Read ბიბლია ეზეკ. 7 Bible Online

ეზეკ. 7 - ბიბლია bible

ეზეკ. 7

¹და იყო სიტყვა უფლისა ჩემს მიმართ:

²„შენ კი, ძეო კაცისავ, თქვი: ასე უთხრა უფალმა ღმერთმა ისრაელის მიწას: ‘დასასრული! დასასრული მოვიდა ქვეყნის ოთხ კიდეზე.

³ახლა დასასრულია შენზეც. და გამოგიგზავნი ჩემს რისხვას შენ და განგსჯი შენი გზებისამებრ და აგკიდებ შენ ყველა შენს სისაძაგლეს.

⁴და არ შეგიცოდებს ჩემი თვალი და არ შეგიბრალებ, რადგან შენი გზებისამებრ მოგიზღავ! და შენი სისაძაგლენი შენში იქნება და გაიგებთ, რომ მე ვარ უფალი!’“

⁵და თქვა უფალმა ღმერთმა: „უბედურება, გაუგონარი უბედურება მოდის.

⁶დასასრული მოვიდა. მოვიდა დასასრული. გაფრთხილდი, გამოიღვიძა და შენზე მოდის!

⁷მოვიდა რიგი შენზე, ამ ქვეყნის მცხოვრებო, მოვიდა ჟამი, მოახლოებულია ეს დღე, შფოთისა და არა მთების მხიარული ყიჟინისა.

⁸ახლა მალე გადმოვანთხევ ჩემს გულისწყრომას შენზე და დავასრულებ ჩემს რისხვას შენს მიმართ, და განგსჯი შენი გზებისაებრ და აგკიდებ შენ ყველა შენს სისაძაგლეს.

⁹და არ შეგიცოდებს ჩემი თვალი და არ შეგიბრალებ, შენი გზებისამებრ მოგიზღავ. და შენი სისაძაგლენი შენში იქნება და გაიგებთ, რომ მე, უფალი გცემთ.“

¹⁰გაფრთხილდით, ეს დღე მოდის, გამოვიდა ცისკარი, გამოჩნდა კვერთხი, აყვავდა მედიდურობა.

¹¹ძალადობა აღდგა ბოროტმოქმედების კვერთხად. არ დარჩება არაფერი არც მათგან და არც მათი ქონებიდან და არც მათი ხმაურიდან, და არავინ იტირებს მათზე.

¹²მოვიდა ჟამი, დადგა ის დღე. მყიდველო, ნუ გიხარია და გამყიდველო, ნუ გლოვობ, რადგან რისხვაა მთელ მათ სიმრავლეზე.

¹³რადგან გამყიდველი გაყიდულს ვერ დაუბრუნდება, თუნდაც ცოცხლები დარჩნენ ისინი, რადგან წინასწარმეტყველური ხილვა მთელ მათ სიმრავლეზე არ შეიცვლება და თავისი ურჯულოებით თავის სიცოცხლეს ვერავინ ვერ გაამაგრებს.

¹⁴ჩაჰბერავენ საყვირს და მოამზადებენ ყველაფერს და არავინ იქნება ომში წამსვლელი, რადგან ჩემი წყრომაა მთელ მათ სიმრავლეზე.

¹⁵მახვილი გარეთაა, შავი ჭირი და შიმშილი კი სახლში. ვინც მინდორშია, მახვილით მოკვდება, და ვინც ქალაქშია, შიმშილი და შავი ჭირი შეჭამს მას.

¹⁶და მათ შორის გადარჩენილნი მთებისკენ წავლენ, როგორც ხეობის მტრედები — ყველა მკვნესარი, თითოეული თავისი ურჯულოების გამო.

¹⁷ყველა ხელი დასუსტდება და ყველა მუხლი გაწყალდება.

¹⁸ჩაიცვამენ ძაძას და აიტანს მათ კანკალი, და იქნება ყველას სახეზე სირცხვილი და მათ ყველას თავზე — სიქაჩლე,

¹⁹თავიანთ ვერცხლს ქუჩებში გადაყრიან და მათი ოქრო სიბილწედ იქცევა, მათი ვერცხლი და მათი ოქრო ვერ იხსნის მათ უფლის წყრომის დღეს. სულს ვერ გაიძღობენ და ნაწლევებს ვერ ამოივსებენ, რადგან მათი ურჯულოების დაბრკოლება იყო.

²⁰და მისი სამკაულის მშვენიერება სიამაყედ აქციეს და თავიანთი საძაგელი კერპები, თავიანთი საზიზღრობანი მისგან გააკეთეს, ამიტომ ვაქციე ის მათთვის სიბინძურედ.

²¹„ჩავაგდებ მათ უცხოთა ხელში საძარცვავად და ქვეყნის ბოროტმოქმედთ — ნადავლად და შესაბღალად.

²²და მივატრიალებ ჩემს პირს მათგან, და შებღალავენ ჩემს საუნჯეს, და შემოვლენ მასში მოძალადენი და შებღალავენ მას.

²³გააკეთე ჯაჭვი, რადგან ქვეყანა სავსეა სისხლიანი განაჩენით და ქალაქი სავსეა ძალადობით.

²⁴მოვიყვან უბოროტესთ ხალხებიდან და დაიმკვიდრებენ მათ სახლებს. და გავაუქმებ მამაცთა სიამაყეს და შეიბღალებიან მათი სიწმიდენი.

²⁵განადგურება მოდის და მოითხოვენ მშვიდობას, და არ იქნება.

²⁶უბედურება უბედურებაზე მოვა და ამბავი ამბავზე იქნება, და მოითხოვენ ხილვას წინასწარმეტყველისაგან, და რჯული დაეკარგება მღვდელს და რჩევა — უხუცესს.

²⁷მეფე იგლოვებს და მთავარი შიშით შეიმოსება, და ქვეყნის ხალხის ხელი აკანკალდება. მათი გზებისამებრ მოვექცევი მათ და მათი სიმართლისამებრ განვსჯი მათ. და გაიგებენ, რომ მე ვარ უფალი!’“