Read ბიბლია მიქ. 2 Bible Online

მიქ. 2 - ბიბლია bible

მიქ. 2

¹ვაი მათ, ვინაც ავსა და ბოროტს განიზრახავენ სარეცელზე მწოლნი, და რა ინათებს — განთიადზე — ისრულებენ მას, რადგან ძალა აქვთ ხელში!

²მოუნდებათ ყანები და იტაცებენ, სახლები — და მიაქვთ; ავიწროებენ კაცსა და მის სახლს, ადამიანს და მის სამკვიდროს.

³ამიტომ ასე ამბობს უფალი: „აჰა, ბოროტს ვიზრახავ ამ მოდგმაზე, რომლისგანაც ვერ გაითავისუფლებთ კისრებს და გამართულად ვერ ივლით, რადგან ავი დროება იქნება.

⁴იმ დღეს შეთხზავენ თქვენზე იგავს, გაიმართება გლოვა და ითქმება: ‘გაძარცულნი ვართ! ჩემი ხალხის წილი სხვამ მიიკუთვნა! როგორ გამცილდა! ჩვენს დამატყვევართ დაუნაწილდა ჩვენი ყანები.’

⁵ამიტომ არ გეყოლება უფლის კრებულში წილისყრით მიწის გამზომელი.

⁶ნუ ქადაგებთ, მოქადაგენო! არ უქადაგოთ მათ, ვინც ვერ გაექცევა სირცხვილს.

⁷ნათქვამია, იაკობის სახლო: ‘განა სულმოკლეა უფალი? ასეთია მისი საქმეები?’ განა კეთილი არ მოაქვს ჩემს სიტყვებს იმათთვის, ვინც წრფელად იქცევა?

⁸ადრიდანვე მტრად აღდგა ჩემი ხალხი — ადრევე ხდიდით ტანისამოსს არხეინად მომავალთ, ბრძოლიდან დაბრუნებულთ.

⁹ჩემი ერის ქალებს მათი სანუკვარი სახლებიდან ერეკებით. მათ ბავშვებს სამუდამოდ ართმევთ ჩემს დიდებას.

¹⁰ადექით და წადით, არ არის აქ განსასვენებელი ადგილი. უწმიდურების გამო გაიტანჯება და მწარე იქნება სატანჯველი.

¹¹ოჰ, ერთი მოიტყუებოდეს ქარისა და სიცრუის მადევარი კაცი: მე გიქადაგებთ ღვინოზე და თაფლუჭზეო! ის იქნებოდა ამ ხალხის ქადაგი.

¹²მთლიანად შეგკრებ, იაკობ, თავს მოვუყრი ისრაელის ნატამალს; ერთად დავსხამ, როგორც ცხვარს ფარეხში; როგორც ფარა თავის სადგომში, ისე ახმაურდება კაცთა სიმრავლისგან.

¹³მათ წინ აივლის კედლის მნგრეველი, გაანგრევენ და გაივლიან კარიბჭეში, და უკანვე გამოვლენ. ჩაივლის მათ წინ მათი მეფე და უფალი — მათ სათავეში.“