Read ბიბლია რიცხ. 18 Bible Online

რიცხ. 18 - ბიბლია bible

რიცხ. 18

¹და უთხრა უფალმა აარონს: „შენ და შენმა ძეებმა, შენმა მამისსახლმა შენთან ერთად უნდა იკისროთ საწმიდრის დანაშაული. და შენ და შენმა ძეებმა შენთან ერთად უნდა იკისროთ თქვენი მღვდლობის დანაშაული.

²და აგრეთვე შენი ძმანი — ტომი ლევისა, მამაშენის ტომი, დაიახლოვე. ისინი თან გახლდნენ შენ და გემსახურებოდნენ. ხოლო შენ და შენი ძენი შენთან ერთად უნდა იყოთ მოწმობის კარვის წინ.

³და აღასრულონ მოვალეობა შენს მიმართ და მოვალეობა მთელი კარვის მიმართ, ოღონდ საწმიდრის ჭურჭლებსა და სამსხვერპლოს არ მიუახლოვდნენ ისინი, რათა არ დაიხოცნეთ არც ისინი და არც თქვენ.

⁴და თან გახლდნენ შენ, და აღასრულონ მოვალეობა საკრებულო კარვის მიმართ, კარვის ყოველი სამუშაო. და უცხო არ მოგიახლოვდეთ თქვენ.

⁵და აღასრულეთ მოვალეობა საწმიდრისა და მოვალეობა სამსხვერპლოსი, და მეტი აღარ იქნება რისხვა ისრაელის ძეებზე.

⁶და მე ავიყვანე თქვენი ძმები, ლევიანები, ისრაელის ძეთაგან, თქვენთვის არიან ისინი მოძღვნილი უფლისაგან, რათა აღასრულონ მსახურება საკრებულო კარვისა.

⁷ხოლო შენ, და შენმა ძეებმა შენთან ერთად, აღასრულეთ თქვენი მღვდლობა ყოველივეში, რაც შეეხება სამსხვერპლოს და იმას, რაც შიგნითაა, ფარდის მიღმა, და მსახურებდეთ. თქვენთვის მომიძღვნია მღვდლობა და უცხო, რომელიც მიუახლოვდება, მოკვდება.“

⁸და უთხრა უფალმა აარონს: „აჰა, მე დაგავალე შენ მეთვალყურეობა ჩემსა და ისრაელის ძეთა ყოველ შემოწირულობაზე, მოგეცი წილად შენ და შენს ძეებს საუკუნო წესით.

⁹აი რა გეკუთვნის შენ წმიდათა წმიდიდან, საცეცხლო მსხვერპლიდან: ყოველი მათი პურეულის შესაწირავი, და ყოველი მათი მსხვერპლი ცოდვისათვის და დანაშაულის ყოველი გამოსასყიდი, რასაც მომიტანენ მე; წმიდათა წმიდაა ის შენთვის და შენი ძეებისათვის.

¹⁰უწმიდეს ადგილზე ჭამეთ იგი. ყოველმა მამროვანმა ჭამოს იგი. სიწმიდე იყოს ის შენთვის.

¹¹ესაა შენთვის მათი ძღვენის წილი ისრაელის ძეთა ყოველი შესარხევი შესაწირავიდან: შენ მოგეცი, შენს ძეებსა და შენს ასულებს შენთან ერთად საუკუნო წესად. შენს სახლში ყოველ სუფთას შეუძლია ჭამოს იგი.

¹²ყოველი საუკეთესო ზეთისაგან, ყოველი საუკეთესო ღვინისაგან და საუკეთესო მარცვლელულისაგან, მათ პირველმოწეულ ნაყოფთაგან, უფალს რომ მისცემენ, შენთვის მომიცია ისინი.

¹³და ყოველი პირველმოწეული ნაყოფი, რომელიც მათ ქვეყანაშია, რომ მიუტანენ უფალს, შენი იქნება. შენ სახლში ყოველ სუფთას შეუძლია ჭამოს იგი.

¹⁴ისრაელში ყველა შემოწირულობა შენი იყოს.

¹⁵ყოველი ხორციელის პირველნაშობი, რომელსაც მიუძღვნიან უფალს, ადამიანი იქნება თუ პირუტყვი, შენი იყოს. მაგრამ შენ უნდა გამოისყიდო პირმშო ადამიანთაგანი, და უწმიდური პირუტყვის პირველმოგებულიც გამოისყიდე.

¹⁶მისი გამოსასყიდია: ერთი თვის ასაკიდან გამოისყიდე შენი შეფასების მიხედვით, ხუთ ვერცხლ შეკელად, საწმიდრის შეკელით. ოცი გერაა იგი.

¹⁷მაგრამ პირველმოგებული ძროხისა, ან პირველმოგებული ცხვრისა, ან პირველმოგებული თხისა არ გამოისყიდო: ისინი წმიდები არიან. მათი სისხლი მოაპკურე სამსხვერპლოზე და მათი ქონი აკმიე სრულადდასაწველ კეთილსურნელებად უფლისათვის.

¹⁸და მათი ხორცი შენი იყოს ისევე, როგორც შესარხეველი მკერდი და როგორც მარჯვენა ბეჭი შენი იყოს.

¹⁹ყოველი წმიდა შესაწირავი, რომელსაც სწირავენ ისრაელის ძენი უფალს, მომიცია შენთვის, შენი ძმებისა და ასულებისათვის შენთან ერთად, საუკუნო წესად. ეს საუკუნო აღთქმაა მარილისა უფლის წინაშე შენთვის და შენი შთამომავლობისათვის შენთან ერთად.“

²⁰და უთხრა უფალმა აარონს: „მათ ქვეყანაში არ დაიმკვიდრო სამკვიდრებელი და წილი არ გქონდეს შენ მათ შორის. მე ვარ წილი შენი და სამკვიდრებელი შენი ისრაელის ძეთა შორის.

²¹და ლევის ძეთ მე მივეცი ყოველი მეათედი ისრაელში სამკვიდრებლად, მათი მსახურების სანაცვლოდ, რასაც ასრულებენ საკრებულო კარვის მსახურებით.

²²და არ მიუახლოვდნენ კვლავ ისრაელის ძენი საკრებულო კარავს, რომ არ დაიდონ ცოდვა და არ დაიხოცნონ.

²³შეასრულონ ლევიანებმა მსახურება საკრებულო კარვისა და იტვირთონ მათი ცოდვები. ეს საუკუნო წესია თქვენს თაობებში. და ისრაელის ძეთა შორის არ დაიმკვიდრონ სამკვიდრებელი,

²⁴რადგან ისრაელის ძეთა მეათედი, რომელსაც შესაწირავად სწირავენ უფალს, მე ლევიანებს მივეცი სამკვიდრებლად. ამისათვის ვუთხარი მე მათ: ისრაელის ძეთა შორის ისინი არ დაიმკვიდრებენ სამკვიდრებელს.“

²⁵და უთხრა უფალმა მოსეს:

²⁶„განუცხადე ლევიანებს და უთხარი მათ: ‘როდესაც აიღებთ ისრაელის ძეთაგან მეათედს, რომელიც მე მოგეცით მათგან სამკვიდრებლად, მაშინ შესწირავთ მისგან უფლის შესაწირავს, მეათედს მეათედისაგან.

²⁷და ჩაგეთვლებათ თქვენი შესაწირავი, როგორც მარცვლელული კალოდან და როგორც სისავსე საწნახლიდან.

²⁸ეგრე შესწირეთ თქვენც შესაწირავი უფალს ყოველი თქვენი მეათედიდან, რომელსაც აიღებთ ისრაელის ძეთაგან, და მისცემთ მისგან უფლის შესაწირავს აარონ მღვდელს.

²⁹ყველაფრიდან, რასაც მოგიძღვნიან, შესწირეთ შესაწირავი უფალს, ყოველივე საუკეთესოთაგან, წმიდა ნაწილი მისგან’.

³⁰და უთხარი მათ: ‘როცა შესწირავ საუკეთესოს მისგან, ითვლება იგი ლევიანთათვის, როგორც კალოს მოსავალი და როგორც საწნახლის მოსავალი.

³¹და ჭამეთ იგი ყოველ ადგილზე თქვენ და თქვენმა საგვარეულომ, რადგან ეს თქვენი საზღაურია თქვენი სამსახურისათვის საკრებულო კარავში.

³²და არ დაგედებათ ამისათვის ცოდვა, როცა შესწირავთ საუკეთესოს მისგან. ისრაელის ძეთა სიწმიდენი არ შებილწოთ და არ დაიხოცებით.’“