Read ბიბლია რიცხ. 19 Bible Online

რიცხ. 19 - ბიბლია bible

რიცხ. 19

¹და უთხრა უფალმა მოსეს და აარონს:

²„აჰა, წესი რჯულისა, რომელიც ბრძანა უფალმა: უთხარი ისრაელის ძეთ, რომ მოიყვანონ შენთან წითელი საღი დეკეული, რომელსაც არა აქვს ნაკლი, და არ სდგომია უღელი.

³და მიეცით ის ელეაზარ მღვდელს, და გაიყვანოს იგი ბანაკის გარეთ და დაკლან იგი მის წინაშე.

⁴და აიღოს ელეაზარ მღვდელმა მისი სისხლი თითით და მოაპკუროს სისხლი საკრებულო კარვის წინა მხარეს შვიდჯერ.

⁵და დაწვან დეკეული მის თვალწინ. მისი ტყავი და მისი ხორცი და მისი სისხლი თავის სკორეანად დაწვან.

⁶და აიღოს მღვდელმა კედრის ხე და უსუპი, და ჭიაფერი ნართი და დააგდოს ალმოდებულ დეკეულზე.

⁷და გაირეცხოს მღვდელმა თავისი შესამოსელი და დაიბანოს თავისი სხეული წყლით, და შემდეგ შევიდეს ბანაკში. და შებილწული იქნება მღვდელი საღამომდე.

⁸და მისმა დამწველმა გაირეცხოს თავისი სამოსელი წყლით და დაიბანოს თავისი სხეული წყლით; და შებილწული იქნება საღამომდე.

⁹და შეაგროვოს სუფთა კაცმა ფერფლი დეკეულისა და დადოს ბანაკის გარეთ, სუფთა ადგილას, და იყოს ეს ისრაელის ძეთა თემისათვის შესანახად, გამასუფთავებელი წყლისთვის. ეს ცოდვის მსხვერპლია.

¹⁰დეკეულის ფერფლის შემგროვებელმა გაირეცხოს თავისი სამოსელი და შებილწული იქნება საღამომდე. ეს იყოს ისრაელის ძეთათვის და ხიზანთათვის, მათში რომ ხიზნობენ, საუკუნო წესად.

¹¹ვინც ადამიანის გვამს მიეკარება, შებილწული იქნება შვიდი დღე.

¹²იგი გასუფთავდება ცოდვისაგან ფერფლით მესამე დღეს და მეშვიდე დღეს, და სუფთა იქნება. და თუ ის არ გასუფთავდება მესამე დღეს და მეშვიდე დღეს, არ იქნება სუფთა.

¹³ყოველი, ვინც მიეკარება მკვდარს, ადამიანის ცხედარს, და არ გაისუფთავებს თავს, უფლის სავანეს შებილწავს იგი. მოიკვეთოს ეს სული ისრაელიდან, რადგან გამასუფთავებელი წყალი არ ეპკურა მას, და შებილწულია ის და მისი სიბილწე კვლავ მასზეა.

¹⁴ეს არის რჯული: თუ ადამიანი კარავში მოკვდება, მაშინ ყოველი, ვინც შევა კარავში, და ყოველი, ვინც კარავშია, შებილწული იქნება შვიდი დღე.

¹⁵და ყოველი თავღია ჭურჭელი, რომელიც არაა დახურული თავსახურავით, შებილწულია.

¹⁶და ყოველი, რომელიც შეეხება მინდორში მახვილით განგმირულს, ან მკვდარს, ან ადამანის ძვალს, ან საფლავს, შებილწულია იგი შვიდი დღე.

¹⁷და შებილწულისათვის აიღონ ცოდვისათვის დამწვარი დეკეულის ფერფლი, და დაასხან მას წყაროს წყალი ჭურჭელში.

¹⁸და აიღოს სუფთა ადამიანმა უსუპი, და ამოავლოს ამ წყალში, და აპკუროს კარავს, და ყოველ ჭურჭელს და ყველა ადამიანს, რომელიც იქ არის, და ვინც ან ძვალს, ან მკვდარს, ან მოკლულს ან საფლავს გაკარებია.

¹⁹და აპკუროს სუფთამ შებილწულს მესამე დღეს და მეშვიდე დღეს, და გაასუფთავებს მას მეშვიდე დღეს. და გაირეცხავს თავის სამოსელს, და დაიბანს წყლით, და სუფთა იქნება საღამოზე.

²⁰და თუ ვინმე შეიბილწა და არ გასუფთავდება, უნდა მოიკვეთოს ის სული კრებულიდან, რადგან მან შებილწა უფლის საწმიდარი. გამასუფთავებელი წყალი არ პკურებია მას, შებილწულია იგი.

²¹იყოს ეს მათთვის საუკუნო წესად. და წყლის მასხურებელმაც გაირეცხოს თავისი სამოსელი. ვინც გამასუფთავებელ წყალს გაეკარება, შებილწული იქნება საღამომდე.

²²და ყოველი, რასაც შებილწული გაეკარება, შებილწული იქნება. და მას მიკარებული ადამიანიც შებილწული იქნება საღამომდე.“