Read ბიბლია რიცხ. 9 Bible Online

რიცხ. 9 - ბიბლია bible

რიცხ. 9

¹და უთხრა უფალმა მოსეს სინაის უდაბნოში, ეგვიპტის ქვეყნიდან გამოსვლის მეორე წლის პირველ თვეს:

²„ისრაელის ძეთ უნდა აღასრულონ პასექი მისთვის დანიშნულ დროს.

³ამ თვის მეთოთხმეტე დღეს მწუხრის ჟამს აღასრულეთ ის, მისთვის დანიშნულ დროს, ყოველი მისი წესისა და ყოველი მისი რიგის დაცვით აღასრულეთ ის.“

⁴და უთხრა მოსემ ისრაელის ძეთ, რომ აღესრულებინათ პასექი.

⁵და აღასრულეს პასექი პირველი თვის მეთოთხმეტე დღეს, მწუხრის ჟამს, სინაის უდაბნოში. ყოველივე, როგორც უბრძანა უფალმა მოსეს, ისე აღასრულეს ისრაელის ძეთ.

⁶და იყვნენ ადამიანები, რომელნიც შებილწულნი იყვნენ მკვდარი ადამიანის გვამების შეხების გამო და არ შეეძლოთ პასექის აღსრულება იმ დღეს. და მივიდნენ ისინი მოსესა და აარონის წინაშე იმ დღეს,

⁷და უთხრეს იმ ადამიანებმა მას: „შებილწულნი ვართ მკვდარი ადამიანის გვამებთან შეხების გამო. რატომ უნდა მოვაკლდეთ და ვერ შევწიროთ შესაწირავი უფალს ისრაელის ძეთა შორის დანიშნულ დროს?“

⁸და უთხრა მათ მოსემ: „მოიცადეთ, მოვისმენ, რას გიბრძანებთ უფალი.“

⁹და თქვა უფალმა:

¹⁰„უთხარი ისრაელის ძეთ: ‘თუ ვინმე თქვენგანი ან თქვენი შთამომავალი შეიბილწება გვამებთან შეხებით, ან თუ შორეულ გზაზე იქნება, აღასრულოს მან პასექი უფლისათვის.

¹¹მეორე თვის მეთოთხმეტე დღეს, მწუხრის ჟამს აღასრულონ ის, ხმიადით და მწარე მწვანილეულით ჭამონ ის.

¹²არ დატოვონ მისგან არაფერი განთიადამდე, და მისი ძვლები არ დაამტვრიონ; პასექის ყოველი წესის დაცვით აღასრულონ.

¹³და კაცი, რომელიც სუფთაა და გზად არ არის და არ აღასრულებს პასექს, ის სული უნდა მოიკვეთოს თავისი ხალხიდან, რადგან უფლის შესაწირავი არ შესწირა დანიშნულ დროზე. თავისი ცოდვა დაედება იმ კაცს.

¹⁴და თუ იცხოვრებს თქვენთან ხიზანი და აღასრულებს პასექს უფლისათვის, წესის და რიგისამებრ აღასრულოს ის. ერთი წესი იყოს თქვენთვის ხიზნისათვისაც და ქვეყნის მკვიდრისათვისაც.“

¹⁵კარვის აღმართვის დღეს დაფარა ღრუბელმა მოწმობის კარავი, და საღამოდან განთიადამდე ცეცხლივით ჩანდა სავანის თავზე.

¹⁶ასე იყო მუდამ: ღრუბელი ფარავდა მას დღისით და ცეცხლივით ჩანდა ღამით კარავზე.

¹⁷და როცა ღრუბელი კარავს ასცილდებოდა, მაშინ აიყრებოდნენ გზად ისრაელის ძენი. და იმ ადგილზე, სადაც ჩერდებოდა ღრუბელი, იქ ბანაკდებოდნენ ისრაელის ძენი.

¹⁸უფლის ბრძანებით აიყრებოდნენ ისრაელის ძენი და უფლის ბრძანებით ბანაკდებოდნენ. მთელი იმ ხნის მანძილზე, როცა იდგა ღრუბელი სავანეზე, ისინიც იდგნენ.

¹⁹და თუ ღრუბელი დიდხანს აყოვნებდა სავანეზე, მაშინ ასრულებდნენ ისრაელის ძენი უფლის განკარგულებას და არ აიყრებოდნენ ხოლმე.

²⁰და ხდებოდა, რომ ღრუბელი აყოვნებდა სავანეზე რამდენიმე ხანს; და ისინი უფლის ბრძანებით ბანაკდებოდნენ და უფლის ბრძანებით აიყრებოდნენ ხოლმე.

²¹და ხდებოდა, რომ ღრუბელი აყოვნებდა საღამოდან განთიადამდე, და დილას აიწევდა ღრუბელი, და ისინი აიყრებოდნენ. ანდა იდგა დღისით და ღამით, და როცა აიწევდა, ისინიც მაშინ აიყრებოდნენ.

²²თუ ორი დღე, ან თვე, ან მთელი წელი აყოვნებდა ღრუბელი სავანეზე, იდგნენ ისრაელის ძენი და არ აიყრებოდნენ. და როცა აიწევდა, აიყრებოდნენ ისინი.

²³უფლის ბრძანებით ბანაკდებოდნენ და უფლის ბრძანებით აიყრებოდნენ: უფლის განკარგულებას ასრულებდნენ, უფლის ბრძანებით და მოსეს ხელით.