Read ბიბლია ეზეკ. 46 Bible Online

ეზეკ. 46 - ბიბლია bible

ეზეკ. 46

¹„და თქვა უფალმა ღმერთმა: ‘შიგნითა ეზოს კარიბჭე, აღმოსავლეთით მიქცეული, დახშული იქნება საქმიანობის ექვსი დღის განმავლობაში, ხოლო შაბათ დღეს და ახალმთვარობის დღეს გაიღება.

²და მოვა მთავარი კარიბჭის დარბაზის გზით გარედან და დადგება კარიბჭის წირთხლზე, და შესწირავენ მღვდლები მის სრულადდასაწველს და მის სამშვიდობო შესაწირავს, და თაყვანს სცემს იგი კარიბჭის ზღურბლზე, და გავა და კარიბჭე არ დაიხშება საღამომდე.

³და თაყვანს სცემს ქვეყნის ხალხი უფლის წინაშე იმ ჭიშკრის შესასვლელში შაბათებსა და ახალმთვარობებში.

⁴და სრულადდასაწველი, რომელსაც შესწირავს მთავარი უფალს შაბათ დღეს, იქნება ექვსი უნაკლო ცხვარი და უნაკლო ვერძი,

⁵და ძღვენი ერთი ეფა ვერძზე, ძღვენი ცხვრებზე კი მისი ხელგაშლილობის მიხედვით, და ზეთი ჰინი საწყაულზე.

⁶ახალმთვარობის დღეს უნაკლო მოზვერი და უნაკლო ექვსი ცხვარი და ვერძი იქნება.

⁷და ერთ ეფას ვერძზე და ერთ ეფას მოზვერზე შეასრულებს ძღვენს და ცხვრებს, რამდენსაც გაიმეტებს მისი ხელი, და ზეთს ჰინის ეფაზე.

⁸და როდესაც მოვა მთავარი, კარიბჭის დარბაზის გზით მოვა და იმავე გზით გავა.

⁹და როდესაც მოვა ერი ქვეყნისა უფლის წინაშე ზეიმებში, თაყვანის საცემლად შემოსული ჩრდილოეთის კარიბჭის გზით, გავა სამხრეთის გზით. და შემომსვლელი სამხრეთის კარიბჭის გზით გავა ჩრდილოეთის კარიბჭით. არ მობრუნდება იმ კარიბჭის გზით, რომლითაც შემოვიდა, არამედ მოპირდაპირეთი გავა.

¹⁰და მთავარიც მათ შორის, მათი შემოსვლისას მოვა და მათი გასვლისას გავა.

¹¹და დღესასწაულებში და ზეიმებში ძღვენი იქნება: ეფა მოზვერზე და ეფა ვერძზე და ცხვრებზე მისი ხელგაშლილობის მიხედვით, და ზეთი — ერთი ჰინი ეფაზე.

¹²და თუ აღასრულებს მთავარი სრულადდასაწველს ნებაყოფილობით ან სამშვიდობოს ნებაყოფილობით, გაუღებენ მას აღმოსავლეთით მიქცეულ კარიბჭეს და შეასრულებს იგი მის სრულადდასაწველს და მისი სამშვიდობო მსხვერპლს, როგორც ასრულებს შაბათის დღეს, და გავა და დახშავენ კარიბჭეს მისი გასვლის შემდეგ.

¹³უნაკლო ერთწლიანი ვერძით შეუსრულე სრულადდასაწველი ყოველდღე უფალს. ყოველ დილით შეასრულე ეს.

¹⁴და ძღვენი მოუტანე მას დილაობით მეექვსედი ეფასი და ზეთი მესამედი ჰინისა, რათა დანამოს ფქვილი განმტკიცული. ესაა ძღვენი უფლისა — საუკუნო წესი, სამუდამოდ.

¹⁵და მოამზადონ ვერძი და ძღვენი და ზეთი დილაობით — სამუდამო სრულადდასაწველი.’

¹⁶და თქვა უფალმა ღმერთმა: ‘თუ მისცემს მთავარი საჩუქარს რომელიმეს თავის ძეთაგან, მის ძეთა მემკვიდრეობა იქნება იგი. ეს მათი საკუთრებაა მემკვიდრეობით.

¹⁷და თუ მისცემს ის თავისი სამკვიდრებლიდან თავის ერთ მსახურთაგანს, მაშინ მისი იქნება იგი განთავისუფლების წლამდე და დაუბრუნდება მთავარს. მხოლოდ მის ძეთ ექნებათ ის სამკვიდრებლად.

¹⁸ვერ აიღებს მთავარი ერის სამკვიდრებლიდან რაიმეს მათი საკუთრებიდან მათი გამოძევებით. მხოლოდ თავისი საკუთრებიდან დაუმკვიდრებს თავის ძეთ, რომ არავინ მოსცილდეს ჩემს ერში თავის საკუთრებას.’“

¹⁹და მიმიყვანა შესასვლელთან, რომელიც კარიბჭის კუთხეშია, მღვდელთა წმიდა სენაკებთან, რომლებიც ჩრდილოეთითაა მიქცეული, და მიჩვენა იქ ადგილი კიდეზე, დასავლეთით,

²⁰და მითხრა: ‘ეს არის ადგილი, სადაც მღვდლები მოხარშავენ დანაშაულისა და ცოდვის მსხვერპლს, სადაც გამოაცხობენ ძღვენს, რათა არ იქნეს გატანილი გარეთა ეზოში, რომ არ გადაედოს ერს სიწმიდე.“

²¹და გამიყვანა გარეთა ეზოში და მომატარა ეზოს ოთხივე კუთხე. და იქ ვნახე ეზო ეზოს კუთხეში.

²²ეზოს ოთხივე კუთხეში ჩაკეტილი ეზოები იყო, ორმოცი სიგრძით და ოცდაათი სიგანით. ერთი ზომა ჰქონდა მათ ოთხივე კუთხეს.

²³და მწკრივი ქვებისა ირგვლივ, მათ ოთხივეს ირგვლივ, და სახარშავი, გაკეთებული რიგების ქვეშ ირგვლივ.

²⁴და მითხრა: „ესაა სახარშავი სახლი, სადაც მოხარშავენ მსახურნი ერისგან შეწირულ მსხვერპლს.“