Read ბიბლია რიცხ. 21 Bible Online

რიცხ. 21 - ბიბლია bible

რიცხ. 21

¹და გაიგო ქანაანელმა, ყარადის მეფემ, სამხრეთის მკვიდრმა, რომ მოდის ისრაელი ათარიმის გზით. და შეებრძოლა იგი ისრაელს, და ზოგიერთი მათგანი ტყვედ წაიყვანა.

²და აღუთქვა ისრაელმა აღთქმა უფალს, და თქვა: „თუ ამ ხალხს ჩამიგდებ ხელში, მაშინ მათ ქალაქებს ავაოხრებ.“

³და ისმინა უფალმა ისრაელის ხმა, და მისცა ქანაანელნი, და ააოხრეს ისინი და მათი ქალაქებიც, და უწოდეს სახელი იმ ადგილს ხორმა.

⁴და დაიძრნენ ჰორის მთიდან მეწამული ზღვისაკენ მიმავალი გზით, რათა გვერდი აევლოთ ედომის ქვეყნისთვის. და ხალხმა გამოავლინა სულმოკლეობა გზაზე.

⁵ლაპარაკობდა ხალხი ღმერთისა და მოსეს წინააღმდეგ: „რად გამოგვიყვანეთ ეგვიპტიდან, რომ დავიხოცოთ უდაბნოში? რადგან არაა პური და არც წყალი, და ჩვენს სულს შესძაგდა ეს უვარგისი საჭმელი.“

⁶და მოუვლინა უფალმა ხალხს შხამიანი გველები და დაკბინეს ხალხი, და დაიხოცა მრავალი ისრაელიანი.

⁷და მივიდა ხალხი მოსესთან და უთხრა მას: „შევცოდეთ, რადგან ვილაპარაკეთ უფლისა და შენს წინააღმდეგ. ილოცე უფლის მიმართ, მოაშოროს ჩვენგან გველი.“ და ილოცა მოსემ ხალხისათვის.

⁸და უთხრა უფალმა მოსეს: „გააკეთე შენთვის გველი და დაამაგრე იგი დროშაზე, და ყოველი დაგესლილი, ვინც მას შეხედავს, ცოცხალი დარჩება.“

⁹და გააკეთა მოსემ სპილენძის გველი, და დადო იგი დროშაზე. და თუ დაგესლავდა გველი კაცს და შემდეგ შეხედავდა იგი სპილენძის გველს, ცოცხალი რჩებოდა.

¹⁰და აიყარნენ ისრაელის ძენი და დაიბანაკეს ობოთში.

¹¹და აიყარნენ ობოთიდან, და დაიბანაკეს ყიე-ყაბარიმში, უდაბნოში, რომელიც მოაბის პირისპირაა, მზის აღმოსავლეთისკენ.

¹²და იქიდან აიყარნენ და დაბანაკდნენ ზარედის ხევში.

¹³იქიდან აიყარნენ და დაბანაკდნენ უდაბნოში, არნონის მიღმა, რომელიც გამოდის ამორეველთა საზღვრიდან. რადგან არნონი საზღვარია მოაბისა, მოაბსა და ამორეველთა შორის.

¹⁴ამისათვის ნათქვამია უფლის ბრძოლების წიგნში: ვაჰები სუფაში და ხევნი არნონისა,

¹⁵და ქანობი ნაკადებისა, რომელიც ეშვება ყარისაკენ და ებჯინება მოაბის საზღვარს.

¹⁶და იქიდან აიყარნენ ისინი ბეერისაკენ. ეს ის ჭაა, რომელზეც მოსეს უთხრა უფალმა: „შეკრიბე ხალხი და წყალს მივცემ მათ.“

¹⁷მაშინ გალობდა ისრაელი ამ საგალობელს: „აღივსე, ჭაო! უგალობეთ მას.

¹⁸ჭას, რომელიც გათხარეს მთავრებმა, გაკვალეს იგი ხალხის წინამძღვრებმა კვერთხით, თავიანთი არგნებით!“ და უდაბნოდან აიყარნენ მათანასაკენ.

¹⁹და მათანადან — ნახალიელისაკენ და ნახალიელიდან — ბამოთისაკენ,

²⁰და ბამოთიდან — ხეობისაკენ, რომელიც მოაბის ველზეა, ფისგას მწვერვალზე, უდაბნოს რომ გადაჰყურებს.

²¹და გაუგზავნა ისრაელმა მოციქულები სიხონს, ამორეველთა მეფეს, ამ სიტყვებით:

²²„გავივლით შენს ქვეყანაზე. არ შევალთ არც ყანებში და არც ვენახებში, არც დავლევთ შენი ჭის წყალს, და ვივლით სამეფო გზაზე, ვიდრე არ გავცდებით შენს საზღვრებს.“

²³მაგრამ სიხონმა თავის საზღვრებში გავლის ნება არ მისცა ისრაელს. და შეკრიბა სიხონმა მთელი თავისი ხალხი, და გამოვიდა ისრაელის წინააღმდეგ უდაბნოში, და მივიდა იაჰცაში, და შეებრძოლა ისრაელს.

²⁴და განგმირა იგი ისრაელმა მახვილით, და დაეუფლა მის ქვეყანას არნონიდან იაბოკამდე, ყამონელთა ტომებამდე, რადგან ყამონელთა ტომების საზღვარი გამაგრებული იყო.

²⁵და აიღო ისრაელმა ყველა ეს ქალაქი და დასახლდა ისრაელი ამორეველთა ყველა ქალაქში, ხეშბონში და ყველა მის სოფელში.

²⁶რადგან ხეშბონი იყო ამორეველთა მეფე სიხონის ქალაქი. და იგი ებრძოდა მოაბის წინამორბედ მეფეს, და ხელიდან წაართვა მთელი ქვეყანა არნონამდე.

²⁷ამიტომ ამბობენ მეიგავენი: „შედით ხეშბონში, რათა აშენდეს! და განმტკიცდეს ქალაქი სიხონისა.

²⁸რადგან ცეცხლი გამოვიდა ხეშბონიდან, ალი — სიხონის ქალაქიდან, შთანთქა მან ყარ-მოაბი, არნონის სიმაღლეთა მფლობელი.

²⁹ვაი შენ, მოაბო! განადგურდი ქამოშის ხალხო! მისცა მისი ძენი ლტოლვილებად და მისი ასულნი ტყვეებად ამორეველთა მეფეს, სიხონს.

³⁰და ჩვენ განვგმირეთ ისინი. გაწყდა ხეშბონი დიბონამდე, და ნოფახამდე ავაოხრეთ, რომელიც მედების მახლობლადაა.“

³¹და დასახლდა ისრაელი ამორეველთა ქვეყანაში.

³²და გაგზავნა მოსემ მსტოვარნი იაყზერის დასაზვერად, და დაიპყრეს მათ მისი გარეუბნები, და განდევნეს ამორეველები, რომელნიც იქ იყვნენ.

³³და შემობრუნდნენ ისინი და ავიდნენ ბაშანის გზით, და ედრეყიში გამოვიდა მათ წინააღმდეგ საბრძოლველად ყოგი, ბაშანის მეფე, და მთელი მისი ხალხი.

³⁴და უთხრა უფალმა მოსეს: „ნუ გეშინია მისი, რადგან ხელში ჩაგიგდე იგი და მთელი მისი ხალხი და მისი ქვეყანა. მოექეცი ისე, როგორც სიხონს მოექეცი, ამორეველთა მეფეს, რომელიც მკვიდრობდა ხეშბონში.“

³⁵და მუსრი გაავლო მას და მის ძეებს და მთელ ხალხს, და არავინ დაუტოვეს ცოცხალი, და დაიმკვიდრეს მისი ქვეყანა.