Read ბიბლია რიცხ. 3 Bible Online

რიცხ. 3 - ბიბლია bible

რიცხ. 3

¹ეს არის აარონისა და მოსეს საგვარეულოები იმ დღისთვის, როდესაც უფალი ელაპარაკა მოსეს სინაის მთაზე.

²და ესენია აარონის ძეთა სახელები: პირმშო ნადაბი, აბიჰუ, ელეაზარი და ითამარი.

³ესაა აარონის ძეთა სახელები, ცხებული მღვდლებისა, რომელნიც მან სამღვდელოდ აკურთხა.

⁴და დაიხოცნენ ნადაბი და აბიჰუ უფლის წინაშე, როცა მათ მიიტანეს უცხო ცეცხლი უფლის წინაშე სინაის უდაბნოში, და შვილები არ ჰყავდათ მათ; და მღვდლობას ეწეოდნენ ელეაზარი და ითამარი აარონის, თავიანთი მამის, გვერდით.

⁵და უთხრა უფალმა მოსეს:

⁶„მიიყვანე ტომი ლევისა და დააყენე ის აარონ მღვდლის წინაშე, რომ ემსახურონ მას.

⁷და შეასრულონ მოვალეობა მისდამი და მოვალეობა მთელი ერისადმი საკრებულო კარვის წინ, რათა შეასრულონ კარვის სამსახური.

⁸და დაიცვან საკრებულო კარვის ყოველი ნივთი და ისრაელის ძეთა დამცველად იდგნენ, რათა აღასრულონ აღთქმის კარვის სამსახური.

⁹და ჩააბარე ლევიანები აარონსა და მის ძეებს, და სრულად ჩაბარებულნი არიან ისინი მისთვის ისრაელის ძეთაგან.

¹⁰აარონსა და მის ძეებს დაავალე, რომ მათ დაიცვან თავიანთი მღვდლობა, და უცხო, ვინც კი მიეკარება, მოიკლას“.

¹¹და უთხრა უფალმა მოსეს:

¹²„და აჰა, ავიყვან ლევიანებს ისრაელის ძეთაგან ყოველი პირმშოს ნაცვლად, რომელიც გახსნის საშოს. და ჩემები იქნებიან ლევიანები.

¹³რადგან ჩემია ყოველი პირმშო; იმ დღეს, როცა განვგმირე ყოველი პირმშო ეგვიპტის ქვეყანაში, ჩემთვის განვიკუთნე ყოველი პირმშო ისრაელში; ადამიანიდან პირუტყვამდე ჩემები არიან, მე ვარ უფალი.“

¹⁴და უთხრა უფალმა მოსეს სინაის უდაბნოში:

¹⁵„აღრიცხე ლევიანები მათი მამისსახლებისა და მათ საგვარეულოთა მიხედვით. ყოველი მამროვანი, ერთი თვის ასაკიდან მოყოლებული და უფროსი, აღრიცხე ისინი.“

¹⁶და აღრიცხა ისინი მოსემ უფლის სიტყვისამებრ, როგორც ებრძანა.

¹⁷და იყვნენ ესენი ლევიანები თავიანთი სახელების მიხედვით: გერშონი, კეჰათი და მერარი.

¹⁸და ესენია გერშონიანთა სახელები მათი საგვარეულოების მიხედვით: ლიბნი და შიმყი.

¹⁹და კეჰათიანები თავიანთი საგვარეულოების მიხედვით: ყამრამი, იცჰარი, ხებრონი და ყუზიელი.

²⁰და ძენი მერარისა თავიანთი საგვარეულოებით: მახლი და მუში. ესაა ლევიანთა საგვარეულო მათი მამისსახლებითურთ.

²¹გერშონისაგან: ლიბნის საგვარეულო და საგვარეულო შიმყისა. ესაა საგვარეულო გერშონისა.

²²ყოველი მამროვანი, აღრიცხული ერთი თვის ასაკიდან და უფროსი, შეადგენდა შვიდი ათას ხუთასს.

²³გერშონის საგვარეულოს უნდა დაებანაკა კარვის უკან, დასავლეთით.

²⁴და გერშონის მამისსახლის მთავარი იყო ელიასაფი, ძე ლაელისა.

²⁵და გერშონის ძეთ ებარათ საკრებულო კარავი, კარავი და საფარველი მისი, და საკრებულო კარვის შესასვლელის ფარდა.

²⁶და ეზოს ფარდები, და ფარდა ეზოს შესასვლელისა, რომელიც კარვისა და სამსხვერპლოს გარშემოა, და მისი საბელები ყოველი მათი აღჭურვილობით.

²⁷და კეჰათისაგან ყამრამის საგვარეულო და საგვარეულო იცჰარისა, და საგვარეულო ხებრონისა, და საგვარეულო ყუზიელისა. ეს იყო საგვარეულოები კეჰათისა.

²⁸ყოველი მამროვანი აღრიცხული, ერთი თვის ასაკიდან და უფროსი, შეადგენდა რვა ათას ექვსასს, საწმიდრის მოვალეობის შემსრულებელს.

²⁹კეჰათიანთა საგვარეულოებს უნდა დაებანაკათ კარვის გვერდით, სამხრეთისაკენ.

³⁰და კეჰათის საგვარეულოების მამისსახლის მთავარი იყო ელიცაფანი, ძე ყუზიელისა.

³¹და მათ ებარათ კიდობანი და ტაბლა, და ლამპარი და სამსხვერპლონი და წმიდა ჭურჭლეული მსახურებისათვის, და ფარდა და მთელი მისი მოწყობილობა.

³²და ლევიანთა მთავართა მთავარი იყო ელეაზარი, ძე აარონ მღვდლისა. მას ჰქონდა ზედამხედველობა მათზე, ვინც საწმიდრის სამსახურს ასრულებდა.

³³მერარისაგან იყო საგვარეულო მახლისა და საგვარეულო მუშისა. ეს იყო საგვარეულოები მერარისა.

³⁴ყოველი მამროვანი აღრიცხული, ერთი თვის ასაკიდან და უფროსი, იყო ექვსი ათას ორასი.

³⁵და მერარის საგვარეულოს მამისსახლის მთავარი იყო ცურიელი, ძე აბიხაილისა. კარვის გვერდით უნდა დაებანაკათ, ჩრდილოეთით.

³⁶და მერარის ძეთ ებარათ კარვის ძელები, მისი ურდულები, მისი სვეტები, მისი კვარცხლბეკები, მისი ჭურჭლეულობა და მათი ყოველი მოწყობილობა,

³⁷და სვეტები ეზოს გარშემო, და მათი კვარცხლბეკები, და მათი პალოები და მათი საბელები.

³⁸და კარვის წინ, საკრებულო კარვის წინ, აღმოსავლეთით, უნდა დაებანაკათ მოსეს, აარონს და მის ძეებს, რომელთაც ევალებოდათ საწმიდრის დაცვა ისრაელის ძეთა შორის. და უცხო, ვინც კი მიუახლოვდებოდა, უნდა მომკვდარიყო.

³⁹ყოველი ლევიანი, რომელიც უფლის ბრძანებით აღრიცხეს მოსემ და აარონმა მათი საგვარეულოებითურთ, ყოველი მამროვანი, ერთი თვის ასაკიდან და უფროსი, იყო ოცდაორი ათასი.

⁴⁰და უთხრა უფალმა მოსეს: „აღრიცხე ყოველი პირმშო მამროვანი ისრაელის ძეთაგან, ერთი თვის ასაკიდან და უფროსი, გადათვალე ისინი სახელებით.

⁴¹და აიყვანე ლევიანები ჩემთვის, მე ვარ უფალი, ყოველი პირმშოს ნაცვლად ისრაელის ძეთაგან, ხოლო ლევიანთა საქონელი ისრაელის ძეთა ყოველი პირველმოგებული საქონლის ნაცვლად.“

⁴²და აღრიცხა მოსემ, როგორც უბრძანა უფალმა მას, ყოველი პირმშო ისრაელის ძეთაგან.

⁴³და იყო ყოველი პირმშო მამროვანი სახელთა რიცხვის მიხედვით, ერთი თვის ასაკიდან და უფროსი, მათი აღწერით ოცდაორი ათას ორას სამოცდაცამეტი.

⁴⁴და უთხრა უფალმა მოსეს:

⁴⁵„აიყვანე ლევიანები ისრაელის ძეთა ყოველი პირმშოს ნაცვლად, და საქონელი ლევიანებისა მათი საქონლის ნაცვლად, და იქნებიან ლევიანები ჩემთვის. მე ვარ უფალი.

⁴⁶და რაც შეეხება ორას სამოცდაცამეტის გამოსყიდვას, რაც ზედმეტია ლევიანთა რიცხვზე, ისრაელის ძეთა პირმშოთაგან,

⁴⁷აიღე ხუთ-ხუთი შეკელი ყოველ სულზე საწმიდრის შეკელის მიხედვით, რომელიც იწონის ოც გერას,

⁴⁸და მიეცი ეს ვერცხლი აარონს და მის ძეთ მათგან ზედმეტის გამოსასყიდად.“

⁴⁹და აიღო მოსემ გამოსასყიდი ვერცხლი ლევიანთა მიერ შენაცვლებული რიცხვის ნამეტისაგან.

⁵⁰ისრაელის ძეთა პირმშოთაგან აიღო ეს ვერცხლი, ათას სამას სამოცდახუთი შეკელი საწმიდრის შეკელით.

⁵¹და მისცა მოსემ ეს გამოსასყიდი ვერცხლი აარონსა და მის ძეებს უფლის სიტყვისამებრ, როგორც უბრძანა უფალმა მოსეს.