Read ბიბლია რიცხ. 23 Bible Online

რიცხ. 23 - ბიბლია bible

რიცხ. 23

¹და უთხრა ბილყამმა ბალაკს: „ამიშენე აქ შვიდი სამსხვერპლო და მომიმზადე აქ შვიდი მოზვერი და შვიდი ვერძი.“

²და გააკეთა ბალაკმა, როგორც ბილყამმა ილაპარაკა, და აიყვანეს ბალაკმა და ბილყამმა თითო მოზვერი და თითო ვერძი თითოეულ სამსხვერპლოზე.

³და უთხრა ბილყამმა ბალაკს: „დადექ შენს სრულადდასაწველთან, მე კი წავალ, იქნებ შემომხვდეს უფალი, და რასაც იგი მაუწყებს, განგიცხადებ.“ და წავიდა იგი მაღლობისკენ.

⁴და გამოეცხადა ღმერთი ბილყამს, და ბილყამმა უთხრა მას: „მოვაწყე შვიდი სამსხვერპლო და ავიტანე თითო მოზვერი და თითო ვერძი თითოეულ სამსხვერპლოზე.“

⁵და ჩაუდო უფალმა სიტყვანი ბილყამს ბაგეში, და უთხრა: „დაბრუნდი ბალაკთან და გადაეცი ეს სიტყვები.“

⁶და დაბრუნდა მასთან, და აჰა, ის უდგას თავის სრულადდასაწველს მოაბის ყველა მთავართან ერთად.

⁷და წარმოთქვა მან თავისი იგავი, და თქვა: „შუამდინარეთიდან მომიყვანა მე ბალაკმა, მოაბის მეფემ ‘აღმოსავლეთის მთებიდან’: წამოდი და დამიწყევლე იაკობი, წამოდი და შეაჩვენე ისრაელი.“

⁸როგორ დავწყევლო? ღმერთი არ წყევლის მას. როგორ შევაჩვენო? უფალს არ შეუჩვენებია!

⁹კლდეთა თხემებიდან ვხედავ მას და ბორცვთაგან მას დავცქერი: აჰა, ცხოვრობს ერი განმარტოებით და ხალხთა შორის არ ირიცხება.

¹⁰ვინ აღრიცხავს იაკობის ქვიშას და ვინ დაითვლის ისრაელის მეოთხედს? მოკვდეს სული ჩემი მართალთა სიკვდილით, და იყოს ჩემი აღსასრული, როგორც მათი.“

¹¹და უთხრა ბალაკმა ბილყამს: „რა მიყავი? ჩემს მტერთა დასაწყევლად მოგიყვანე, შენ კი კურთხევით აკურთხე.“

¹²და უპასუხა მან: „განა რასაც უფალი ჩამიდებს ბაგეებში, ზუსტად ის არ უნდა ვილაპარაკო?“

¹³და უთხრა მას ბალაკმა: „წამოდი ჩემთან სხვა ადგილზე, საიდანაც მას დაინახავ. მაგრამ შენ დაინახავ მხოლოდ მის ნაწილს, მთელს კი ვერ დაინახავ. და დამიწყევლე ის იქიდან.“

¹⁴და წაიყვანა იგი ცოფიმის ველზე, ფისგას მწვერვალზე, და ააშენა შვიდი სამსხვერპლო, და აიყვანა მოზვერი და ვერძი თვითეულ სამსხვერპლოზე.

¹⁵და უთხრა მან ბალაკს: „დადექი აქ შენს სრულადდასაწველთან, მე კი იქ წავალ უფალთან შესახვედრად.“

¹⁶და შეხვდა უფალი ბილყამს, და ჩაუდო სიტყვანი მას ბაგეებში და უთხრა: „დაბრუნდი ბალაკთან და გადაეცი ეს სიტყვები.“

¹⁷და ის მივიდა მასთან, და ნახა, რომ იდგა იგი თავის სრულადდასაწველთან, და მოაბის მთავრებიც მასთან იყვნენ. და უთხრა მას ბალაკმა: „რა თქვა უფალმა?“

¹⁸და წარმოთქვა მან თავისი იგავი: „ადექი, ბალაკ, და ისმინე და ყური მიგდე, ციფორის ძეო.

¹⁹ღმერთი კაცი როდია, რომ იცრუოს, და არც ადამიანის ძეა, რომ გადათქვას. თქვას და არ გააკეთოს? ილაპარაკოს და არ აღასრულოს?

²⁰აჰა, კურთხევა მებრძანა და მან აკურთხა, და ვერ დავაბრუნებ.

²¹არ შეუმჩნევია სიცრუე იაკობში და არ დაუნახავს უკეთურება ისრაელში. უფალი, მისი ღმერთი, მასთანაა, და მეფური ჟინია მასში.

²²ღმერთმა გამოიყვანა ისინი ეგვიპტიდან. ძლიერება მარტორქისა აქვს მას.

²³რადგან არაა მისნობა იაკობის წინააღმდეგ. და არაა ჯადოქრობა ისრაელის წინააღმდეგ. თავის დროზე ეტყვიან იაკობსა და ისრაელს: ‘რა მოიმოქმედა ღმერთმა.’

²⁴აჰა, ხალხი ლომის ბოკვერივით წამოდგება და ლომივით წამოიმართება. სანამ ნანადირევს არ შეჭამს და მოკლულთა სისხლს არ შესვამს, არ დაწვება.“

²⁵და უთხრა ბალაკმა ბილყამს: „ნურც დაწყევლი და ნურც აკურთხებ მას!“

²⁶და მიუგო ბილყამმა, და უთხრა ბალაკს: „განა არ გითხარი, რომ ყოველივეს, რასაც უფალი მეტყვის, გავაკეთებ-მეთქი?“

²⁷და უთხრა ბალაკმა ბილყამს: „წამოდი, სხვა ადგილას წაგიყვან. იქნებ სასურველი იყოს ღმერთის თვალში და დამიწყევლო იქიდან.“

²⁸და წაიყვანა ბალაკმა ბილყამი ფეღორის მწვერვალზე, რომელიც გადმოჰყურებს უდაბნოს.

²⁹და უთხრა ბილყამმა ბალაკს: „ამიშენე შვიდი სამსხვერპლო და მომიმზადე აქ შვიდი მოზვერი და შვიდი ვერძი.“

³⁰და გააკეთა ბალაკმა, როგორც უთხრა ბილყამმა, და აიყვანა მოზვერი და ვერძი თვითეულ სამსხვერპლოზე.