Read ბიბლია რჯლ. 11 Bible Online

რჯლ. 11 - ბიბლია bible

რჯლ. 11

¹„და გიყვარდეს უფალი, შენი ღმერთი, და დაიცავი მისი დასაცველნი და მისი წესები, და მისი სამართალნი, და მისი მცნებანი ყოველდღიურად.

²იცოდეთ ეს დღეს, მე არ ველაპარაკები თქვენს ძეთ, რომელთაც არ იციან და არ უნახავთ უფლის, თქვენი ღმერთის, სასჯელი, მისი დიდება, მისი ძლიერი ხელი და მისი გაწვდილი მკლავი,

³და მისი ნიშნები და მისი საქმენი, რომელნიც შუაგულ ეგვიპტეში უყო ფარაონს, ეგვიპტის მეფეს და მთელ მის ქვეყანას,

⁴და რაც უყო ეგვიპტის ლაშქარს, მის ცხენებსა და მის ეტლებს, როგორ შთაანთქმევინა ისინი მეწამული ზღვის წყალს, როცა ისინი დაგედევნენ, და მოსპო ისინი უფალმა დღემდე,

⁵და რაც უდაბნოში გაგიკეთათ, ვიდრე ამ ადგილს მოაღწევდით,

⁶და რაც მან უყო დათანს და აბირამს, რეუბენის ძის, ელიაბის, ძეთ, როცა გააღო მიწამ პირი და შთანთქა ისინი და მათი სახლები, და მათი კარვები, და მთელი სიმდიდრე, რაც რამ ებადათ მთელს ისრაელში.

⁷რადგან თქვენმა თვალებმა იხილეს უფლის ყველა დიდი საქმეები, რომელნიც მან გააკეთა.

⁸და დაიცავით ყველა მცნება, რომელსაც მე გიბრძანებთ დღეს, რათა გაძლიერდეთ და მიხვიდეთ და დაიმკვიდროთ ქვეყანა, რომლის დასამკვიდრებლადაც გადადიხართ გაღმა.

⁹და რათა დღეგრძელი იყოთ ქვეყანაში, რომლის მიცემაც ფიცით აღუთქვა უფალმა თქვენს მამებს და მათ შთამომავლობას, ქვეყანა, სადაც რძე და თაფლი მოედინება.

¹⁰რადგან ქვეყანა, სადაც შენ მიდიხარ დასამკვიდრებლად, არა ჰგავს ეგვიპტის ქვეყანას, საიდანაც თქვენ გამოხვედით, სადაც თესავდი თესლს, და რწყავდი შენი ფეხით, როგორც ბოსტანს,

¹¹ხოლო ქვეყანა, რომლის დასამკვიდრებლადაც გაღმა გადადიხარ, მთიანი და ველებიანი ქვეყანაა და ცის წვიმის წყალს სვამს.

¹²ქვეყანა, რომელზეც უფალი, შენი ღმერთი ზრუნავს. მუდამ მასზეა უფლის, შენი ღმერთის, თვალი წელიწადის დასაბამიდან წელიწადის დასასრულამდე.

¹³და თუ სმენით მოისმენთ ჩემს მცნებებს, რომელთაც მე გიბრძანებთ დღეს, რომ გიყვარდეთ უფალი, თქვენი ღმერთი, და ემსახუროთ მას მთელი თქვენი გულით და მთელი თქვენი სულით,

¹⁴მაშინ მივცემ წვიმას თქვენს ქვეყანას დროულად, ადრეულსა და ნაგვიანებს. და თქვენც მოიწევთ თქვენს მარცვლეულს, ღვინოსა და ზეთს.

¹⁵და გავუჩენ ბალახს შენს მდელოს შენი საქონლისათვის, და ჭამ და გაძღები.

¹⁶მაგრამ გაფრთხილდით, რომ არ შეცდეს თქვენი გული და არ გადაუხვიოთ და არ ემსახუროთ უცხო ღმერთებს, და არ ეთაყვანოთ.

¹⁷და მაშინ აღეგზნება რისხვა უფლისა თქვენზე, და დახშავს ცას და არ იქნება წვიმა, და მიწა აღარ მოგცემთ თავის ნაყოფს. და მალევე დაიღუპებით ამ კარგი ქვეყნიდან, რომელსაც უფალი გაძლევთ თქვენ.

¹⁸და ჩაიდეთ ეს ჩემი სიტყვები თქვენს გულში და სულში, და შეიბით იგი ნიშნად თქვენს ხელზე, და იყოს ისინი შუბლსაკრავად თქვენს თვალებს ზემოთ.

¹⁹და ასწავლეთ ისინი თქვენს ძეთ და ელაპარაკეთ მათ შინ ყოფნისას, გზაზე სვლისას, დაწოლისას და ადგომისას.

²⁰და წააწერეთ ისინი თქვენი სახლების წირთხლებს და თქვენს კარიბჭეებს,

²¹რათა გამრავლდნენ თქვენი დღენი და დღენი თქვენს ძეთა იმ მიწაზე, რომლის მიცემაც ფიცით აღუთქვა უფალმა თქვენს მამებს, რამდენ დღესაც ცა იარსებებს მიწის ზემოთ.

²²რადგან, თუ დაცვით დაიცავთ ყველა ამ მცნებას, რომელთაც მე გიბრძანებთ შესასრულებლად, რათა გიყვარდეთ უფალი, თქვენი ღმერთი, რათა იაროთ მისი გზით და მიეწებოთ მას,

²³მაშინ განდევნის უფალი ყველა ამ ხალხს თქვენი პირისაგან და დაიმკვიდრებთ თქვენზე დიდ და ძლიერ ხალხებს.

²⁴ყველა ადგილი, სადაც დაიდგმება ტერფი თქვენი ფეხისა, თქვენი იქნება. უდაბნოდან და ლიბანიდან, მდინარე ევფრატიდან განაპირა ზღვამდე იქნება თქვენი საზღვარი.

²⁵წინ ვერავინ დაგიდგებათ. თქვენს შიშსა და ზარს დასცემს უფალი, თქვენი ღმერთი, მთელი დედამიწის ზურგს, სადაც კი ფეხს დაადგამთ, როგორც მან გითხრათ.

²⁶უყურეთ, მე დღეს გთავაზობთ კურთხევასა და წყევლას:

²⁷კურთხევას — თუ შეისმენთ უფლის, თქვენი ღმერთის, მცნებებს, რომლებსაც მე გიბრძანებთ დღეს;

²⁸და წყევლას — თუ არ შეისმენთ უფლის, თქვენი ღმერთის, მცნებებს, და გადაუხვევთ იმ გზიდან, რომელსაც მე გიბრძანებთ დღეს, და გაჰყვებით უცხო ღმერთებს, რომელთაც არ იცნობთ.

²⁹და იქნება, როცა შეგიყვანს უფალი, შენი ღმერთი, იმ ქვეყანაში, რომლის დასამკვიდრებლადაც შედიხარ, აღავლინეთ კურთხევა გერიზიმის მთაზე და წყევლა — ღებალის მთაზე.

³⁰იორდანეს გაღმაა ისინი, მზის დასავლის გზაზე, ყარაბაში მცხოვრები ქანაანელების ქვეყანაში, გილგალის პირდაპირ, მორეს მუხნარის მახლობლად.

³¹რადგან თქვენ გადადიხართ იორდანეზე, რომ მიხვიდეთ იმ ქვეყნის დასამკვიდრებლად, რომელსაც უფალი, თქვენი ღმერთი, გაძლევთ თქვენ, და დაიმკვიდრებთ მას და იქ დასახლდებით,

³²დაიცავით შესასრულებლად ყველა წესი და სამართალნი, რომელთაც მე გაძლევთ თქვენ დღეს.