Read ბიბლია რიცხ. 4 Bible Online

რიცხ. 4 - ბიბლია bible

რიცხ. 4

²„აღრიცხე ძენი კეჰათისა ლევიანთაგან მათი საგვარეულოებისა და მათი მამისსახლის მიხედვით.

³ოცდაათი წლის ასაკიდან და ზემოთ ორმოცდაათი წლის ასაკამდე ყოველი, ვისაც შეუძლია სამსახური საკრებულო კარავში.

⁴ესაა კეჰათიანთა სამსახური საკრებულო კარავში, წმიდათა წმიდაში:

⁵შევიდნენ აარონი და მისი ძენი ბანაკის აყრისას, ჩამოხსნან ჩამოსაფარებელი ფარდა და დაფარონ იმით მოწმობის კიდობანი.

⁶და ზედ დააფარონ მაჩვის ტყავის საბურველი, და გადააფარონ ცისფერი გადასაფარებელი ზემოდან, და გაუყარონ კეტები.

⁷და საწინაშეოს ტაბლაზე გაშლიან ცისფერ სამოსელს და მასზე დააწყობენ ლანგრებს და კოვზებს, ჯამებსა და საღვრელ ფიალებს. და მუდმივი პური უნდა იყოს მასზე.

⁸და გაშლიან მასზე ჭიაფერ გადასაფარებელს, და დაფარავენ მას მაჩვის ტყავის საბურველით, და გაუყრიან კეტებს.

⁹და აიღებენ ცისფერ გადასაფარებელს და შეახვევენ სასანთლეს და მის კანდელებს, და მის მაშებს, და მის აქანდაზებს, და ყოველ ჭურჭლეულს მისი ზეთისთვის, რომლითაც მსახურებენ მას.

¹⁰და მოათავსებენ მას და ყოველ მის ჭურჭლეულს მაჩვის ტყავის საფარველში და ჩამოკიდებენ ლატანზე.

¹¹და ოქროს სამსხვერპლოზე გაშლიან ცისფერ გადასაფარებელს, და მას დაბურავენ მაჩვის ტყავის საფარველით, და გაუყრიან მის კეტებს.

¹²და აიღებენ ყოველ სასამსახურო ჭურჭელს, რომლებითაც მსახურებენ საწმიდარში, და დააწყობენ ცისფერ გადასაფარებელზე და დაბურავენ მათ მაჩვის ტყავის საბურველით და ჩამოკიდებენ ლატანზე.

¹³და გაასუფთავებენ სამსხვერპლოს ნაცრისგან და გაშლიან მასზე მეწამულ გადასაფარებელს.

¹⁴და დააწყობენ მასზე ყოველ მის ჭურჭლეულს, რომლითაც მსახურებენ მასზე: აქანდაზებს, ჩანგლებს და ნიჩბებს, და სასხურებლებს — სამსხვერპლოს ყოველ ჭურჭლეულობას, და გაშლიან მასზე საბურველს მაჩვის ტყავისას და გაუყრიან მის კეტებს.

¹⁵და როცა აარონი და მისი ძენი დაასრულებენ საწმიდრისა და ყოველი წმიდა ჭურჭლეულის დაბურვას ბანაკის აყრისას, მხოლოდ ამის შემდეგ შევლენ კეჰათის ძენი ასაწევად. არ უნდა მიეკარონ საწმიდარს, რათა არ მოკვდნენ. ესაა კეჰათის ძეთა ტვირთი საკრებულო კარავისა.

¹⁶აარონ მღვდლის ძეს ელეაზარს ევალება ზედამხედველობა ლამპრის ზეთზე, კეთილსურნელოვან საკმეველზე, მუდმივი პურის შესაწირავზე და ზეთსაცხებელზე, ზედამხედველობა მთლიანად კარავზე და ყოველივეზე, რაც მასშია, საწმიდარზე და მის ჭურჭლეულზე.“

¹⁷და უთხრა უფალმა მოსეს და აარონს:

¹⁸„ნუ მოკვეთავთ კეჰათის საგვარეულოთა ტომს ლევიანთაგან.

¹⁹ეს უნდა გააკეთოთ მათთვის, რომ იცოცხლონ და არ დაიხოცონ: რაჟამს მივლენ ისინი წმიდათა წმიდასთან: აარონი და მისი ძენი მივიდნენ და გაამწესონ ისინი თითოეული თავის სამსახურზე და თავის ტვირთთან.

²⁰და ნუ მივლენ საწმიდრის შებურვის სახილველად, რათა არ დაიხოცონ.“

²¹და უთხრა უფალმა მოსეს:

²²„აღრიცხე აგრეთვე გერშონის ძენი მათი მამისსახლისა და მათი საგვარეულოების მიხედვით.

²³ოცდაათი წლის ასაკიდან და ზემოთ ორმოცდაათი წლის ასაკამდე აღრიცხე ყველა ისინი, ვისაც შეუძლია სამსახურში ჩადგომა, რათა შეასრულოს სამსახური საკრებულო კარავში.

²⁴ეს გერშონის საგვარეულოთა სამსახურია, მსახურებად და ტვირთვად.

²⁵მათ უნდა ატარონ სავანის, საკრებულო კარვის გადასაფარებლები, მისი საბურველი და მაჩვის საბურველი, რომელიც მასზეა ზემოდან, და ფარდა საკრებულო კარვის შესასვლელისა.

²⁶და ეზოს ფარდები, და ფარდა ეზოს კარიბჭის შესასვლელისა, რომელიც აღთქმის კარვისა და სამსხვერპლოს ირგვლივაა, და მათი საბელები, და მათი ყოველი სამსახურებელი ჭურჭლეულობა, და ყოველივე, რაც უნდა გაკეთდეს მათთან, მათ გააკეთონ.

²⁷აარონისა და მის ძეთა ბრძანების მიხედვით იყოს გერშონის ძეთა ყოველი მსახურება, მათი ყოველი ტვირთვისა და მათი ყოველი სამსახურისთვის. და მათ დაავალეთ დაცვა ყოველივესი, რასაც ისინი ატარებენ.

²⁸ესაა გერშონის ძეთა საგვარეულოს სამსახური კრებულის კარავში, და მათი მოვალეობანი აარონის ძის, ითამარის ზედამხედველობით.

²⁹მერარის ძენი მათი საგვარეულოს, მათი მამისსახლის მიხედვით აღრიცხე.

³⁰ოცდაათი წლის ასაკიდან და ზევით ორმოცდაათი წლის ასაკამდე აღრიცხე ისინი, ყოველი, ვისაც შუძლია სამსახურში ჩადგომა, რათა შეასრულოს სამსახური საკრებულო კარვისა.

³¹და ესაა მათი ვალდებულება, რომ ატარონ მთელი მათი სამსახურისას საკრებულო კარავში: კარვის ძელები, მისი ურდულები, მისი სვეტები და მისი კვარცხლბეკები.

³²და ეზოს გარეშემო სვეტები, და მათი კვარცხლბეკები, და მათი პალოები, და მათი საბელები, და მათი ყოველი ჭურჭლეულობა, და მათი ყოველი სამსახურებელი. სახელდებით აღრიცხეთ საგნები, რომლებიც მათ უნდა ატარონ.

³³ეს მერარის ძეთა საგვარეულოს სამსახურია. ყოველი მათი სამსახური საკრებულო კარავთან აარონ მღვდლის ძის, ითამარის ხელშია.“

³⁴მოსემ და აარონმა და თემის მთავრებმა აღრიცხეს კეჰათის ძენი მათი საგვარეულოებისა და მათი მამისსახლების მიხედვით.

³⁵ოცდაათი წლის ასაკიდან და ზევით ორმოცდაათი წლის ასაკამდე ყოველი, ვისაც შეუძლია სამსახურში ჩადგომა, კარავში მსახურებისათვის.

³⁶და იყო აღრიცხული მათი საგვარეულოების მიხედვით ორი ათას შვიდას ორმოცდაათი.

³⁷ესენი იყვნენ აღრიცხულნი კეჰათის საგვარეულოდან, ყოველნი, რომელნიც მსახურებდენ საკრებულო კარავში, რომელნიც აღრიცხეს მოსემ და აარონმა უფლის ბრძანებით, მოსეს ხელით.

³⁸და აღრიცხულნი გერშონის ძეთაგან მათი საგვარეულოებისა და მათი მამისსახლების მიხედვით,

³⁹ოცდაათი წლის ასაკიდან და ზევით ორმოცდაათი წლის ასაკამდე, ყოველი, ვისაც შეეძლო სამსახურში ჩადგომა საკრებულო კარავში მსახურებისათვის.

⁴⁰და იყვნენ აღრიცხულნი, მათი საგვარეულოების, მათი მამისსახლის მიხედვით, ორი ათას ექვსას ოცდაათი.

⁴¹ესენი იყვნენ აღრიცხულნი გერშონის ძეთა საგვარეულოდან, ყოველნი, ვინც მსახურებდნენ საკრებულო კარავში, რომელნიც აღრიცხეს მოსემ და აარონმა უფლის ბრძანებით.

⁴²და აღრიცხულნი მერარის ძეთა საგვარეულოდან მათი საგვარეულოებისა და მათი მამისსახლების მიხედვით,

⁴³ოცდაათი წლის ასაკიდან ორმოცდაათი წლის ასაკამდე ყოველი, ვისაც შეეძლო სამსახურში ჩადგომა, საკრებულო კარავში მსახურებისათვის.

⁴⁴და იყო აღრიცხული მათი საგვარეულოების მიხედვით სამი ათას ორასი.

⁴⁵ესენი იყვნენ აღრიცხულნი მერარის საგვარეულოდან, რომელნიც აღრიცხეს მოსემ და აარონმა უფლის ბრძანებით, მოსეს ხელით.

⁴⁶და ყოველი, ვინც აღრიცხეს მოსემ და აარონმა და ისრაელის მთავრებმა ლევიანთაგან მათი საგვარეულოებისა და მათი მამისსახლების მიხედვით,

⁴⁷ოცდაათი წლის ასაკიდან და ზევით ორმოცდაათი წლის ასაკამდე, ყოველი, ვისაც შეეძლო სამსახურში ჩადგომა საკრებულო კარავში და ტვირთის ზიდვა,

⁴⁸იყო აღრიცხული რვა ათას ხუთას ოთხმოცი.

⁴⁹უფლის ბრძანებით, მოსეს ხელით აღრიცხეს ისინი — თითოეული თავის სამსახურზე და თავის ტვირთის ზიდვაზე, და თითოეული აღირიცხა, როგორც უბრძანა უფალმა მოსეს.