Read ბიბლია რიცხ. 25 Bible Online

რიცხ. 25 - ბიბლია bible

რიცხ. 25

¹და ცხოვრობდა ისრაელი შიტიმში, და იწყო ხალხმა მრუშობა მოაბელ ასულებთან.

²და იწვევდნენ ისინი ხალხს თავიანთი ღმერთების შესაწირავებზე, და ჭამა ხალხმა და თაყვანი სცა მათ კერპებს.

³და მიეტმასნა ისრაელი ბაყალ-ფეღორს, და აღიგზნო რისხვა უფლისა ისრაელზე.

⁴და უთხრა უფალმა მოსეს: „მოიყვანე ყოველი მთავარი ხალხისა და ჩამოკიდე ისინი მზისით უფლის წინაშე, და გადავა მძვინვარება უფლის რისხვისა ისრაელისაგან.“

⁵და უთხრა მოსემ ისრაელის მსაჯულებს: „მოკლას თითოეულმა თავისი კაცები, ვინც კი ბაყალ-ფეღორს მიეტმასნა.“

⁶და ერთხელ ვიღაცა ისრაელის ძეთაგანი მოვიდა და მოიყვანა თავის ძმებთან მიდიანელი ქალი, მოსეს თვალწინ და ისრაელის ძეთა მთელი თემის თვალწინ. და ისინი ტიროდნენ საკრებულო კარვის შესასვლელთან.

⁷და იხილა ფინხასმა, აარონ მღვდლის ძის ელეაზარის ძემ, და ადგა თემის შუაგულიდან და აიღო შუბი ხელში.

⁸და მიჰყვა ისრაელის ძის კვალს მის საწოლში და გააპო ორივე შუბით, ისრაელის ძე და ის ქალი — მუცელზე. და შეწყდა მუსვრა ისრაელის ძეთა.

⁹და გაწყდა მუსვრის დროს ოცდაოთხი ათასი კაცი.

¹⁰და უთხრა უფალმა მოსეს:

¹¹„ფინხასმა, აარონ მღვდლის ძის, ელეაზარის ძემ, დააცხრო ჩემი რისხვა ისრაელის ძეებზე, რადგან შური იძია ჩემს გამო მათ შორის. და არ მოვსპე მე ისრაელის ძენი ჩემი შურით.

¹²ამიტომ უთხარი მას: აჰა, მე ვაძლევ მას მშვიდობის აღთქმას.

¹³და ეს იყოს მისთვის და მისი თესლისათვის მის შემდგომ მღვდლობის საუკუნო აღთქმად, იმისათვის, რომ შური იძია თავისი ღმერთისთვის და გამოისყიდა ისრაელის ძენი.“

¹⁴ხოლო სახელი მოკლული ისრაელის ძისა, რომელიც მოკლულ იქნა მიდიანელ ქალთან, იყო ზიმრი, სალუს ძე, სიმონიანთა შტოს მამამთავარი.

¹⁵და სახელი მოკლული მიდიანელი ქალისა იყო ქოზბი, ასული ცურისა, რომელიც იყო უბოთის მამისსახლის მთავარი მიდიანში.

¹⁶და უთხრა უფალმა მოსეს:

¹⁷„უმტრეთ მიდიანელებს და მუსრი გაავლეთ,

¹⁸ვინაიდან მტრულად მოგექცნენ ისინი თავიანთი მზაკვრობით, როცა გაცდუნეს თქვენ ფეღორის ამბით, და ქოზბის, მიდიანელი მთავრის ასულის ამბით, თავიანთი დით, რომელიც მოიკლა მუსვრის დღეს ფეღორის გამო.“