყვისგან არ ჭამონ მღვდლებმა.“