Read ბიბლია რიცხ. 6 Bible Online

რიცხ. 6 - ბიბლია bible

რიცხ. 6

¹და უთხრა უფალმა მოსეს:

²„განუცხადე ისრაელის ძეთ და უთხარი მათ: ‘თუ კაცმა ან ქალმა აღუთქვას მოწმიდრობის აღთქმა, რათა მიუძღვნას თავისი თავი მოწმიდრად უფალს,

³მაშინ ღვინისაგან და სასმელებისაგან თავი უნდა შეიკავოს; ღვინის და სასმელის ძმარი არ იხმაროს, ყურძნის არავითარი ნაყენი არა სვას, და ახალი და გამხმარი ყურძენი არა ჭამოს.

⁴მთელი თავისი მოწმიდრობის დღეებში არაფერი არ ჭამოს, რაც კეთდება ყურძნისაგან, მისი წიპწიდან ჩენჩომდე.

⁵თავისი მოწმიდრობის აღთქმის მთელ დროს სამართებელმა არ გადაიაროს მის თავზე. ვიდრე შესრულდებოდეს დღენი, რომელნიც შესწირა უფალს, წმიდა იყოს იგი, თმა მოუშვას თავზე.

⁶უფლის მოწმიდრობის მთელ დღეებში მკვდარს არ მიეკაროს.

⁷თავისი მამის და დედის, ძმისა და დის გამოც არ შეიბილწოს, მათი სიკვდილის დროს, რადგან მის თავზეა მისი ღვთის მოწმიდრობა.

⁸მთელი თავისი მოწმიდრობის დღეებში იგი წმიდაა უფლისათვის.

⁹და თუ ვინმე მოკვდეს მასთან უეცრივ, მოულოდნელად, და შებილწოს მან თავისი მოწმიდრობის თავი, მაშინ მან გაიპარსოს თავი განწმედის დღეს. მეშვიდე დღეს გაიპარსოს იგი.

¹⁰და მერვე დღეს მიუყვანოს ორი გვრიტი ან ორი მტრედის ხუნდი მღვდელს საკრებულო კარვის შესასვლელთან.

¹¹და მოამზადებს მღვდელი ერთს ცოდვისთვის, ხოლო მეორეს — სრულადდასაწველად, და შეუნდობს მას, რაც შესცოდა მკვდრის გამო, და განწმედს მის თავს იმავე დღეს.

¹²და ხელახლა დაიწყოს უფლის მოწმიდრობის დღენი და მიიტანოს ერთწლიანი კრავი დანაშაულისთვის. და პირვანდელი დღეები გაუქმდება, რადგან შეიბილწა მისი მოწმიდრობა.

¹³ესაა რჯული მოწმიდრობისა: მისი მოწმიდრობის დღეთა შესრულებისას იგი მიყვანილ უნდა იქნას საკრებულო კარვის შესასვლელთან,

¹⁴და იგი შესწირავს თავის მსხვერპლს უფალს: ერთწლიან უმანკო კრავს სრულადდასაწველად და ერთწლიან უმანკო დედალ კრავს ცოდვისათვის, და ერთ უმანკო ვერძს — სამშვიდობო შესაწირავად,

¹⁵ერთი კალათა წმიდა ხორბლის ფქვილის ხმიადებს, ზეთში მოზელილ ნამცხვრებს, ზეთწაცხებულ უსაფუვრო კვერებს, მათ ძღვენსა და მათ საღვრელებს.

¹⁶და ამას მღვდელი მიიტანს უფლის წინაშე, და შესწირავს მისი ცოდვისათვის და სრულადდასაწველად.

¹⁷შესწირავს ვერძს სამშვიდობო მსხვერპლად უფლისათვის ერთ კალათა ხმიადებთან ერთად. ასევე მოამზადებს მღვდელი მათ ძღვენსა და საღვრელს.

¹⁸და გადაიპარსავს მოწმიდარი კარვის შესასვლელთან თავის სამოწმიდრო თავს, და აიღებს თავისი სამოწმიდრო თავის თმას, და ჩააგდებს ცეცხლში, რომელიც სამშვიდობო მსხვერპლის ქვეშაა.

¹⁹და აიღებს მღვდელი ვერძის ბეჭს და ერთ უსაფუვრო კვერს კალათიდან, და ერთ უსაფუვრო ნამცხვარს, და დაუდებს მოწმიდარს ხელის გულებზე, მას შემდეგ, რაც გაიპარსავს იგი თავის სამოწმიდრო თმას.

²⁰და შეარხევს მათ მღვდელი შერხევით უფლის წინაშე: წმიდაა იგი მღვდლისათვის, გარდა შესარხევი მკერდისა და შესაწირავი ბეჭისა. და შემდეგ სვას მოწმიდარმა ღვინო.

²¹ესაა რჯული მოწმიდარისა, რომელიც აღუთქვამს უფალს, და მისი შესაწირავი მოწმიდრობისთვის, გარდა იმისა, რაზეც ხელი მიუწვდება. თავისი აღთქმისამებრ, რაც აღუთქვა ისე გააკეთოს, თავისი მოწმიდრობის რჯულისამებრ.’“

²²და უთხრა უფალმა მოსეს:

²³„უთხარი აარონსა და მის ძეებს: ‘აკურთხეთ ისრაელის ძენი და უთხარით მათ:

²⁴‘გაკურთხოს შენ უფალმა და დაგიცვას შენ!

²⁵და მოგაფინოს უფალმა ნათელი თავისი პირისა და შეგიწყალოს შენ.

²⁶მოაქციოს უფალმა თავისი პირი შენს მიმართ და მოგცეს შენ მშვიდობა!’

²⁷და აღბეჭდონ სახელი ჩემი ისრაელის ძეებზე და მე ვაკურთხებ მათ.“