Read ბიბლია რიცხ. 15 Bible Online

რიცხ. 15 - ბიბლია bible

რიცხ. 15

²„განუცხადე ისრაელის ძეთ და უთხარი მათ: ‘როდესაც შეხვალთ თქვენს საცხოვრებელ ქვეყანაში, რომელსაც მე გაძლევთ თქვენ,

³და მიიტანთ შესაწირავს უფლისათვის, სრულადდასაწველს ან მსხვერპლს მსხვილფეხა საქონელთაგან ან ცხვართაგან — აღთქმის ან სამოწყალოს აღსასრულებლად თქვენს დღესასწაულებში, რათა აკმიოთ კეთილსურნელება უფლისათვის, მსხვილფეხას შესწირავთ თუ წვრილფეხა საქონელს,

⁴შესწიროს შემწირავმა თავისი შესაწირავი უფალს: შესაწირავი წმიდა ხორბლის ფქვილისა — ეფის მეათედი ნაწილი, აზელილი მეოთხედ ჰინ ზეთში.

⁵და ღვინო საღვრელი მეოთხედი ჰინი მოამზადოს სრულადდასაწველისათვის, ან დასაკლავი მსხვერპლისთვის, თითოეული კრავისათვის.

⁶ხოლო ვერძისათვის მოამზადოს პურეული შესაწირავი წმიდა ხორბლის ფქვილიდან ეფის ორ მეათედ ნაწილად, აზელილი ჰინის მესამედ ზეთთან,

⁷და საღვრელი ღვინო ჰინის მესამედი ნაწილით შესწიროს კეთილსურნელებად უფალს.

⁸და თუ მოამზადებს მოზვერს სრულადდასაწველად ან დასაკლავ მსხვერპლად, აღთქმის აღსასრულებლად, ან სამშვიდობო მსხვერპლად უფლისათვის,

⁹მაშინ მოზვერთან ერთად შესწიროს ძღვენი წმიდა ხორბლის ფქვილიდან ეფის სამ მეათედ ნაწილად, აზელილი ნახევარ ჰინ ზეთში.

¹⁰და მიიტანე საღვრელი ღვინო ნახევარი ჰინი შესაწირავად, კეთილსურნელებად უფლისათვის.

¹¹ასე გაკეთდეს თითოეული ზვარაკის და თითოეული ვერძისათვის, ან კრავისათვის ცხვართა და თხათაგან.

¹²შესაწირავთა რაოდენობისამებრ, რომლებსაც თქვენ მოიტანთ, ასე მოამზადეთ თითოეულისათვის, მათი რაოდენობის მიხედვით.

¹³ყოველმა მკვიდრმა ასე გააკეთოს ეს, როცა მოიტანს შესაწირავს კეთილსურნელებად უფლისათვის.

¹⁴და თუ იცხოვრებს ხიზანი თქვენს შორის თქვენს თაობებში, მოიტანოს საცეცხლო მსხვერპლი კეთილსურნელებად უფლისათვის: როგორც თქვენ გააკეთებთ, ისე გააკეთოს.

¹⁵თქვენთვის, უფლის კრებულისათვის და ხიზნისათვის, რომელიც ხიზნობს თქვენთან, ერთი წესია, მარადიული წესი თქვენი თაობებისათვის: როგორც თქვენ ხართ, ისევე იყოს ხიზანიც წინაშე უფლისა.

¹⁶ერთი რჯული და ერთი სამართალი იქნება თქვენთვის და ხიზანისათვის, რომელიც ხიზნობს თქვენთან.“

¹⁷და უთხრა უფალმა მოსეს:

¹⁸„განუცხადე ისრაელის ძეთ და უთხარი მათ: ‘როცა შეხვალთ იმ ქვეყანაში, რომელშიც მე შეგიყვანთ,

¹⁹როდესაც შეჭამთ იმ ქვეყნის პურს, შესწირეთ შესაწირავი უფალს.

²⁰პირველგამომცხვარი თქვენი ცომისა — კვერი შესწირეთ შესაწირავად. როგორც კალოს შესაწირავი, ისე შესწირეთ იგი.

²¹თქვენი პირველგამომცხვარი ცომისა მიეცით უფალს შესაწირავი თქვენს თაობებში.

²²და თუ შეცდებით და ვერ შეასრულებთ ამ მცნებას, რომელიც უფალმა უთხრა მოსეს,

²³ყოველივეს, რაც გამცნოთ უფალმა მოსეს ხელით იმ დღიდან, რაც გიბრძანათ, და შემდგომ თქვენს თაობებში,

²⁴და თუ თემის უყურადღებობით მოხდა ეს შეცდომა, მთელმა თემმა მოამზადოს ერთი ნორჩი მოზვერი სრულადდასაწველად, კეთილსურნელებად უფლისათვის, და მისი ძღვენი და მისი საღვრელი წესისამებრ, და ერთი თიკანი ცოდვისათვის.

²⁵და შეუნდობს მღვდელი ისრაელის ძეთა მთელ თემს, და მიუტევებს მათ, რადგან ეს შეცდომაა, და ისინი მიიტანენ თავიანთ საცეცხლო შესაწირავს უფლის წინაშე თავიანთი შეცდომისათვის.

²⁶და მიეტევება ისრაელის ძეთა მთელ თემს და ხიზანს, რომელიც ხიზნობს მათ შორის, რადგან მთელი ხალხი შეცდომაშია.

²⁷და თუ ერთი სული შესცოდავს შეცდომით, შესწიროს ერთწლიანი დედალი თხა ცოდვისათვის.

²⁸და შეუნდობს მღვდელი შემცდარ სულს, უფლის წინაშე შეცდომით შემცოდეს, მის შესანდობად და მიეტევება მას.

²⁹მკვიდრისთვის ისრაელის ძეთაგან და ხიზნისთვის, რომელიც თქვენს შორის ხიზნობს, ერთი რჯული გქონდეთ შეცდომით ჩამდენისათვის.

³⁰ის კი, ვინც თავხედურად მოიქცევა, მკვიდრთაგან იქნება ის თუ ხიზანთაგან, უფალს გმობს იგი, და მოიკვეთოს ის სული თავისი ხალხიდან,

³¹რადგან სიტყვა უფლისა შეურაცხყო და მისი მცნება დაარღვია. შემუსვრით შეიმუსროს ის სული, მისი ცოდვა მასზეა.“

³²და როცა ისრაელის ძენი უდაბნოში იყვნენ, იპოვეს კაცი, რომელიც აგროვებდა შეშას შაბათ დღეს.

³³და მათ, ვინც შეშის შეგროვებისას ჰპოვეს იგი, მიიყვანეს მოსესთან, აარონთან და მთელ თემთან.

³⁴და ჩასვეს ის საპატიმროში, რადგან არ იყო გარკვეული, როგორ მოქცეოდნენ.

³⁵და უთხრა უფალმა მოსეს: „სიკვდილით მოკვდეს ეს კაცი. ქვებით ჩაქოლოს იგი მთელმა თემმა ბანაკის გარეთ.“

³⁶და გაიყვანა იგი მთელმა თემმა ბანაკის გარეთ და ჩაქოლა იგი ქვებით, და მოკვდა იგი, როგორც უბრძანა უფალმა მოსეს.

³⁷და უთხრა უფალმა მოსეს ასე:

³⁸„განუცხადე ისრაელის ძეთ და უთხარი მათ, რომ მათ გაიკეთონ ფოჩები თავიანთ სამოსლის კიდეებზე თავიანთ თაობებში და ჩაატანონ სამოსლის კიდის ფოჩებში ცისფერი ძაფი.

³⁹და იყოს ის თქვენთვის ფოჩად, და მის დანახვაზე გაიხსენეთ ყოველი მცნება უფლისა და აღასრულეთ ისინი, არ აჰყვეთ თქვენს გულსა და თქვენს თვალს, რომელნიც გიზიდავენ მრუშობისაკენ,

⁴⁰რათა გახსოვდეთ და აღასრულებდეთ ყოველ ჩემს მცნებას, და იყოთ წმიდები თქვენი ღვთისათვის.

⁴¹მე ვარ უფალი, ღმერთი თქვენი, რომელმაც გამოგიყვანათ თქვენ ეგვიპტის ქვეყნიდან, რათა ვიყო თქვენთვის ღმერთი. მე ვარ უფალი, ღმერთი თქვენი.“