Read ბიბლია ოს. 8 Bible Online

ოს. 8 - ბიბლია bible

ოს. 8

¹პირთან მიიტანე ბუკი! რადგან არწივი ადგას უფლის სახლს, რაკი გადავიდნენ ჩემს აღთქმას და რჯული დაარღვიეს.

²შემომღაღადებენ: „ღმერთო ჩემო! გიცანით ისრაელმა!“

³უარყო ისრაელმა სიკეთე, მტერი დაედევნება მას.

⁴მეფე დაისვეს ჩემს უნებართვოდ, მთავრები დაისვეს ჩემს დაუკითხავად; თავიანთი ოქრო-ვერცხლით გაიკეთეს კერპები თავის დასაღუპავად.

⁵დაგაგდო შენმა ხბომ, სამარია! აღიგზნო ჩემი რისხვა მათ როდემდის უნდა იყო უწმიდური?

⁶რადგან ისრაელის საქმეა ეს: ოსტატის ნახელავია, ღმერთი არ არის; ამიტომაც დანაფოტდება სამარიის ხბო.

⁷რადგან ქარს თესენ და ქარიშხალს მოიმკიან; თავთავი არა აქვს, მარცვალს ვერ გაიკეთებს მცენარე; თუ გაიკეთებს, უცხონი ჩაყლაპავენ.

⁸ჩაიყლაპება ისრაელი; ახლა უსარგებლო ჭურჭელივით არის ხალხთა შორის.

⁹აშურში წავიდა გარეული ვირივით, მარტო რომ დადის; ეფრემი გასცემდა სასიყვარულო საჩუქრებს.

¹⁰თუმცა გასცემდნენ ისინი ხალხებში, ახლა შევკრებ მათ; ცოტაც და, დაიტანჯებიან მთავართა მეფის ტვირთის ქვეშ.

¹¹რადგან ცოდვისათვის გაამრავლა ეფრემმა სამსხვერპლოები, ცოდვისათვის აქვს მას სამსხვერპლოები.

¹²დავუწერე მას მთავარი რჯული, მაგრამ უცხოდ შერაცხა იგი.

¹³მოაქვთ სამსხვერპლო ძღვენი ჩემთვის, მიკლავენ საკლავს და ხორცს თავადვე ჭამენ; უფალს არ ეთნევა ისინი; ახლა კი გაიხსენებს მათ უკეთურებას და მოჰკითხავს ცოდვებს; ეგვიპტეში დაბრუნდებიან.

¹⁴დაივიწყა ისრაელმა თავისი შემქმნელი იუდამ გაამრავლა ციხე-ქალაქები, მაგრამ მე ცეცხლს მოვავლენ მის ქალაქებზე და ის შთანთქავს მის დარბაზებს.