Read ბიბლია ოს. 7 Bible Online

ოს. 7 - ბიბლია bible

ოს. 7

¹როცა ისრაელს ვკურნავდი, გამოაშკარავდა ეფრემის უკეთურება და სამარიის ბოროტება, რადგან თვალთმაქცურად იქცეოდნენ; შემოდის ქურდი, ყაჩაღები დაძრწიან გარეთ!

²არც უფიქრიათ გულში, რომ მე მახსოვს ყოველი მათი ბოროტება. ახლა გარემოუცავთ ისინი თავიანთ ავ საქმეებს, აჰა, ჩემს წინაშე არიან.

³თავიანთი ბოროტებით ამხიარულებენ მეფეს და თავიანთი ტყუილებით — მთავრებს.

⁴მრუშობენ ყველანი ხაბაზის გახურებულ თონესავით, რომელიც ანელებს ცეცხლს, სანამ ახალი ცომი არ გაფუვდება.

⁵ჩვენი მეფის დღეს მეფე კი მასხარებისაკენ იწვდის ხელს.

⁶რადგან თონესავით გახდა მათი გული მზაკვრობისაგან; მთელი ღამე სძინავს ხაბაზს, დილით კი ანთია თონე აგიზგიზებული ცეცხლივით.

⁷ყველანი გახურებულნი არიან თონესავით და ჭამენ თავიანთ მსაჯულებს; განმდგარია ყველა მათი მეფე, არავინ მიხმობს მათ შორის.

⁸ეფრემი შეერია ხალხებს, გადაუბრუნებელი კოკორივით შეიქნა.

⁹უცხო თესლი ჭამს მის ძალას, მას კი ვერაფერი შეუტყვია; ჭაღარა შეერია კიდეც, მას კი ვერაფერი შეუტყვია.

¹⁰მისი ამპარტავნება ამხილებს ისრაელს, მაგრამ არ უბრუნდებიან უფალს, თავიანთ ღმერთს; არა და არ ეძებენ მას.

¹¹ბრიყვი და უგუნური მტრედივით იქცა ეფრემი; ეგვიპტეს უხმობენ, აშურში მიდიან.

¹²როგორც კი წავლენ, ჩემს სათხეველს მოვისვრი მათზე და ცის ფრინველებივით ჩამოვბერტყავ; დავსჯი მათ, როგორც გაფრთხილებულნი იყვნენ თავიანთ კრებულში.

¹³ვაი მათ, რადგან ზურგი მაქციეს! დაღუპვა მათ, რადგან შემცოდეს მე! მათი გამოსყიდვა მსურს, ისინი კი მზაკვრობენ ჩემს წინააღმდეგ!

¹⁴გულით არ შემომღაღადებენ, არამედ კვნესიან თავიანთ საწოლებში; პურისა და ღვინის გულისათვის იკრიბებიან, მე კი განმიდგნენ.

¹⁵მე დავმოძღვრე, ისინი კი ავს მიზრახავენ.

¹⁶მიიქცნენ, არამადლისაკენ; მოშვებულ მშვილდს დაემსგავსნენ; მახვილით დაეცემიან მათი მთავრები უტიფარი ენის გამო; ეს იქნება მათი სირცხვილი ეგვიპტის ქვეყანაში.