Read ბიბლია ეზეკ. 45 Bible Online

ეზეკ. 45 - ბიბლია bible

ეზეკ. 45

¹„და როდესაც გაინაწილებთ ქვეყანას სამემკვიდრეოდ, შესწირეთ შესაწირავი უფალს, წმიდა ნაწილი მიწიდან, სიგრძე ოცდახუთი ათასი და სიგანე ათი ათასი. წმიდა იქნება იგი მთელ მის საზღვრებში ირგვლივ.

²იქიდან წმიდისა იქნება ხუთასი ხუთასზე — ოთხკუთხედი ირგვლივ და ორმოცდაათი წყრთა — მოედანი მის ირგვლივ.

³და ამ ზომიდან გადაზომავ სიგრძეს ოცდახუთ ათასს და სიგანეს ათი ათასს, და იქ იქნება საწმიდარი, წმიდათა წმიდა.

⁴წმიდა ნაწილი ამ მიწისა იქნება საწმიდრის მომსახურე მღვდლებისთვის, რომელნიც მიახლოვებულნი არიან, რომ ემსახურონ უფალს. და იქნება ის მათთვის ადგილი მათი სახლებისათვის და წმიდა ადგილი საწმიდრისათვის.

⁵და ოცდახუთი ათასი სიგრძე და ათი ათასი სიგანე იქნება სახლში მომსახურე ლევიანთათვის საკუთრებად — ოცი სენაკი.

⁶და ქალაქის საკუთრებად გაეცით: ხუთი ათასი სიგანით და სიგრძით ოცდახუთი ათასი წმიდის შესაწირავის პირდაპირ — მთელი ისრაელის სახლისათვის იქნება.

⁷და მთავრისათვის გაეცით წილი თითოეული მხრიდან წმიდას შესაწირავისა, და ქალაქის საკუთრებისაგან წმიდის შესაწირავის წინ და ქალაქის საკუთრების წინ ზღვის მხრიდან ზღვისაკენ და აღმოსავლეთის მხრიდან აღმოსავლეთით. და სიგრძე მისი თანაბარი იქნება ერთი ნაწილისა დასავლეთის საზღვრიდან აღმოსავლეთის საზღვრამდე.

⁸მის ქვეყნად იგი იქნება საკუთრებად ისრაელში და აღარ დაჩაგრავენ მთავარნი ჩემს ერს, და ქვეყანას მისცემენ ისრაელის სახლს, მათი ტომების მიხედვით.

⁹ასე თქვა უფალმა ღმერთმა: ‘საკმარისია თქვენთვის, ისრაელის მთავარნო! მოაშორეთ ძალადობა და ძარცვა, და სამართალი და სიმართლე ჰქენით, შეუწყვიტეთ გაძევებანი ჩემს ერს!’ — სიტყვა უფალი ღმერთისა. —

¹⁰‘მართალი სასწორი, მართალი ეფა და მართალი ბათი გქონდეთ თქვენ.

¹¹ეფა და ბათი ერთი ზომისა იყოს, რათა ჩაეტიოს ხომერის მეათედი ბათში და მეათედი ხომერისა საწყაულში. ხომერის მიხედვით იქნება მათი ზომა.

¹²და შეკელი — ოცი გერა. ოცი შეკელი, ოცდახუთი შეკელი და თხუთმეტი შეკელი იქნება თქვენთან ერთი მნა.

¹³ესაა შესაწირავი, რომელსაც შესწირავთ: მეექვსედს ეფასი ხორბლის ხომერიდან და მეექვსედს ეფასი ქერის ხომერიდან.

¹⁴და წესი ზეთისა: ზეთის ზომა ქორია, ქორის მეათედი ხომერიდან, მეათედი ქორისა ხომერია, რადგან ათი ქორია ხომერში.

¹⁵ერთი კრავი ყოველი ორასი ცხვრიდან, ისრაელის ნოყიერი საძოვრებიდან, ძღვნად და სრულადდასაწველ და სამშვიდობო შესაწირავად, რათა მიეტევოთ მათ,’ — სიტყვა უფალი ღმერთისა. —

¹⁶‘ქვეყნის მთელმა ერმა უნდა მიუტანოს ეს შესაწირავი მთავარს ისრაელში.

¹⁷მთავარზე იქნება სრულადდასაწველნი და ძღვენი და საღვრელები დღესასწაულებში, ახალ მთვარობებში და შაბათებში. ისრაელის სახლის ყველა ზეიმებზე შეასრულებს ის ცოდვის შესაწირავს და ძღვენს, და სრულადდასაწველს და სამშვიდობოს, რათა მიეტევოს ისრაელის სახლს.’

¹⁸და თქვა უფალმა ღმერთმა: ‘პირველი თვის პირველ დღეს აიღებ უნაკლო მოზვერს და გაწმედ ცოდვისგან საწმიდარს.

¹⁹აიღებს მღვდელი ცოდვის შესაწირავის სისხლისაგან და აპკურებს სახლის წირთხლს და სამსხვერპლოს შვერილის ოთხივე კუთხეს და შიგნითა ეზოს კარიბჭის წირთხლს.

²⁰ასე გააკეთებს თვის მეშვიდე დღეს ყველასთვის, ვინც შესცოდავს უნებურად ან გულუბრყვილოდ, და ასე მიუტევებთ სახლს.

²¹პირველი თვის მეთოთხმეტე დღეს გექნებათ პასექი, შვიდდღიანი დღესასწაული, და ხმიადს შეჭამთ.

²²იმ დღეს მთავარმა უნდა მოიტანოს თავისთვისა და ქვეყნის მთელი ერისათვის მოზვერი ცოდვის შესაწირავად.

²³დღესასწაულის შვიდივე დღეს მიუტანოს სრულადდასაწველად უფალს დღეში შვიდი უნაკლო მოზვერი და შვიდი ვერძი შვიდი დღის განმავლობაში, და ცოდვის შესაწირავად დღეში ერთი თიკანი თხისა.

²⁴მიიტანოს ეფა ძღვენი მოზვერზე და ვერძზე და ჰინი ზეთი ეფაზე.

²⁵მეშვიდე თვის მეთხუთმეტე დღეს, დღესასწაულზე, შეასრულოს ყოველივე ეს შვიდი დღის განმავლობაში, იგივე ცოდვის შესაწირავი, იგივე სრულადდასაწველი, იგივე ძღვენი და იგივე ზეთი.’