Read ბიბლია პირველი მაკაბელთა 1 Bible Online

პირველი მაკაბელთა 1 - ბიბლია bible

პირველი მაკაბელთა 1

¹მას შემდეგ რაც ხეთელთა ქვეყნიდან გამოვიდა ალექსანდრე, ფილიპეს ძე, მაკედონელი, დაამარცხა დარიოსი, სპარსთა და მიდიელთა მეფე და მის ნაცვლად გამეფდა, თავდაპირველად — საბერძნეთზე,

²გადაიხადა მრავალი ომი, ხელთ იგდო ციხე-სიმაგრენი და გაწყვიტა ქვეყნის მეფენი.

³მიაღწია ქვეყნიერების დასალიერს, მოხარკედ გაიხადა მრავალი ხალხები, და როცა ქვეყანა დაცხრა მის წინაშე, აღზევდა გალაღებული.

⁴შეკრიბა დიდძალი ლაშქარი და განაგებდა ქვეყნებს, ხალხებსა და მბრძანებლებს, რომლებიც გახდნენ მისი მოხარკენი.

⁵შემდგომ ამისა ლოგინად ჩავარდა და სიკვდილის მოახლოვება იგრძნო.

⁶მოუხმო თავის დიდებულებს, სიყრმიდანვე მასთან თანშეზრდილთ, და ჯერ კიდევ სიცოცხლეშივე გაუყო მათ მთელი თავისი საბრძანებელი.

⁷იმეფა ალექსანდრემ თორმეტი წელი და მიიცვალა.

⁸შემდეგ მბრძანებლობდნენ მისი დიდებულები — თვითეული თავის სამყოფელში.

⁹მისი სიკვდილის შემდეგ ყველამ დაიდგა თავზე გვირგვინი; შემდგომ ასევე იქცეოდნენ მათი ძენი, და იმრავლა ბოროტებამ ქვეყნად.

¹⁰მათგან გამოვიდა ცოდვილი ფესვი — ანტიოქოს ეპიფანე, ძე მეფე ანტიოქოსისა, მძევლად რომ ჰყავდათ რომში.

¹¹იმ ხანად ისრაელიდან გამოვიდნენ უსჯულო ძენი, აცთუნებდნენ მრავალთ და ამბობდნენ: წავიდეთ და ზავით შევეკრათ ჩვენს გარშემო მოსახლე ხალხებს, რადგანაც მას შემდეგ, რაც მათ გამოვეყავით, მრავალი უბედურება დაგვატყდაო თავს.

¹²და ეს სიტყვა მოსაწონი გამოჩნდა მათ თვალში.

¹³ხალხში ზოგიერთმა ასე ინება და ეახლნენ მეფეს, რომელმაც ნება დართო მათ აღესრულებინათ წარმართთა ადათ-წესები.

¹⁴და წარმართთა წესისამებრ გამართეს სასწავლებელი იერუსალიმში.

¹⁵წესად დადეს წინადაუცვეთელობა, განუდგნენ აღთქმას, შეეკრნენ წარმართებს და ავის საქმნელად გაყიდეს თავი.

¹⁶როდესაც ანტიოქოსმა დაინახა, რომ განმტკიცდა ქვეყანა მის წინაშე, განიზრახა გამეფებულიყო ეგვიპტეში, რათა ემეფე ორ სამეფოზე.

¹⁷ურიცხვი ლაშქრით, ეტლებითა და სპილოებით, მხედრებითა და მრავალი ხომალდით შევიდა ეგვიპტეში.

¹⁸და შეება ეგვიპტის მეფეს პტოლემეოსს; შეკრთა პტოლემეოსი და უკუიქცა. თვლა აღარ ჰქონდა დაცემულ დაჭრილთ.

¹⁹ხელთ იგდო ეგვიპტის ქვეყანაში ციხე-ქალაქები და აკრიფა ხარკი ეგვიპტეში.

²⁰ეგვიპტის დაპყრობის შემდეგ, ას ორმოცდა მესამე წელს, გამობრუნდა ანტიოქოსი, ისრაელზე გაილაშქრა და დიდძალი ჯარით მიადგა იერუსალიმს.

²¹ქედმაღლურად შევიდა საწმიდარში, აიღო ოქროს სამსხვერპლო, სასანთლე და ყოველი დგამი მისი;

²²საწირავი ტაბლა, სათხევი ფიალები, ოქროს საცეცხლური, ფარდა, გვირგვინები და ტაძრის გარეთა სამკაული ოქროსი — ყველაფერი მიისაკუთრა.

²³მიითვალა ოქრო-ვერცხლი, ძვირფასი ჭურჭელი და გადამალული განძი, რაც კი მოიხელთა.

²⁴მოხვეტა ყველაფერი და თავის ქვეყანაში გაბრუნდა; ხოცავდა ხალხს და ქედმაღლურად ლაპარაკობდა.

²⁵მოთქმა-გოდებამ მოიცვა ისრაელის ყოველი მხარე.

²⁶გმინავდნენ მხედართმთავრები და უხუცესები, დაუძლურდნენ ქალწულნი და ჭაბუკნი, გაიცრიცა ქალთა მშვენება.

²⁷დამგლოვიარდა ყოველი სიძე; და საქორწინო სარეცელზე მჯდომარე სასძლო ვაებდა.

²⁸მიწა შეიძრა მისსავე მკვიდრთა ფეხქვეშ და სირცხვილმა მოიცვა მთელი სახლი იაკობისა.

²⁹ორი წლის შემდეგ წარგზავნა მეფემ მეხარკეთუხუცესი იუდას ქალაქებში და შევიდა იგი იერუსალიმში დიდძალი ლაშქრით.

³⁰მზაკვრულად ეუბნა ხალხს მშვიდობის სიტყვით და ერწმუნნენ მას, მაგრამ უეცრად თავს დაესხა ქალაქს, სასტიკად მოაოხრა და მუსრი გაავლო ისრაელის მრავალ მკვიდრს.

³¹გაძარცვა ქალაქი და გადაბუგა; დააქცია მისი სახლები და გალავანი.

³²ტყვედ წაასხეს ქალები და ბავშვები და დაეპატრონენ საქონელს.

³³მტკიცე გალავნითა და მკვიდრად ნაშენი კოშკებით შემოზღუდეს დავითის ქალაქი და იქცა მათ ციხე-სიმაგრედ.

³⁴დაასახლეს იქ ცოდვილი ხალხი და უსჯულონი დამკვიდრდნენ იქ.

³⁵მოიმარაგეს საჭურველი და სანოვაგე, ხარკი აკრიფეს იერუსალიმში, შიგ ჩაიბუდეს და ჩასაფრდნენ.

³⁶მზირად ექცნენ საწმიდარს და ეშმაკეულ მტრად გაუხდნენ ისრაელს.

³⁷დაღვარეს უმანკო სისხლი საწმიდრის ირგვლივ, წარყვნეს და წაბილწეს იგი.

³⁸ამიტომაც მიმოიფანტნენ იერუსალიმის მკვიდრნი; გადამთიელთა საცხოვრისად იქცა იგი; უცხო შეიქნა თვისტომთათვის; და მიატოვეს იგი მისმა შვილებმა.

³⁹გავერანდა და გაუდაბურდა მისი საწმიდარი; გლოვად იქცნენ მისი დღესასწაულნი, ძაძებად — მისი შაბათნი და დიდება მისი — სირცხვილად.

⁴⁰დიდების წილ იმრავლა მისმა უპატიობამ და გოდებად იქცა მისი ზეობა.

⁴¹წერილით ამცნო მეფემ მთელ თავის სამეფოს, რომ ყველა ხალხი ერთი ყოფილიყო,

⁴²ყველა ხალხს ხელი აეღო თავის ადათ-წესებზე, და მისი სიტყვის წინაშე ყველამ მოიდრიკა ქედი.

⁴³ისრაელშიც ბევრი დაჰყვა მის ნებას, მსხვერპლს სწირავდნენ კერპებს და ბღალავდნენ შაბათს.

⁴⁴გაგზავნა მეფემ წიგნი იერუსალიმში და იუდას სხვა ქალაქებში, რომ მათთვის უცხო წეს-ჩვეულებებს მიჰყოლოდნენ;

⁴⁵აღეკვეთათ სრულადდასაწველი და მსხვერპლშეწირვა, საღვრელი — სამსხვერპლოზე, შეებღალათ შაბათი და დღესასწაულნი.

⁴⁶შეებილწათ საწმიდარი და სიწმიდენი,

⁴⁷აღემართათ ბომონები, ნაკრძალები და საკერპოები, მსხვერპლად შეეწირათ ღორები და უსურმაგები,

⁴⁸წინადაუცვეთლად დაეტოვებინათ თავიანთი ძენი და ათასგვარი სიბილწით და უწმინდურებით შეებღალათ მათი სულები,

⁴⁹რათა დაევიწყებინათ სჯული და თავიანთი ადათ-წესები

⁵⁰ხოლო ვინც ურჩობას გაუწევდა მეფის სიტყვებს, სიკვდილით დაესაჯათ.

⁵¹ამ სიტყვების მიხედვით მისწერა მთელ თავის სამეფოს, ზედამხედველნი დაუდგინა ყველა ხალხს და იძულებით დაუწესა ზორვა იუდას ქალაქებს.

⁵²ხალხთაგან ბევრი შეუერთდა მათ, — ყველა, ვინც ზურგი აქცია სჯულს და ბოროტის მოქმედად იქცა ამ ქვეყნად.

⁵³და აიძულეს ისრაელი სამალავებსა თუ თავშესაფრებში მიმალულიყო.

⁵⁴ქისლევის მეთხუტმეტე დღეს, ასორმოცდამეხუთე წელს, წარყვნეს და წაბილწეს სამსხვერპლო და ბომონები აღმართეს იუდას ქალაქების ირგვლივ.

⁵⁵საკმეველს აკმევდნენ სახლების კარწინ და ქუჩებში.

⁵⁶სადაც კი წააწყდებოდნენ სჯულის წიგნებს, ხევდნენ და ცეცხლში ყრიდნენ,

⁵⁷ხოლო ვისაც უპოვიდნენ აღთქმის წიგნებს, ანდა ვინც აღიარებდა სჯულს, მეფის ბრძანებისამებრ, სიკვდილით სჯიდნენ.

⁵⁸ასე მძლავრობდნენ ისრაელზე, ვისაც კი სახლში წაასწრებდნენ თვიდან თვემდე.

⁵⁹თვის ოცდახუთში მსხვერპლს სწირავდნენ საკურთხევლის წინ აღმართულ კერპს.

⁶⁰ქალებს, რომლებმაც გაბედეს თავიანთი შვილების წინადაცვეთა, დაუნდობლად აშთობდნენ.

⁶¹კისრით ჰკიდებდნენ ჩვილებს, არბევდნენ მათ სახლებს, მუსრს ავლებდნენ წინადაცვეთილთ.

⁶²მაგრამ მრავალი გასალკლდევდა ისრაელში და მტკიცედ იდგა, რომ არ ეჭამა უწმინდურება.

⁶³სიკვდილი არჩიეს უწმინდური საჭმლით წაბილწვას და წმიდა აღთქმის შებღალვას, — ასე დაიხოცნენ.

⁶⁴და იყო დიდი რისხვა ისრაელის თავზე.