Read ბიბლია რიცხ. 12 Bible Online

რიცხ. 12 - ბიბლია bible

რიცხ. 12

¹და მირიამმა და აარონმა ილაპარაკეს მოსეს წინააღმდეგ ქუშელი ქალის გამო, რომელიც შეირთო მან. რადგან ქუშელი ქალი შეირთო ცოლად.

²და თქვეს: „ნუთუ მხოლოდ მოსეს ელაპარაკებოდა უფალი? განა ჩვენ არ გველაპარაკა?“ და ისმინა ეს უფალმა.

³და მოსე იყო კაცი ძალზე თავმდაბალი, დედამიწის ზურგზე მცხოვრებ ყველა ადამიანთაგან.

⁴და უთხრა უფალმა უცებ მოსეს, აარონსა და მირიამს: „გამოდით სამივე საკრებულო კარავთან.“ და გავიდნენ სამივე.

⁵და ჩამოვიდა უფალი ღრუბლის სვეტით, და დადგა კარვის შესასვლელში, და დაუძახა აარონს და მირიამს, და გავიდნენ ორივე.

⁶და უთხრა: „ისმინეთ ჩემი სიტყვები: თუ არის ვინმე თქვენგანი წინასწარმეტყველი, მე, უფალი, ჩვენებაში ვეცხადები მას, სიზმარში ვლაპარაკობ მასთან.

⁷ასე არაა ჩემს მსახურ მოსესთან; მთელ ჩემს სახლში ის არის ერთგული.

⁸პირისპირ ვლაპარაკობ მასთან, აშკარად და არა იგავებით, უფლის სახეს ჭვრეტს იგი. და როგორ არ გეშინიათ მოსეს, ჩემი მსახურის წინააღმდეგ ლაპარაკისა?“

⁹და აღინთო რისხვა უფლისა მათზე, და წავიდა იგი.

¹⁰და ღრუბელი განშორდა კარავს. და აჰა, მირიამი თოვლივით დაფარა კეთრმა. და შეხედა აარონმა მირიამს, და აჰა, კეთროვანია იგი.

¹¹და უთხრა აარონმა მოსეს: „გევედრები, ბატონო ჩემო, ცოდვად ნუ ჩაგვითვლი, უგუნურად რომ მოვიქეცით და შეგცოდეთ.

¹²ნუ დაემსგავსება მირიამი იმ მკვდარს, რომელიც თავისი დედის საშოდან ნახევრად შეჭმული გამოდის.“

¹³და შეჰღაღადა მოსემ უფალს: „ღმერთო, გევედრები, განკურნე იგი!“

¹⁴და უთხრა უფალმა მოსეს: „მამამისს რომ სახეში მიეფურთხებინა, შვიდი დღე ხომ შერცხვენილი უნდა ყოფილიყო? დაე, დატუსაღდეს იგი შვიდი დღე ბანაკის გარეთ, და შემდეგ დაბრუნდეს.“

¹⁵და დატუსაღდა მირიამი ბანაკის გარეთ შვიდი დღით. და ხალხი არ აყრილა გზად მირიამის დაბრუნებამდე.