Read ბიბლია რიცხ. 10 Bible Online

რიცხ. 10 - ბიბლია bible

რიცხ. 10

¹და უთხრა უფალმა მოსეს:

²„გაიკეთე შენთვის ვერცხლის ორი საყვირი, ნაჭედი გააკეთე ისინი და გქონდეს თემის მოსაწვევად და ბანაკთა ასაყრელად.

³და როდესაც დააყვირებენ მათ, შეიკრიბება შენთან მთელი თემი საკრებულო კარვის შესასვლელთან.

⁴და თუ ერთ საყვირს დააყვირებენ, შეიკრიბებიან შენთან მთავარნი და ისრაელის ათასისთავნი.

⁵და როდესაც საგანგაშოს დააყვირებთ, აიყრებიან ბანაკები, რომელნიც დაბანაკებულნი არიან აღმოსავლეთით.

⁶და როდესაც მეორედ დააყვირებთ საგანგაშოს, აიყრებიან ბანაკები, რომელნიც ბანაკობენ სამხრეთით. საგანგაშო დააყვირონ მათი აყრისას.

⁷ხოლო როცა შეკრებთ კრებულს, დააყვირეთ საგანგაშოს გარეშე.

⁸და აარონის ძეებმა, მღვდლებმა, უნდა დააყვირონ საყვირები: და ეს იქნება თქვენთვის მარადიულ წესად თქვენს თაობებში.

⁹და როცა გახვალთ საბრძოლველად თქვენსავე ქვეყანაში მტრის წინააღმდეგ, რომელიც თქვენ გმტრობთ, მაშინ დააყვირეთ საყვირებს საგანგაშო და იქნებით გახსენებულნი უფლის, თქვენი ღმერთის წინაშე, და გადაურჩებით თქვენს მტრებს.

¹⁰და თქვენი სიხარულის დღეს, და თქვენს დღესასწაულებზე, და თქვენს ახალმთვარობებში დააყვირეთ საყვირებს თქვენს სრულადდასაწველებზე და თქვენს სამშვიდობო მსხვერპლებზე; და ეს იქნება თქვენს გასახსენებლად თქვენი ღმერთის წინაშე. მე ვარ უფალი, ღმერთი თქვენი.“

¹¹და იყო, მეორე წელს, მეორე თვეს, თვის მეოცე დღეს აიწია ღრუბელი მოწმობის კარვიდან.

¹²და აიყარნენ ისრაელის ძენი სინაის უდაბნოდან. და შეჩერდა ღრუბელი ფარანის უდაბნოში.

¹³და აიყარნენ ისინი პირველად მოსეს ხელით გადაცემული უფლის სიტყვისამებრ.

¹⁴და დაიძრა დროშა იუდას ძეთა ბანაკისა პირველად თავიანთი ლაშქრით და მისი ლაშქრის მეთაური იყო ნახშონი, ძე ყამინადაბისა.

¹⁵და ისაქარის ძეთა ტომის ლაშქრის მეთაური იყო ნათანელი, ძე ცუყარისა.

¹⁶და ზებულუნის ძეთა ტომის ლაშქრის მეთაური იყო ელიაბი, ძე ხელონისა.

¹⁷და როცა ჩამოიხსნა სავანე, მაშინ აიყარნენ გერშონის ძენი და მერარის ძენი, სავანის მზიდველნი.

¹⁸და დაიძრა დროშა რეუბენის ბანაკისა თავიანთი ლაშქრით, და მის ლაშქრის მეთაური იყო ელიცური, ძე შედეურისა.

¹⁹და სიმონის ძეთა ტომის ლაშქრის მეთაური იყო შელუმიელი, ძე ცურიშადაისა.

²⁰და გადის ძეთა ტომის ლაშქრის მეთაური იყო ელიასაფი, ძე რეღუელისა.

²¹და შემდეგ აიყარნენ კეჰათელები, საწმიდრის მზიდველნი. სავანე მათ მისვლამდე იყო აღმართული.

²²და დაიძრა დროშა ეფრემის ძეთა ბანაკისა თავიანთი ლაშქრით, და ლაშქრის მეთაური იყო ელიშამაყი, ძე ყამიჰუდისა.

²³და მენაშეს ძეთა ტომის ლაშქრის მეთაური იყო გამალიელი, ძე ფედაცურისა.

²⁴და ბენიამინის ძეთა ლაშქრის მეთაური იყო აბიდანი, ძე გედეონისა.

²⁵და ბოლოს დაიძრა დროშა დანის ძეთა ბანაკისა, მათი ლაშქრით — ეს ბანაკი ყოველთვის უკანასკნელი იყო. და მისი ლაშქრის მეთაური იყო ახიყეზერი, ძე ყამიშადაისა.

²⁶და აშერის ტომის ლაშქრის მეთაური იყო ფაგეყიელი, ძე ყაქრანისა.

²⁷და ნაფთალის ძეთა ტომის ლაშქრის მეთაური იყო ახირაყ, ძე ყენანისა.

²⁸ეს იყო ისრაელის ძეთა მგზავრობათა რიგი მათი ჯარების მიხედვით. და ასე მგზავრობდნენ ისინი.

²⁹და უთხრა მოსემ ხობაბს, მოსეს სიმამრის, მიდიანელი რეღუელის ძეს: „ჩვენ მივემგზავრებით იმ ადგილისაკენ, რომელზეც უფალმა თქვა: ‘მას მოგცემ თქვენ’. წამოდი ჩვენთან, და სიკეთეს გწევთ, რადგან უფალმა სიკეთე ბრძანა ისრაელზე.“

³⁰მაგრამ მან უპასუხა: „არ წამოვალ, არამედ წავალ ჩემს ქვეყანაში და ჩემს სამშობლოში.“

³¹და უთხრა მოსემ: „ნუ მიგვატოვებ ჩვენ, ვინაიდან იცი ჩვენი დგომანი უდაბნოში და შენ ჩვენთვის თვალი იქნები.

³²და თუ წამოხვალ ჩვენთან, მაშინ რა სიკეთესაც გვწევს ჩვენ უფალი, ჩვენც იმავეს გწევთ შენ.“

³³და აიყარნენ ისინი უფლის მთიდან სამი დღის სავალ გზაზე, და უფლის სავანე მიდიოდა მათ წინაშე სამი დღის სავალ გზაზე, რათა აღმოეჩინა მათთვის დასადგომი ადგილი.

³⁴და უფლის ღრუბელი ფარავდა მათ დღისით ბანაკიდან მათი აყრისას.

³⁵და როდესაც დაიძრებოდა კიდობანი, ამბობდა მოსე: „აღდექ, უფალო, და განიბნენ შენი მტრები და გაიქცნენ შენი მოძულენი შენი პირისაგან.“

³⁶და როცა ჩერდებოდა კიდობანი, იგი ამბობდა: „მობრუნდი, უფალო, ისრაელთა მრავალ ათასეულთან.“