Read ბიბლია რიცხ. 22 Bible Online

რიცხ. 22 - ბიბლია bible

რიცხ. 22

¹და აიყარნენ ისრაელის ძენი და დაბანაკდნენ მოაბის ველებზე, იორდანეს გაღმა მხარეს, იერიხოს ქვემოთ.

²და იხილა ბალაკმა, ციფორის ძემ, ყოველი, რაც უყო ისრაელმა ამორეველებს.

³და ძალზე შეეშინდა მოაბს ამ ხალხისა, რადგან იგი მრავალრიცხოვანი იყო. და დაფრთხა მოაბი ისრაელის ძეთა წინაშე.

⁴და უთხრა მოაბმა მიდიანის უხუცესებს: „ახლა გააჩანაგებს ეს კრებული ყოველივეს, რაც ჩვენს გარშემოა, როგორც ხარი აჩანაგებს მინდვრის ბალახს.“ ხოლო ბალაკი, ძე ციფორისა, მოაბის მეფე იყო იმჟამად.

⁵და გაუგზავნა მოციქულები ბილყამს, ბეყორის ძეს, ფეთორში, რომელიც მდინარესთანაა, თავისი ხალხის ძეთა ქვეყანაში, რათა მოეწვიათ იგი და ეთქვათ: აჰა, ხალხი გამოვიდა ეგვიპტიდან. უკვე დაფარა მიწის პირი და ის ჩემს პირდაპირ მკვიდრობს.

⁶და ახლა, წადი, დამიწყევლე ეს ხალხი, რადგან იგი ჩემზე ძლიერია. ეგების შევძლო და განვდევნო ამ ქვეყნიდან, რადგან ვიცი: ვისაც აკურთხებ, კურთხეულ იქნება, და ვისაც დაწყევლი, წყეული იქნება.“

⁷და წავიდნენ უხუცესები მოაბისა და უხუცესები მიდიანისა. მათ ხელთ ჰქონდათ სამისნო საფასი. და მივიდნენ ბილყამთან, და მოუთხრეს მას სიტყვები ბალაკისა.

⁸და უთხრა მათ ბილყამმა: „გაათიეთ აქ ეს ღამე და გაგცემთ პასუხს, როგორც უფალი მეტყვის.“ და დარჩნენ მთავრები მოაბისა ბილყამთან.

⁹და მივიდა ღმერთი ბილყამთან და ჰკითხა: „ვინ არიან ეს კაცები შენთან?“

¹⁰და უთხრა ბილყამმა ღმერთს: „ბალაკმა, ციფორის ძემ, მოაბის მეფემ, გამომიგზავნა:

¹¹‘აჰა ხალხი, რომელიც გამოვიდა ეგვიპტიდან, დაფარა მიწის პირი. ახლა წადი, დამიწყევლე იგი. ეგების შევძლო შებრძოლება მასთან, რომ განვდევნო.’“

¹²და უთხრა ღმერთმა ბილყამს: „არ წაჰყვე მათ, არ დაწყევლო ის ხალხი, რადგან კურთხეულია იგი.“

¹³და ადგა ბილყამი დილას, და უთხრა ბალაკის მთავრებს: „წადით თქვენს ქვეყანაში, რადგან უფალს არ სურს თქვენთან გამომიშვას.“

¹⁴და ადგნენ მოაბელი მთავრები, და მოვიდნენ ბალაკთან და უთხრეს: „არ ნებავს ბილყამს წამოსვლა ჩვენთან.“

¹⁵და კვლავ გაგზავნა ბალაკმა მთავრები, მრავალნი და მათზე უფრო სახელოვანნი.

¹⁶და მივიდნენ ბილყამთან და უთხრეს მას: „ასე თქვა ბალაკმა, ციფორის ძემ: ‘ნუ იტყვი უარს ჩემთან მოსვლაზე,

¹⁷რადგან ძალიან დიდ პატივს გცემ, და ყველაფერს, რასაც მეტყვი, გავაკეთებ. წამოდი, დამიწყევლე ეს ხალხი.’“

¹⁸„თუნდაც ოქრო-ვერცხლით ავსებული მთელი თავისი სახლი მომცეს ბალაკმა, ვერ გადავალ ჩემი ღმერთის ბრძანებას. ვერც მცირეს რასმე გავაკეთებ, ვერც დიდს.

¹⁹და ახლა დარჩით თქვენც აქ ამაღამ, და მე გავიგებ, რას მეტყვის კვლავ უფალი.“

²⁰და მოვიდა ღმერთი ბილყამთან ღამე, და უთხრა მას: „თუ შენს მისაწვევად მოვიდნენ ეს კაცები, ადექ, გაჰყევი მათ. ოღონდ რასაც მე გეტყვი, იმას გააკეთებ.“

²¹და ადგა ბილყამი დილით და შეკაზმა თავისი ვირი და ავიდა მოაბელთა მთავრებთან.

²²და აღიგზნო რისხვა ღვთისა, რადგან წავიდა იგი. და დადგა უფლის ანგელოზი გზაზე მის დასაბრკოლებლად. იგი ამხედრებული იყო თავის ვირზე და მისი ორი მსახური იყო მასთან.

²³და იხილა ვირმა უფლის ანგელოზი, მდგომარე გზაზე, და მის ხელში გაშიშვლებული მახვილი, და გადაუხვია ვირმა გზიდან, და წავიდა მინდორზე. ბილყამმა კი ვირს დაუწყო ცემა, რათა მოებრუნებინა გზაზე.

²⁴და დადგა უფლის ანგელოზი ვენახთა ბილიკზე: ღობე იყო ერთი მხრიდან და ღობე იყო მეორე მხრიდან.

²⁵და როცა დაინახა ვირმა უფლის ანგელოზი, მიეკრა კედელს, და კედელს მიაჭყლიტა ბილყამის ფეხი. და მან კვლავ დაუწყო ცემა ვირს.

²⁶და კვლავ გაიარა უფლის ანგელოზმა და დადგა ვიწრო ადგილზე, სადაც არ იყო გზა გადასახვევი არც მარჯვნივ და არც მარცხნივ.

²⁷დაინახა ვირმა უფლის ანგელოზი და დაწვა ბილყამის ქვეშ. და აღიგზნო რისხვა ბილყამისა და სცემა ჯოხით ვირს.

²⁸და გაუხსნა უფალმა ბაგე ვირს და უთხრა მან ბილყამს: „რა დაგიშავე, რომ უკვე მესამედა მცემ?“

²⁹და უთხრა ბილყამმა ჭაკ ვირს: „რადგან აბუჩად ამიგდე მე. ხელში მახვილი რომ მქონოდა, ახლავე მოგკლავდი.“

³⁰და უთხრა ვირმა ბილყამს: „განა შენი ვირი არა ვარ, რომლითაც დადიხარ მთელი შენი ცხოვრება დღემდე? განა მჩვევია შენთან ასე მოქცევა?“ და უპასუხა მან: „არა.“

³¹და აუხილა თვალები ბილყამს უფალმა, და იხილა მან უფლის ანგელოზი, მდგომარე გზაზე, და მის ხელში გაშიშვლებული მახვილი. და მუხლი მოიყარა ბილყამმა და თაყვანი სცა პირქვე დამხობილმა.

³²და უთხრა მას უფლის ანგელოზმა: „რად სცემე ვირს მესამეჯერ? მე გამოვედი დასაბრკოლებლად, რადგან უსწორმასწოროა ეს გზა ჩემს წინაშე.

³³დამინახა ვირმა და სამჯერ გადაუხვია ჩემგან. რომ არ გადაეხვია ჩემგან, მოგკლავდი, მას კი ცოცხალს დავტოვებდი.“

³⁴და უთხრა ბილყამმა უფლის ანგელოზს: „შევცოდე მე, რადგან არ ვიცოდი, რომ შენ დგახარ ჩემს გზაზე. და ახლა, თუ ეს ბოროტებაა შენს თვალში, უკან დავბრუნდები.“

³⁵და უთხრა უფლის ანგელოზმა ბილყამს: „წაჰყევი ამ ხალხს, ოღონდ ის ილაპარაკე, რასაც მე გეტყვი.“ და წავიდა ბილყამი ბალაკის მთავრებთან.

³⁶და გაიგო ბალაკმა, რომ მოვიდა ბილყამი, და გამოვიდა მის შესახვედრად მოაბელთა ქალაქში, რომელიც არნონის საზღვარზეა, მის კიდეზე.

³⁷და უთხრა ბალაკმა ბილყამს: „ხომ გამოგიგზავნე მოციქულნი მოსაწვევად? რად არ მოდიოდი ჩემთან? ნუთუ არ შემიძლია შენი პატივისცემა?“

³⁸და უთხრა ბილყამმა ბალაკს: „აჰა, მოვედი შენთან. ახლა კი შემიძლია რაიმეს თქმა? რასაც ჩამიდებს ღმერთი ბაგეებში, იმას ვიტყვი.“

³⁹და წავიდა ბილყამი ბალაკთან, და მივიდნენ კირიათ-ხუცოთში,

⁴⁰და დაკლა ბალაკმა მსხვილფეხა და წვრილფეხა საქონელი, და გაუგზავნა ბილყამს და მთავრებს, რომელნიც იყვნენ მასთან.

⁴¹და დილით წაიყვანა ბალაკმა ბილყამი და აიყვანა ბაყალის გორაკებზე, და იხილა იქიდან ხალხის განაპირა ბანაკი.