Read ბიბლია რიცხ. 32 Bible Online

რიცხ. 32 - ბიბლია bible

რიცხ. 32

¹და მრავალი საქონელი ჰყავდათ რეუბენის ძეთ და გადის ძეთ. და იხილეს ქვეყანა იაყზერისა და ქვეყანა გილყადისა, და იყო ადგილი საქონლისათვის.

²და მივიდნენ გადის ძენი და რეუბენის ძენი, და უთხრეს მოსეს და ელეაზარ მღვდელს და თემის მთავრებს:

³„ყატაროთი, დიბონი, იაყზერი, ნიმრა, ხეშბონი, ელყალე, სებამი, ნებო და ბეყონი —

⁴ქვეყანა, რომელიც მოსრა უფალმა ისრაელის თემის წინაშე, ეს ქვეყანა საქონლისათვისაა, და შენს მსახურთ საქონელი ჰყავთ.“

⁵და კიდევ უთხრეს: „თუ ვპოვეთ ჩვენ მადლი შენს თვალში, მიეცეს ეს ქვეყანა შენს მსახურთ სამფლობელოდ. ნუ გადაგვიყვან ჩვენ იორდანეს გაღმა.“

⁶და უთხრა მოსემ გადის ძეთ და რეუბენის ძეთ: „თქვენი ძმები ომში წავლენ და თქვენ აქ ისხდებით?

⁷და რისთვის უცრუებთ გულს ისრაელის ძეთ იმ ქვეყანაში გადასვლაზე, რომელიც მისცა მათ უფალმა?

⁸ასე მოიქცნენ თქვენი მამები, როცა გავგზავნე ისინი კადეშ-ბარნეადან ქვეყნის დასაზვერად.

⁹და მივიდნენ ისინი ეშქოლის ხეობამდე და იხილეს ქვეყანა, და გული აუცრუეს ისრაელის ძეთ, რათა არ შესულიყვნენ იმ ქვეყანაში, რომელიც მისცა მათ უფალმა.

¹⁰და აღიგზნო რისხვა უფლისა იმ დღეს, და დაიფიცა მან და თქვა:

¹¹‘აბა, თუ იხილონ ეგვიპტიდან გამოსულმა კაცებმა, ოცი წლის ასაკიდან და უფროსებმა, ის ქვეყანა, რომელზეც შევფიცე აბრაამს, ისაკს და იაკობს, რადგან არ მომდევენ მე.

¹²გარდა ქალებისა — კენიზელი იეფუნეს ძისა — და იესო ნავეს ძისა, რადგან მათ მისდიეს უფალს’.

¹³და აღიგზნო რისხვა უფლისა ისრაელზე და ახეტიალა იგი უდაბნოში ორმოცი წელიწადი, ვიდრე არ გადაშენდა მთელი თაობა, რომელიც ბოროტს აკეთებდა უფლის თვალში.

¹⁴და აჰა, ახლა თქვენ აღმდგარხართ თქვენი მამების მაგიერ, ცოდვილ კაცთა ნაშიერნო, რათა კვლავ გააძლიეროთ უფლის აღგზნებული მრისხანება ისრაელის მიმართ.

¹⁵თუ ზურგს შეაქცევთ მას, ის კვლავ მიატოვებს მას უდაბნოში, და დაღუპავთ მთელ ამ ხალხს.“

¹⁶და ეახლნენ ისინი მას, და უთხრეს: „ჩვენ აქ ავაშენებთ ცხვრის ფარეხებს ჩვენი საქონლისათვის და ქალაქებს ჩვენი ბავშვებისათვის.

¹⁷ჩვენ თვითონ კი უმალ შევიარაღდებით და წავუძღვებით ისრაელის ძეთ, ვიდრე მათ თავ-თავიანთ ადგილზე არ მივიყვანთ. ხოლო ჩვენი ბავშვები დარჩებიან გამაგრებულ ქალაქებში, ამ ქვეყნის მკვიდრთა გამო.

¹⁸არ დავბრუნდებით ჩვენს სახლებში, ვიდრე არ დაიმკვიდრებს ისრაელის ძეთაგან თითოეული თავის სამკვიდრებელს.

¹⁹რადგან არ დავიმკვიდრებთ მათთან ერთად იორდანეს გაღმა და უფრო შორს, თუ ჩვენ გვერგება ჩვენი სამკვიდრებელი იორდანეს გამოღმა, აღმოსავლეთ მხარეს.“

²⁰და უთხრა მათ მოსემ: „თუ გააკეთებთ ამას, თუ შეიარაღებულნი გახვალთ საომრად უფლის წინაშე,

²¹და თითოეული თქვენთაგანი შეიარაღებული გადავა იორდანეს გაღმა უფლის წინაშე, ვიდრე არ განდევნის უფალი თავის მტრებს თავის წინაშე,

²²და დაპყრობილი იქნება ქვეყანა უფლის წინაშე: მერე დაბრუნდებით და უბრალონი იქნებით უფალთან და ისრაელთან, თქვენი სამფლობელო იქნება ის ქვეყანა უფლის წინაშე.

²³თუ ასე არ გააკეთებთ, აჰა, შეგიცოდავთ უფლისათვის, და იცოდეთ, რომ თქვენი ცოდვა გიპოვით თქვენ.

²⁴აიშენეთ ქალაქები თქვენი ბავშვებისათვის და ფარეხები თქვენი წვრილფეხა საქონლისათვის, და ის, რაც თქვენი პირიდან გამოვიდა, შეასრულეთ“.

²⁵და უთხრეს მოსეს გადის ძეთ და რეუბენის ძეთ: „შენი მსახურნი ისე მოიქცევიან, როგორც ჩვენი ბატონი გვიბრძანებს.

²⁶ჩვენი ბავშვები და ჩვენი ცოლები, ჩვენი ჯოგები და მთელი ჩვენი საქონელი დარჩებიან აქ, გილყადის ქალაქებში.

²⁷და ყოველი შენი შეიარაღებული მსახური გავა ომში, როგორც მეომარი, უფლის წინაშე, როგორც ამბობს ჩვენი ბატონი.“

²⁸და უბრძანა მათ შესახებ მოსემ ელეაზარ მღვდელს, იესო ნავეს ძეს, და ისრაელის ძეთა ტომების მამისსახლთა მთავრებს.

²⁹და უთხრა მათ მოსემ: „თუ გადავლენ გადის ძენი და რეუბენის ძენი თქვენთან ერთად იორდანეს გაღმა საომრად შეიარაღებულნი უფლის წინაშე, და დაპყრობილ იქნება ის ქვეყანა თქვენს წინაშე, მაშინ მისცემთ მათ გილყადის ქვეყანას სამფლობელოდ.

³⁰ხოლო თუ არ გადმოვლენ შეიარაღებულნი თქვენთან ერთად, მაშინ ისინიც მიიღებენ სამფლობელოს თქვენს შორის ქანაანის ქვეყანაში.“

³¹და მიუგეს გადის ძეთ და რეუბენის ძეთ: „როგორც უფალმა უთხრა შენს მსახურთ, ისე გავაკეთებთ.

³²ჩვენ გადავალთ შეიარაღებულნი უფლის წინაშე ქანაანის ქვეყანაში და ჩვენი სამკვიდრებლის სამფლობელო, იორდანეს გამოღმა გვექნება.“

³³და მისცა მათ მოსემ, გადის ძეთ და რეუბენის ძეთ, და იოსების ძის, მენაშეს ნახევარტომს, სამეფო სიხონისა, ამორეველთა მეფისა, და სამეფო ყოგისა, ბაშანის მეფისა, ქვეყანა მისი ქალაქებითა და საზღვრებითურთ, ამ ქვეყნის ქალაქები ირგვლივ.

³⁴ააშენეს გადის ძეთ დიბონი, ყატაროთი, ყაროყერი,

³⁵და ყაროთ-შოფანი, იაყზერი, იაგბეჰა,

³⁶და ბეთნიმრა და ბეთხარანი, გამაგრებული ქალაქები ცხვრის ფარეხებითურთ.

³⁷და რეუბენის ძეთ ააშენეს ხეშბონი, ელყალე და კირიათაიმი,

³⁸და ნებო და ბაყალ-მეყონი, რომელთაც სახელები შეუცვალეს, და სიბმა; და უწოდეს სახელები ქალაქებს, რომელნიც მათ ააშენეს.

³⁹და წავიდნენ ძენი მაქირისა, მენაშეს ძისა, გილყადში, და დაიპყრეს იგი, და განდევნეს ამორეველნი, რომელნიც იყვნენ იქ.

⁴⁰და მისცა მოსემ გილყადი მაქირს, მენაშეს ძეს, და ის დამკვიდრდა იქ.

⁴¹და იაირი, მენაშეს ძე, წავიდა და დაიპყრო მათი სოფლები, და უწოდა მათ იაირის სოფლები.

⁴²და წავიდა ნობახი და დაიპყრო კენათი და მისი გარეუბნები და უწოდა მას ნობახი თავისი სახელის მიხედვით.