Read ბიბლია ეზეკ. 5 Bible Online

ეზეკ. 5 - ბიბლია bible

ეზეკ. 5

¹„შენ კი, ძეო კაცისავ! აიღე შენთვის მჭრელი მახვილი, დალაქთა სამართებელი აიღე შენთვის და გადაატარე შენს თავზე და შენს წვერზე და აიღე შენთვის ასაწონი სასწორი და გაანაწილე თმა.

²მესამედი კოცონზე დაწვი ქალაქის შუაგულში ალყის დღეების დასრულებისას. და აიღე მესამედი და მახვილით დაკეპე ქალაქის ირგვლივ, მესამედი ქარში გაფანტე და მე გავაშიშვლებ მახვილს მათ უკან.

³აიღე იქიდან მცირეოდენი და მიაბი ისინი შენი ტანსაცმლის კიდეს.

⁴და მათგან აიღე კიდევ და ჩაყარე ისინი ცეცხლში და დაწვი ისინი ცეცხლში და გამოვა იქიდან ცეცხლი მთელ ისრაელის სახლზე.

⁵და თქვა უფალმა ღმერთმა: ‘ეს იერუსალიმია! ხალხებს შორის დავადგინე იგი და მის ირგვლივ — ქვეყნები.

⁶ის კი წინაღუდგა ჩემს სამართალს და შესცოდა სხვა ხალხებზე მეტად და წინაღუდგა ჩემს წესებს იმ ქვეყნებზე უარესად, რომლებიც მის ირგვლივაა, რადგან ჩემი სამართალი შეიჯავრეს და ჩემი წესებით არ იარეს.’

⁷ამიტომ ასე ამბობს უფალი, ღმერთი: რადგან თქვენს სიშმაგეში გადააჭარბეთ სხვა ხალხებს, რომლებიც თქვენს ირგვლივაა და ჩემი წესებით არ იარეთ და ჩემი სამართალი არ ჰყავით, და არც სხვა ხალხების სამართალი, რომლებიც თქვენს ირგვლივაა, არ ჰყავით.

⁸ამიტომ ასე ამბობს უფალი ღმერთი: აჰა, მეც შენს წინააღმდეგ ვიქნები და შენს შიგნით ვყოფ სამართალს ხალხების თვალწინ.

⁹და გაგიკეთებ იმას, რაც არ გამიკეთებია და რის მსგავსსაც არ გავაკეთებ კვლავ ყველა შენი სისაძაგლის გამო.

¹⁰ამიტომ მამები შეჭამენ შვილებს შენს შორის და შვილები შეჭამენ თავიანთ მამებს, და ვყოფ შენში სამართალს და გავფანტავ მთელ შენს ნატამალს ყველა ქარისაკენ.

¹¹‘როგორც ცოცხალი ვარ!’ — სიტყვა უფალი ღმერთისა, — ‘მართლაც იმიტომ, რომ ჩემი საკურთხეველი შებილწე შენი ყოველი სისაძაგლით და შენი ყოველი საზიზღრობით, და მეც დაგამცირებ შენ და არ შეგიცოდებს ჩემი თვალი და არც მე შეგიბრალებ.

¹²შენი მესამედი შავი ჭირით მოკვდება და შიმშილით დაიღუპება შენს შორის, მესამედი მახვილით დაეცემა შენს ირგვლივ, მესამედს ყველა ქარისკენ გავფანტავ და მახვილს გავაშიშვლებ მათ უკან.

¹³და დასრულდება ჩემი რისხვა და დავაცხრობ ჩემს გულისწყრომას მათზე, და დავწყნარდები და გაიგებენ, რომ მე, უფალი, ვლაპარაკობდი ჩემი ეჭვიანობისას, მათზე ჩემი რისხვის დასრულებისას.

¹⁴და მიგცემ შენ ასაოხრებლად და შესარცხვენად ხალხებში, რომლებიც შენს ირგვლივაა, ყოველი გამვლელის თვალში.

¹⁵და იქნება ეს შესარცხვენად და დასაცინად, და მაგალითად და გასაოცებლად ხალხებისათვის, რომლებიც შენს ირგვლივაა, როდესაც ვყოფ შენში სამართალს გულისწყრომასა და რისხვაში და რისხვის საყვედურებში. მე, უფალმა, ვილაპარაკე.

¹⁶მათზე შიმშილის ულმობელი ისრების გაგზავნისას, რომლებიც დასაღუპავად იქნებიან, როდესაც გავგზავნი მათ თქვენს დასაღუპავად, და შიმშილს გავაძლიერებ თქვენზე და დაგილეწავთ თქვენ პურის არგანს.

¹⁷და გამოვგზავნი თქვენზე შიმშილს და მხეცებს, და დარჩები უშვილოდ, და შავი ჭირი და სისხლი გაივლის შენში, და მახვილს მოვაწევ შენზე. მე, უფალმა, ვილაპარაკე!’“