Read ბიბლია ეზეკ. 9 Bible Online

ეზეკ. 9 - ბიბლია bible

ეზეკ. 9

¹და შემოღაღადა ჩემს ყურებს დიდმა ხმამ: „მოიახლოვეთ ქალაქის დამსჯელნი და თითოეული თავისი გამანადგურებელი იარაღით ხელში!“

²და აჰა, ექვსი კაცი მოდის ზემო კარიბჭის გზით, რომელიც ჩრდილოეთისკენაა მიმართული, და თითოეულს თავისი გამანადგურებელი იარაღი აქვს ხელში, და მათ შორის ერთი კაცი, სელით შემოსილი და მწერლის სამელნით წელზე, და მოვიდნენ და დადგნენ სპილენძის სამსხვერპლოსთან.

³და დიდება ისრაელის ღმერთისა ამოვიდა ქერუბიმიდან, რომელზეც იყო იგი, სახლის ზღურბლისაკენ და დაუძახა კაცს, შემოსილს სელით, რომელსაც მწერლის სამელნე ჰქონდა წელზე.

⁴და უთხრა მას უფალმა: „გაიარე ქალაქის შიგნით, იერუსალიმის შიგნით, და ნიშნით დანიშნე ადამიანთა შუბლები, რომელნიც კვნესიან და ოხრავენ ყოველი სისაძაგლის გამო, რომელიც მის შიგნით ხდება.“

⁵და ამათ უთხრა ჩემს გასაგონად: „გაიარეთ ქალაქში ამის უკან და ყველა დახოცეთ, ნუ შეიცოდებს თქვენი თვალი და ნუ შეიბრალებთ!

⁶მოხუცი, ჭაბუკი და ქალწული, ბავშვი და ქალი მოკალით. და ყოველ კაცს, რომელზეც ნიშანია, არ შეეხოთ. ჩემი ტაძრიდან დაიწყეთ.“ და დაიწყეს მოხუცი ადამიანებიდან, რომელნიც სახლის წინ იყვნენ.

⁷და უთხრა მათ: „შებილწეთ ეს სახლი და გაავსეთ ეზოები დახოცილებით. გამოდით!“ და გამოვიდნენ და დახოცეს ისინი ქალაქში.

⁸და როდესაც დახოცეს და მე დავრჩი, მაშინ პირქვე დავემხე და შევკივლე და ვთქვი: „ოჰ, უფალო ღმერთო! ნუთუ გაანადგურებ ისრაელის მთელ ნატამალს, რომ გადმოღვრი შენს რისხვას იერუსალიმზე?“

⁹მითხრა: „ურჯულოება ისრაელის სახლისა და იუდასი მეტისმეტია. გაივსო ეს ქვეყანა სისხლით და ქალაქი სავსეა სიცრუით, რადგან თქვეს: დატოვა უფალმა ეს ქვეყანა და უფალი ვერ ხედავს.

¹⁰არ შეიცოდებს ჩემი თვალი და არ შევიბრალებ, მათსავე საქციელს დავატეხ თავს.“

¹¹და აჰა, ის კაცი, სელით შემოსილი და სამელნით წელზე, ასე უბრუნებს სიტყვას: „მე აღვასრულე, რაც შენ მიბრძანე.“