Read ბიბლია რიცხ. 1 Bible Online

რიცხ. 1 - ბიბლია bible

რიცხ. 1

¹და ელაპარაკა უფალი მოსეს სინაის უდაბნოში, საკრებულო კარავში, მეორე თვის პირველ დღეს, ეგვიპტის ქვეყნიდან გამოსვლის მეორე წელს:

²„აღრიცხეთ ისრაელის ძეთა მთელი თემი მათი საგვარეულოების, მათი მამისსახლების, სახელთა რიცხვის მიხედვით, ყოველი მამაკაცი მათი სულადობით.

³ოცი წლისა და უფროსი, ყოველი ლაშქარში გამსვლელი ისრაელის ძე აღრიცხეთ მათი ლაშქრების მიხედვით — შენ და აარონმა.

⁴თქვენთან უნდა იყოს თითო-თითო კაცი თითოეული ტომიდან. თავკაცი უნდა იყოს იგი თავისი მამისსახლისა.

⁵და ესენია სახელები მამაკაცებისა, რომელნიც იქნებიან თქვენთან ერთად: რეუბენიდან ელიცური, ძე შედეურისა;

⁶სიმონიდან შელუმიელი, ძე ცურიშადაისა;

⁷იუდასაგან ნახშონი, ძე ყამინადაბისა;

⁸ისაქარისაგან ნეთანელი, ძე ცუყარისა;

⁹ზებულუნისაგან ელიაბი, ძე ხელონისა;

¹⁰იოსების ძეთაგან: ეფრემიდან ელიშამაყი, ძე ყამიჰუდისა; მენაშედან გამალიელი, ძე ფედაცურისა;

¹¹ბენიამინიდან აბიდანი, ძე გედეონისა;

¹²დანიდან ახიყეზერი, ძე ყამიშადაისა;

¹³აშერიდან ფაგეყიელი, ძე ყაქრანისა;

¹⁴გადიდან ელიასაფი ძე რეღუელისა;

¹⁵ნაფთალიდან ახირაყ, ძე ყენანისა.“

¹⁶ესენი იყვნენ გაწვეულნი თემიდან, მთავარნი თავიანთი მამების ტომებისა, ისრაელის ათასეულთა მეთაურები.

¹⁷და მოიყვანეს მოსემ და აარონმა ეს კაცები, რომელნიც წოდებულნი იყვნენ სახელებით,

¹⁸და შეკრიბეს მთელი თემი მეორე თვის პირველ დღეს. და გამოაცხადეს მათ თავიანთი წარმომავლობა საგვარეულოების, თავიანთი მამისსახლების და სახელთა რიცხვის მიხედვით, ოცი წლის ასაკიდან და უფროსნი, მათი სულადობით.

¹⁹როგორც უბრძანა უფალმა მოსეს, ისე აღრიცხა მან ისინი სინაის უდაბნოში.

²⁰და იყვნენ ისრაელის პირმშოს, რეუბენის ძენი მათი შთამომავლობის, საგვარეულოების, მათი მამისსახლის, სახელთა რიცხვის მიხედვით, მათი სულადობით, ყოველი მამაკაცი ოცი წლის ასაკიდან და უფროსი, ყოველი ლაშქარში გამსვლელი,

²¹აღრიცხული რეუბენის ტომიდან იყო ორმოცდაექვსი ათას ხუთასი.

²²სიმონის ძეთაგან მათი შთამომავლობის, მათი საგვარეულოების და მათი მამისსახლის მიხედვით, რომელნიც აღირიცხნენ სახელთა რიცხვით, სულადობით, ყოველი მამაკაცი ოცი წლის ასაკიდან და უფროსი, ყოველი ლაშქარში გამსვლელი.

²³აღრიცხულნი სიმონის ტომიდან იყო ორმოცდაცხრამეტი ათას სამასი.

²⁴გადის ძეთაგან მათი შთამომავლობის, საგვარეულოების, მათი მამისსახლის, სახელთა რიცხვის მიხედვით, ოცი წლის ასაკიდან და ზემოთ, ყოველი ლაშქარში გამსვლელი,

²⁵აღირიცხა გადის ტომიდან; იყო ორმოცდახუთი ათას ექვსას ორმოცდაათი.

²⁶იუდას ძეთაგან მათი შთამომავლობის, საგვარეულოების, მათი მამისსახლის, სახელთა რიცხვის მიხედვით, ოცი წლის ასაკიდან და უფროსი, ყოველი ლაშქარში გამსვლელი.

²⁷აღირიცხა იუდას ტომიდან სამოცდათოთხმეტი ათას ექვსასი.

²⁸ისაქარის ძეთაგან მათი შთამომავლობის, საგვარეულოების, მათი მამისსახლის, მათი სახელთა რიცხვის მიხედვით, ოცი წლის ასაკიდან და უფროსი, ყოველი ლაშქარში გამსვლელი,

²⁹ისაქარის ტომიდან აღრიცხული იყო ორმოცდათოთხმეტი ათას ოთხასი.

³⁰ზებულუნის ძეთაგან მათი შთამომავლობის, საგვარეულოების, მათი მამისსახლის, სახელთა რიცხვის მიხედვით, ოცი წლის ასაკიდან და უფროსი, ყოველი ლაშქარში გამსვლელი,

³¹ზებულუნის ტომიდან, აღრიცხული იყო ორმოცდაჩვიდმეტი ათას ოთხასი.

³²იოსების ძეთაგან: ეფრემის ძეთაგან მათი შთამომავლობის, საგვარეულოების, მათი მამისსახლის, სახელთა რიცხვის მიხედვით ოცი წლის ასაკიდან და უფროსი, ყოველი ლაშქარში გამსვლელი,

³³ეფრემის ტომიდან აღრიცხული იყო ორმოცი ათას ხუთასი.

³⁴მენაშეს ძეთაგან მათი შთამომავლობის, საგვარეულოების, მათი მამისსახლის, მათ სახელთა რიცხვის მიხედვით, ოცი წლის ასაკიდან და უფროსი, ყოველი ლაშქარში გამსვლელი.

³⁵მენაშეს ტომიდან აღრიცხული იყო ოცდათორმეტი ათას ორასი.

³⁶ბენიამინის ძეთაგან მათი შთამომავლობის, საგვარეულოების, მათი მამისსახლის, მათ სახელთა რიცხვის მიხედვით, ოცი წლის ასაკიდან და უფროსი, ყოველი ლაშქარში გამსვლელი.

³⁷ბენიამინის ტომიდან აღრიცხული იყო ოცდათხუთმეტი ათას ოთხასი.

³⁸დანის ძეთაგან მათი შთამომავლობის, საგვარეულოების, მათი მამისსახლის, მათ სახელთა რიცხვის მიხედვით, ოცი წლის ასაკიდან და უფროსი, ყოველი ლაშქარში გამსვლელი.

³⁹დანის ტომიდან აღრიცხული იყო სამოცდაორი ათას შვიდასი.

⁴⁰აშერის ძეთაგან მათი შთამომავლობის, საგვარეულოების, მათი მამისსახლის, მათ სახელთა რიცხვის მიხედვით, ოცი წლის ასაკიდან და უფროსი, ყოველი ლაშქარში გამსვლელი.

⁴¹აშერის ტომიდან აღრიცხული იყო ორმოცდაერთი ათას ხუთასი.

⁴²ნაფთალის ძეთაგან მათი შთამომავლობის, საგვარეულოების, მათი მამისსახლის, მათ სახელთა რიცხვის მიხედვით, ოცი წლის ასაკიდან და უფროსი, ყოველი ლაშქარში გამსვლელი.

⁴³ნაფთალის ტომიდან აღრიცხული იყო ორმოცდაცამეტი ათას ოთხასი.

⁴⁴ესენი არიან აღრიცხულნი, რომელნიც აღრიცხეს მოსემ და აარონმა, და ისრაელის მთავრებმა თორმეტმა კაცმა: თითო კაცი იყო თითოეულის მამისსახლიდან.

⁴⁵და იყო ყველა აღრიცხული ისრაელის ძე, მათი მამისსახლიდან, ოცი წლის ასაკიდან და უფროსნი. ყოველი ლაშქარში გამსვლელი ისრაელში.

⁴⁶და იყო ყველა აღრიცხული ექვსას სამი ათას ხუთას ორმოცდაათი.

⁴⁷და ლევიანები მათი მამისეული ტომების მიხედვით არ აღრიცხულან მათ შორის.

⁴⁸და უთხრა უფალმა მოსეს:

⁴⁹„მხოლოდ ტომი ლევისა არ შეიტანო აღწერაში და არ აღრიცხო ისინი ისრაელის ძეთა შორის.

⁵⁰შენ დანიშნე ლევიანები მოწმობის კარავზე, ყოველ მის ჭურჭელზე და ყოველივეზე, რაც მასშია. მათ ატარონ კარავი და მთელი მისი მოწყობილობა, და ემსახურონ მას, და კარვის ახლოს დაიბანაკონ.

⁵¹როცა საჭირო იქნება კარვის გადატანა, დაშალონ იგი ლევიანებმა. და კარვის შეჩერებისას დადგან ის ლევიანებმა, უცხო კი, ვინც მას გაეკარება, მოიკლას.

⁵²და დაიბანაკონ ისრაელის ძეთ, თითოეულმა თავის ბანაკში და თითოეულმა თავის დროშასთან თავიანთი ლაშქრების მიხედვით.

⁵³ლევიანებმა კი დაიბანაკონ მოწმობის კარვის ახლოს, რათა არ იყოს რისხვა ისრაელის ძეთა თემზე. და დაიცავენ ლევიანები მოწმობის კარვის საგუშაგოს.“

⁵⁴და გააკეთეს ისრაელის ძეთ ყოველივე, როგორც უბრძანა უფალმა მოსეს.