Read ბიბლია ზაქ. 10 Bible Online

ზაქ. 10 - ბიბლია bible

ზაქ. 10

¹შესთხოვეთ უფალს წვიმა გვიანი წვიმობის ჟამს. უფალი მოიღებს ღრუბელს და მისცემს მათ წვიმის ღვარს, ჯეჯილს ყველასთვის ყანაში.

²რადგან თერაფიმები ამაოდ ლაპარაკობენ, მისნები ტყუილს ხედავენ და ცრუ სიზმრებს ყვებიან. ამაოდ იმშვიდებენ თავს, ამიტომაც ცხვრებივით დაეხეტებიან, იტანჯებიან, რადგან არა ჰყავთ მწყემსი.

³„მწყემსების მიმართ აინთო ჩემი რისხვა და დავსჯი ბოტებს, მაგრამ მოხედავს ცაბაოთ უფალი თავის ფარას — იუდას სახლს და თავის დიდებულ რაშად გაიხდის მას ბრძოლაში.

⁴მისგან იქნება ქვაკუთხედი, მისგან იქნება სამსჭვალი, მისგან იქნება საბრძოლო მშვილდი, მისგან გამოვა ყველა განმგებელი ერთიანად.

⁵იქნებიან როგორც გმირები, ქუჩის ტალახს რომ თელავენ ბრძოლაში. იბრძოლებენ, რადგან უფალი იქნება მათთან, და გააწბილებენ ცხენებზე ამხედრებულთ.

⁶გავაძლიერებ იუდას სახლს, და ვიხსნი იოსების სახლს, დავაბრუნებ მათ, რადგან შევიწყალე ისინი, და ისე იქნებიან, თითქოს არასოდეს მიმეტოვებინოს, რადგან მე ვარ უფალი, მათი ღმერთი, და შევისმინე მათი.

⁷გმირივით გახდება ეფრემი და გახალისდება მათი გული, თითქოს ღვინისაგან. დაინახავენ ამას მათი შვილები და გაიხარებენ, მოილხენს მათი გული უფალში.

⁸დავუსტვენ მათ და თავს მოვუყრი, რადგან გამოვისყიდე ისინი, და ბევრნი გახდებიან, როგორც ბევრნი იყვნენ.

⁹მე გავაბნიე ისინი ხალხებში და შორეულ ქვეყნებში გამიხსენებენ. იცხოვრებენ თავიანთ შვილებთან ერთად და დაბრუნდებიან.

¹⁰დავაბრუნებ მათ ეგვიპტის ქვეყნიდან და აშურიდან გამოვკრებ მათ. გილყადის ქვეყნად და ლიბანს მივიყვან მათ, და ადგილი არ ეყოფათ.

¹¹ჩაივლის ზღვაზე სატანჯველი, და დაჰკრავს ზღვაში მის ტალღებს; ამოშრება ნილოსის სიღრმეები, დაემხობა აშურის დიდება, და წაერთმევა კვერთხი ეგვიპტეს.

¹²გავაძლიერებ მათ უფალში და ივლიან მისი სახელით“ — ამბობს უფალი.