Read ბიბლია რიცხ. 7 Bible Online

რიცხ. 7 - ბიბლია bible

რიცხ. 7

¹და იმ დღეს, როცა მოსემ დაასრულა კარვის აღმართვა და სცხო მას, და აკურთხა იგი და ყოველი ჭურჭლეულობა მისი, და სამსხვერპლო ყოველი მისი ჭურჭლეულობით, და სცხო მას და აკურთხა ისინი,

²და მიეახლნენ მას ისრაელის მთავრები, მათი მამისსახლის მეთაურები, ისინი იყვნენ ტომების მთავრები, რომლებიც ზედამხედველობდენ აღრიცხვას.

³და მიიტანეს თავიანთი შესაწირავი უფლის წინაშე: ექვსი ჩარდახიანი ურემი და თორმეტი ხარი, თითო ურემი ორ მთავარზე და თითო ხარი თითოზე და წარადგინეს ისინი კარვის წინაშე.

⁴და უთხრა უფალმა მოსეს:

⁵„გამოართვი და იყვნენ მსახურების შესასრულებლად საკრებულო კარავთან. და გადაეცი ისინი ლევიანებს, თითოეულს თავისი სამსახურის მიხედვით.“

⁶და აიღო მოსემ ურმები და ხარები, და გადასცა ისინი ლევიანებს.

⁷ორი ურემი და ოთხი ხარი მისცა გერშონის ძეთ, მათი სამსახურის მიხედვით.

⁸და ოთხი ურემი და რვა ხარი მისცა მერარის ძეთ, მათი სამსახურის მიხედვით, აარონ მღვდლის ძის, ითამარის ზედამხედველობით.

⁹და კეჰათის ძეთ არ მისცა, რადგან მათი სამსახური იყო საწმიდრის ტარება, მხრებით ტარება.

¹⁰და მოიტანეს მსხვერპლი მთავრებმა სამსხვერპლოს სატფურებისთვის, მისი ცხების დღეს, და წარადგინეს მთავრებმა თავიანთი შესაწირავი სამსხვერპლოს წინ.

¹¹და უთხრა უფალმა მოსეს: „თითო მთავარმა თითო დღეს შესწიროს თავისი შესაწირავი სამსხვერპლოს სატფურებისთვის.“

¹²და იყო შემწირველი პირველ დღეს თავისი შესაწირავისა ნახშონი, ძე ყამინადაბისა, იუდას ტომიდან.

¹³და მისი შესაწირავი იყო: ვერცხლის ერთი ლანგარი, ას ოცდაათი შეკელის წონისა, ვერცხლის ერთი თასი სამოცდაათი შეკელისა, საწმიდრის შეკელით, ორივე სავსე ზეთში აზელილი წმიდა ხორბლის ფქვილით, პურეულის საძღვნოდ.

¹⁴ათშეკელიანი ოქროს ერთი საგუნდრუკე, საკმევლით სავსე.

¹⁵ერთი ნორჩი მოზვერი, ერთი ვერძი, ერთი ერთწლიანი კრავი — სრულადდასაწველად.

¹⁶ერთი თიკანი ცოდვისთვის.

¹⁷და სამშვიდობო შესაწირავად ორი ხარი, ხუთი ვერძი, ხუთი ვაცი, ხუთი ერთწლიანი კრავი. ეს შესაწირავი იყო ნახშონ ყამინადაბის ძისა.

¹⁸მეორე დღეს შესწირა თავისი შესაწირავი ნეთანელმა, ცუყარის ძემ, ისაქარის მთავარმა.

¹⁹და მან შესწირა თავისი შესაწირავი: ვერცხლის ერთი ლანგარი, წონით ას ოცდაათი შეკელი, ვერცხლის ერთი სამოცდაათშეკელიანი თასი, საწმიდრის შეკელით, ორივე სავსე ზეთში აზელილი წმიდა ხორბლის ფქვილით, პურების საძღვნოდ.

²⁰ოქროს ერთი ათშეკელიანი საგუნდრუკე, საკმევლით სავსე,

²¹ერთი ნორჩი მოზვერი, ერთი ვერძი, ერთი ერთწლიანი კრავი სრულადდასაწველად,

²²ერთი თიკანი ცოდვისათვის.

²³და სამშვიდობო შესაწირავად ორი ხარი, ხუთი ვერძი, ხუთი ვაცი, ხუთი ერთწლიანი კრავი. ეს იყო შესაწირავი ნეთანელ ცუყარის ძისა.

²⁴მესამე დღეს შესწირა ზებულუნის ძეთა მთავარმა, ელიაბმა, ხელონის ძემ.

²⁵მისი შესაწირავი იყო: ერთი ვერცხლის ლანგარი, წონით ას ოცდაათი შეკელი, ვერცხლის ერთი სამოცდაათ შეკელიანი თასი, საწმიდრის შეკელით, ორივე სავსენი ზეთში აზელილი წმინდა პურის ფქვილით, პურეულის საძღვნოდ,

²⁶ოქროს ერთი ათშეკელიანი საგუნდრუკე, საკმევლით სავსე,

²⁷ერთი ნორჩი მოზვერი, ერთი ვერძი, ერთი ერთწლიანი კრავი სრულადდასაწველად,

²⁸ერთი თიკანი ცოდვისთვის.

²⁹და სამშვიდობო შესაწირავად ორი ხარი, ხუთი ვერძი, ხუთი ვაცი, ხუთი ერთწლიანი კრავი. ეს იყო შესაწირავი ელიაბ ხელონის ძისა.

³⁰მეოთხე დღეს შესწირა რეუბენის ძეთა მთავარმა ელიცურმა, შედეურის ძემ.

³¹მისი შესაწირავი იყო: ვერცხლის ერთი ლანგარი, წონით ას ოცდაათი შეკელი, ვერცხლის ერთი სამოცდაათშეკელიანი თასი, საწმიდრის შეკელით, ორივე სავსე ზეთში აზელილი წმინდა ხორბლის ფქვილით, პურეულის საძღვნოდ.

³²ოქროს ერთი ათშეკელიანი საგუნდრუკე, საკმევლით სავსე,

³³ერთი ნორჩი მოზვერი, ერთი ერთწლიანი კრავი სრულადდასაწველად,

³⁴ერთი თიკანი ცოდვისთვის.

³⁵და სამშვიდობო შესაწირავად ორი ხარი, ხუთი ვერძი, ხუთი ვაცი, ხუთი ერთწლიანი კრავი. ეს იყო შესაწირავი ელიცურ შედეურის ძისა.

³⁶მეხუთე დღეს შესწირა სიმონის ძეთა მთავარმა შელუმიელმა, ცურიშადაის ძემ.

³⁷მისი შესაწირავი იყო: ვერცხლის ერთი ლანგარი, წონით ას ოცდაათი შეკელი, ვერცხლის ერთი სამოცდაათშეკელიანი თასი, საწმიდრის შეკელით, ორივე სავსენი ზეთში აზელილი წმიდა პურის ფქვილით, პურეულის საძღვნოდ,

³⁸ოქროს ერთი ათშეკელიანი საგუნდრუკე, საკმევლით სავსე,

³⁹ერთი ნორჩი მოზვერი, ერთი ერთწლიანი კრავი სრულადდასაწველად,

⁴⁰ერთი თიკანი ცოდვისთვის.

⁴¹და სამშვიდობო შესაწირავად ორი ხარი, ხუთი ვერძი, ხუთი ვაცი, ხუთი ერთწლიანი კრავი. ეს იყო შესაწირავი შელუმიელ ცურიშადაის ძისა.

⁴²მეექვსე დღეს შესწირა გადის ძეთა მთავარმა ელიასაფმა, რეღუელის ძემ.

⁴³მისი შესაწირავი იყო: ვერცხლის ერთი ლანგარი, წონით ას ოცდაათი შეკელი, ვერცხლის სამოცდაათშეკელიანი თასი, საწმიდრის შეკელით, ორივე სავსე ზეთში აზელილი წმიდა ხორბლის ფქვილით, პურეულის საძღვნოდ,

⁴⁴ოქროს ერთი ათშეკელიანი საგუნდრუკე, საკმევლით სავსე,

⁴⁵ერთი ნორჩი მოზვერი, ერთი ვერძი, ერთი ერთწლიანი კრავი სრულადდასაწველად,

⁴⁶და ერთი თიკანი ცოდვისათვის.

⁴⁷და სამშვიდობო შესაწირავად: ორი ხარი, ხუთი ვერძი, ხუთი ვაცი, ხუთი ერთწლიანი კრავი. ეს იყო შესაწირავი ელიასაფ რეღუელის ძისა.

⁴⁸მეშვიდე დღეს შესწირა ეფრემის ძეთა მთავარმა ელიშამაყმა, ყამიჰუდის ძემ.

⁴⁹მისი შესაწირავი იყო: ვერცხლის ერთი ლანგარი, წონით ასოცდაათი შეკელი, ვერცხლის ერთი სამოცდაათშეკელიანი თასი, საწმიდრის შეკელით, ორივე სავსე ზეთში აზელილი წმიდა ხორბლის ფქვილით, საძღვნოდ.

⁵⁰ოქროს ერთი ათშეკელიანი საგუნდრუკე, საკმევლით სავსე,

⁵¹ერთი ნორჩი მოზვერი, ერთი ვერძი, ერთი ერთწლიანი კრავი, სრულადდასაწველად,

⁵²ერთი თიკანი ცოდვისთვის.

⁵³და სამშვიდობო შესაწირავი იყო ორი ხარი, ხუთი ვერძი, ხუთი ვაცი, ხუთი ერთწლიანი კრავი. ეს იყო შესაწირავი ელიშამაყ ყამიჰუდის ძისა.

⁵⁴მერვე დღეს შესწირა მენაშეს ძეთა მთავარმა გამალიელმა, ფედაცურის ძემ.

⁵⁵მისი შესაწირავი იყო: ვერცხლის ერთი ლანგარი, წონით ას ოცდაათი შეკელი, ვერცხლის ერთი სამოცდაათშეკელიანი თასი, საწმიდრის შეკელით, ორივე სავსე ზეთში აზელილი წმიდა ხორბლის ფქვილით, პურეულის საძღვნოდ,

⁵⁶ოქროს ერთი ათშეკელიანი საგუნდრუკე, საკმევლით სავსე;

⁵⁷ერთი ნორჩი მოზვერი, ერთი ვერძი, ერთი კრავი ერთწლიანი სრულადდასაწველად,

⁵⁸ერთი თიკანი ცოდვისთვის.

⁵⁹და სამშვიდობო შესაწირავი იყო ორი ხარი, ხუთი ვერძი, ხუთი ვაცი, ხუთი ერთწლიანი კრავი. ეს იყო შესაწირავი გამალიელ ფედაცურის ძისა.

⁶⁰მეცხრე დღეს შესწირა ბენიამინის ძეთა მთავარმა აბიდანმა, გედეონის ძემ.

⁶¹მისი შესაწირავი იყო: ვერცხლის ერთი ლანგარი, წონით ასოცდაათი შეკელი, ვერცხლის ერთი სამოცდაათშეკელიანი თასი, საწმიდრის შეკელით, ორივე სავსე ზეთში აზელილი წმიდა პურის ფქვილით, პურეულის საძღვნოდ,

⁶²ოქროს ერთი ათშეკელიანი საგუნდრუკე, საკმევლით სავსე,

⁶³ერთი ნორჩი მოზვერი, ერთი ვერძი, ერთი კრავი ერთწლიანი სრულადდასაწველად,

⁶⁴ერთი თიკანი ცოდვისთვის.

⁶⁵და სამშვიდობო შესაწირავად იყო ორი ხარი, ხუთი ვერძი, ხუთი ვაცი, ხუთი კრავი ერთწლიანი. ეს იყო შესაწირავი აბიდან გედეონის ძისა.

⁶⁶მეათე დღეს შესწირა დანის ძეთა მთავარმა ახიყეზერმა, ყამიშადაის ძემ.

⁶⁷მისი შესაწირავი იყო: ვერცხლის ერთი ლანგარი, წონით ასოცდაათი შეკელი, ვერცხლის ერთი სამოცდაათ შეკელიანი თასი, საწმიდრის შეკელით, ორივე სავსე ზეთში აზელილი წმიდა ხორბლის ფქვილით, პურეულის საძღვნოდ.

⁶⁸ოქროს ერთი ათშეკელიანი საგუნდრუკე, საკმევლით სავსე,

⁶⁹ერთი ნორჩი მოზვერი, ერთი ვერძი, ერთი კრავი ერთწლიანი სრულადდასაწველად.

⁷⁰ერთი თიკანი ცოდვისთვის.

⁷¹და სამშვიდობო შესაწირავი იყო ორი ხარი, ხუთი ვერძი, ხუთი ვაცი, ხუთი კრავი ერთწლიანი. ეს იყო შესაწირავი ახიყეზერ ყამიშადაის ძისა.

⁷²მეთერთმეტე დღეს შესწირა აშერის ძეთა მთავარმა ფაგეყიელმა, ყაქრანის ძემ.

⁷³მისი შესაწირავი იყო: ვერცხლის ერთი ლანგარი, წონით ასოცდაათი შეკელი, ვერცხლის ერთი სამოცდაათშეკელიანი თასი საწმიდრის შეკელით, ორივე სავსე ზეთში აზელილი წმიდა ხორბლის ფქვილით, პურეულის საძღვნოდ,

⁷⁴ოქროს ერთი ათშეკელიანი საგუნდრუკე, საკმევლით სავსე,

⁷⁵ერთი ნორჩი მოზვერი, ერთი ვერძი, ერთი კრავი ერთწლიანი სრულადდასაწველად,

⁷⁶ერთი თიკანი ცოდვისთვის.

⁷⁷და სამშვიდობო შესაწირავად იყო ორი ხარი, ხუთი ვერძი, ხუთი ვაცი, ხუთი კრავი ერთწლიანი. ეს იყო შესაწირავი ფაგეყიელ ყაქრანის ძისა.

⁷⁸მეთორმეტე დღეს შესწირა ნაფთალიანთა მთავარმა ახირაყ, ყენანის ძემ.

⁷⁹მისი შესაწირავი იყო: ვერცხლის ერთი ლანგარი, წონით ას ოცდაათი შეკელი, ვერცხლის ერთი სამოცდაათშეკელიანი თასი საწმიდრის შეკელით, ორივე სავსე ზეთში აზელილი წმიდა ხორბლის ფქვილით, პურეულის საძღვნოდ,

⁸⁰ოქროს ერთი ათშეკელიანი საგუნდრუკე, საკმევლით სავსე,

⁸¹ერთი ნორჩი მოზვერი, ერთი ვერძი, ერთი კრავი ერთწლიანი სრულადდასაწველად,

⁸²ერთი თიკანი ცოდვისთვის.

⁸³და სამშვიდობო შესაწირავი იყო ორი ხარი, ხუთი ვერძი, ხუთი ვაცი, ხუთი კრავი ერთწლიანი. ეს იყო შესაწირავი ახირაყ ყენანის ძისა.

⁸⁴და ეს იყო სამსხვერპლოს სატფურების, მისი ცხების დღის ძღვენი და შესაწირავი ისრაელის მთავართაგან: ვერცხლის თორმეტი ლანგარი, ვერცხლის თორმეტი თასი, ოქროს თორმეტი საგუნდრუკე,

⁸⁵ვერცხლის ასოცდაათი შეკელი თითოეულ ლანგარში და სამოცდაათი შეკელი თითოეულ თასში. ამ ჭურჭელში იყო სულ ორი ათას ოთხასი საწმიდრის შეკელის ვერცხლი.

⁸⁶ოქროს თორმეტი საკმევლით სავსე საგუნდრუკე, თითოეული საგუნდრუკე ათი საწმიდრის შეკელისა. საგუნდრუკეებში სულ იყო ას ოცი შეკელის ოქრო.

⁸⁷სრულადდასაწვევლად სულ იყო თორმეტი ხარი მსხვილფეხა საქონლიდან, თორმეტი ვერძი, თორმეტი ერთწლიანი კრავი და მათი პურეულის ძღვენი, და თორმეტი თიკანი ცოდვისთვის.

⁸⁸და სულ იყო სამშვიდობო შესაწირავად ოცდაოთხი ხარი მსხვილფეხა საქონლიდან, სამოცი ვერძი, სამოცი კრავი ერთწლიანი. ეს იყო ძღვენი სამსხვერპლოს სატფურებისა მისი ცხების შემდეგ.

⁸⁹და როცა მოსე შედიოდა საკრებულო კარავში, რათა ელაპარაკა უფალთან, მას ესმოდა ხმა, რომელიც ელაპარაკებოდა მოწმობის კიდობნის თავსარქვლიდან, ორი ქერუბიმის შუიდან. და იგი ლაპარაკობდა მასთან.