Read ბიბლია რიცხ. 2 Bible Online

რიცხ. 2 - ბიბლია bible

რიცხ. 2

¹და უთხრა უფალმა მოსეს და აარონს:

²„ყოველმა ისრაელის ძემ თავის დროშასთან მისი მამის სახლის ნიშნებით დაიბანაკოს. საკრებულო კარვის ირგვლივ უნდა დაიბანაკონ შორი-ახლოს.“

³და იყვნენ დაბანაკებულნი წინა მხარეს, აღმოსავლეთით: იუდას ბანაკის დროშა მათი ლაშქრების მიხედვით. და იუდას ძეთა მთავარი იყო ნახშონი, ყამინადაბის ძე.

⁴და მისი ლაშქარი, მასთან აღრიცხული, შეადგენდა სამოცდათოთხმეტი ათას ექვსასს.

⁵მის მომდევნოდ დაიბანაკა ისაქარის ტომმა. და ისაქარის ძეთა მთავარი იყო ნათანელი, ძე ცუყარისა,

⁶და მისი ლაშქარი, მასთან აღრიცხული, შეადგენდა ორმოცდათოთხმეტი ათას ოთხასს.

⁷შემდეგი იყო ზებულუნის ტომი. და ზებულუნის ძეთა მთავარი იყო ელიაბი, ძე ხელონისა.

⁸და მისი ლაშქარი, მასთან აღრიცხული — ორმოცდაჩვიდმეტი ათას ოთხასი.

⁹ას ოთხმოცდაექვსი ათას ოთხასი იყო ყოველი აღრიცხული იუდას ტომში, მათი ლაშქრებით. ისინი პირველნი უნდა გაემგზავრნენ.

¹⁰რეუბენის ბანაკის დროშა სამხრეთით იყო თავიანთი ლაშქრებით. და რეუბენის ძეთა მთავარი იყო ელიცური, ძე შედეურისა.

¹¹და მისი ლაშქარი, მასთან აღრიცხული, შეადგენდა ორმოცდაექვსი ათას ხუთასს.

¹²მის მომდევნოდ დაიბანაკა სიმონის ტომმა. და სიმონის ძეთა მთავარი იყო შელუმიელი, ძე ცურიშადაისა.

¹³და მისი ლაშქარი, მასთან აღრიცხული, შეადგენდა ორმოცდაცხრამეტი ათას სამასს.

¹⁴და შემდეგ გადის ტომი. და გადის ძეთა მთავარი იყო ელიასაფი, ძე რეღუელისა.

¹⁵და მისი ლაშქარი, მასთან აღრიცხული, შეადგენდა ორმოცდახუთი ათას ექვსას ორმოცდაათს.

¹⁶რეუბენის ბანაკში აღრიცხული იყო ას ორმოცდათერთმეტი ათას ოთხას ორმოცდაათი კაცი მათი ლაშქრით, ისინი მეორენი უნდა გაემგზავრნენ.

¹⁷და როცა გაემგზავრება საკრებულო კარავი, ლევიანთა ბანაკი ბანაკთა შუაში იქნება. როგორც არიან დაბანაკებულნი, ისევე გაემგზავრებიან, თითოეული თავიანთი დროშების მახლობლად.

¹⁸ეფრემის ბანაკის დროშა თავინთი ლაშქრის მიხედვით დასავლეთით იყო. და ეფრემის ძეთა მთავარი იყო ელიშამაყი, ძე ყამიჰუდისა.

¹⁹და მისი ლაშქარი, მასთან აღრიცხული, შეადგენდა ორმოცი ათას ხუთასს.

²⁰და მასთან მენაშეს ტომი, მენაშეს ძეთა მთავარი იყო გამალიელი, ძე ფედაცურისა.

²¹და მისი ლაშქარი, მასთან აღრიცხული, შეადგენდა ოცდათორმეტი ათას ორასს.

²²და შემდეგ — ბენიამინის ტომი, და ბენიამინის ძეთა მთავარი იყო აბიდანი, ძე გედეონისა.

²³და მისი ლაშქარი, მასთან აღრიცხული, შეადგენდა ოცდათხუთმეტი ათას ოთხასს.

²⁴ყოველი აღრიცხული ეფრემის ბანაკში, მათი ლაშქრებით, იყო ას რვა ათას ასი. და ისინი მესამენი უნდა გაემგზავრნენ.

²⁵დანის ბანაკის დროშა იყო ჩრდილოეთით, მათი ლაშქრებითურთ. და დანის ძეთა მთავარია ახიყეზერი, ძე ყამიშადაისა.

²⁶და მისი ლაშქარი, მასთან აღრიცხული, შეადგენდა სამოცდაორი ათას შვიდასს.

²⁷და მასთან დაიბანაკა აშერის ტომმა, და აშერის ძეთა მთავარი იყო ფაგეყიელი, ძე ყაქრანისა.

²⁸და მისი ლაშქარი, მასთან აღრიცხული, შეადგენდა ორმოცდაერთი ათას ხუთასს.

²⁹და შემდეგ ნაფთალის ტომი. და ნაფთალის ძეთა მთავარი იყო ახირაყ, ძე ყენანისა.

³⁰და მისი ლაშქარი, მასთან აღრიცხული, შეადგენდა ორმოცდაცამეტი ათას ოთხასს.

³¹ყოველი აღრიცხული დანის ბანაკში იყო ას ორმოცდაჩვიდმეტი ათას ექვსასი. უკანასკნელნი უნდა გაემგზავრნენ თავიანთი დროშებითურთ.

³²ეს იყო აღრიცხვა ისრაელის ძეთა, მათი მამისსახლითურთ: ყოველი აღრიცხული ბანაკებში მათი ლაშქრებით იყო ექვსას სამი ათას ხუთას ორმოცდაათი.

³³მაგრამ ლევიანები არ აღირიცხნენ ისრაელის ძეთა შორის, როგორც უბრძანა უფალმა მოსეს.

³⁴და გააკეთეს ისრაელის ძეთ ყოველივე, როგორც უბრძანა უფალმა მოსეს. ასე დაიბანაკეს თავიანთი დროშების მიხედვით და ასე გაემგზავრა თითოეული თავისი საგვარეულოს მიხედვით, თავის მამისსახლის მიხედვით.