Read ბიბლია რჯლ. 12 Bible Online

რჯლ. 12 - ბიბლია bible

რჯლ. 12

¹აჰა, წესები და სამართალნი, რომელიც უნდა დაიცვათ შესასრულებლად იმ ქვეყანაში, დასამკვიდრებლად რომ მოგცათ უფალმა, თქვენი მამების ღმერთმა, მთელი ის დღეები, რასაც იცოცხლებთ იმ მიწაზე.

²განადგურებით გაანადგურეთ ყველა ადგილი, სადაც ხალხები, რომელთაც თქვენ განდევნით, ემსახურებოდნენ თავიანთ ღმერთებს, მაღალ მთებსა და ბორცვებზე, და ყველა ამწვანებული ხის ქვეშ.

³და დააქციეთ მათი სამსხვერპლოები, და დალეწეთ მათი ძეგლები, და მათი აშერები დაწვით ცეცხლით, და მათი ღმერთების ქანდაკებები დაჩეხეთ და მოსპეთ მათი სახელი იმ ადგილიდან.

⁴ასე არ მოექცეთ უფალს, თქვენს ღმერთს.

⁵მხოლოდ ადგილს, რომელსაც ამოირჩევს უფალი, თქვენი ღმერთი, ყველა თქვენს ტომთაგან, რათა იქ დაადგინოს თავისი სახელი, მიმართეთ და იქ მიდით,

⁶და იქ მიიტანეთ თქვენი სრულადდასაწველნი და თქვენი მსხვერპლები, და თქვენი მეათედები, და თქვენი ხელის აღსამართავი და თქვენი აღთქმული, და თქვენი წვრილფეხა და მსხვილფეხა საქონლის პირველმოგებულნი,

⁷და ჭამეთ იქ უფლის, თქვენი ღმერთის, წინაშე, და გაიხარეთ თქვენ და თქვენმა სახლმა თქვენი ნაამაგარით, რომლითაც გაკურთხათ თქვენ უფალმა, თქვენმა ღმერთმა.

⁸არ გააკეთოთ ყოველივე ის, რასაც ჩვენ აქ ვაკეთებთ დღეს — თითოეული ყველაფერ იმას აკეთებს, რაც მის თვალშია სწორი,

⁹რადგან ჯერ კიდევ არ შესულხართ განსასვენებელში და სამკვიდროში, რომელსაც უფალი, შენი ღმერთი გაძლევს შენ.

¹⁰მაგრამ როცა გადახვალთ იორდანეს და დასახლდებით ქვეყანაში, რომელსაც უფალი, თქვენი ღმერთი, გიმკვიდრებთ თქვენ, და დაგასვენებთ თქვენ გარეშე მტერთაგან, და იცხოვრებთ უშიშრად.

¹¹მაშინ იმ ადგილას, რომელსაც ამოირჩევს უფალი, თქვენი ღმერთი, თავისი სახელის დასავანებლად, იქ მიიტანეთ ყოველივე, რასაც მე გიბრძანებთ თქვენ: თქვენი სრულადდასაწველნი და თქვენი მსხვერპლები, თქვენი მეათედები და თქვენი ხელის აღსამართავები და ყოველი რჩეული თქვენს აღთქმულთაგან, რომელიც აღუთქვით უფალს.

¹²და იმხიარულეთ უფლის, თქვენი ღმერთის წინაშე, თქვენ და თქვენმა ძეებმა, და თქვენმა ასულებმა, და თქვენმა მსახურებმა, და თქვენმა მხევლებმა, და ლევიანმა, რომელიც თქვენს კარიბჭესთანაა, რადგან არა აქვს წილი და სამკვიდრო თქვენთან.

¹³გაფრთხილდი, არ აღავლინო შენი სრულადდასაწველნი ყოველ ადგილას, რომელსაც დაინახავ.

¹⁴არამედ მხოლოდ იმ ადგილას, რომელსაც ამოირჩევს უფალი ერთ-ერთ შენს ტომში. იქ აღავლინე შენი სრულადდასაწველნი, და იქ გააკეთე ყველაფერი, რასაც მე გიბრძანებ.

¹⁵ოღონდ ყოველთვის, როცა მოისურვებს შენი სული, შეგიძლია დაკლა და უფლის, შენი ღმერთის კურთხევით ჭამო ხორცი, რომელიც მან მოგცა ყოველ შენს კარიბჭეში. უწმიდურსა და წმიდას ეჭმევა, როგორც ქურციკი და როგორც ირემი.

¹⁶ოღონდ სისხლი არ ჭამოთ. წყალივით დაღვარეთ მიწაზე.

¹⁷უფლება არ გაქვს, რომ ჭამო შენს საცხოვრებლებში მარცვლეულის, ღვინისა და ზეთის მეათედი და შენი მსხვილფეხა და წვრილფეხა საქონლის პირველმოგებულები, და ყოველი შენი აღთქმული, რომელიც აღთქმული გაქვს. შენი ნებაყოფლობითი შესაწირავები და შენი ხელის აღსამართავი.

¹⁸არამედ მხოლოდ უფლის, შენი ღმერთის წინაშე ჭამეთ იგი, იმ ადგილზე, რომელსაც ამოირჩევს უფალი, შენი ღმერთი: შენ და შენმა ძემ, და შენმა ასულმა, და შენმა მსახურმა, და შენმა მხევალმა, და ლევიანმა, რომელიც შენს კარიბჭესთანაა. და გაიხარე უფლის, შენი ღმერთის, წინაშე მთელი შენი ნაამაგრით.

¹⁹გაფრთხილდი, არ მიატოვო ლევიანი მთელი შენი დღეების მანძილზე შენს მიწაზე.

²⁰როდესაც გააფართოვებს უფალი, შენი ღმერთი, შენს საზღვარს, როგორც გაუწყა, და იტყვი: „შევჭამ ხორცს“, რადგან შენი სული ისურვებს ხორცის ჭამას, მაშინ შენი სულის სურვილისამებრ ჭამე ხორცი.

²¹თუ შორს იქნება თქვენგან ის ადგილი, რომელსაც ამოირჩევს უფალი, თქვენი ღმერთი, თავისი სახელის იქ დასაწესებლად, მაშინ დაკალი შენი მსხვილფეხა და წვრილფეხა პირუტყვიდან, რომელიც მოგცა უფალმა, როგორც მე გიბრძანე, და ჭამე შენს კარიბჭეებში შენი სულის სურვილისამებრ,

²²ოღონდ, როგორც ქურციკი და ირემი იჭმევა, ისე ჭამეთ იგი. უწმიდურსა და წმიდას შეუძლია ჭამოს იგი.

²³მხოლოდ მკაცრად ეკრძალე, რათა არ ჭამო სისხლი, რადგან სისხლი სულია და არ უნდა ჭამო სული ხორცთან ერთად.

²⁴არ ჭამო იგი, წყალივით დაღვარეთ მიწაზე.

²⁵არ ჭამო იგი, რათა კარგად იყვნეთ შენ, და შენს შემდეგ, შენი ძენი, რადგან იმას გააკეთებ, რაც სწორია უფლის თვალში.

²⁶ოღონდ აიღე შენი შესაწირავები, რაც გექნება, და შენი აღთქმულები და მიდი იმ ადგილას, რომელსაც გამოარჩევს უფალი.

²⁷და შესწირე შენი სრულადდასაწველი, ხორცი და სისხლი, უფლის, შენი ღმერთის, სამსხვერპლოზე. შენი მსხვერპლის სისხლი უნდა დაიღვაროს უფლის, შენი ღმერთის, სამსხვერპლოზე, ხორცი კი ჭამე.

²⁸დაიცავი და გაიგონე ყველა ეს სიტყვა, რომელსაც მე გიბრძანებ, რათა კარგად იყვნეთ შენ და შენი ძენი, შენს შემდეგ, უკუნისამდე, რადგან იმას გააკეთებ, რაც კარგი და სწორია უფლის, შენი ღმერთის თვალში.

²⁹როდესაც მოსრავს უფალი, შენი ღმერთი, ხალხებს, რომლებთანაც შენ მიხვალ, რომ განდევნო ისინი შენი პირისაგან, და განდევნი მათ, და დასახლდები მათ ქვეყანაში,

³⁰გაფრთხილდი, არ გაება მახეში მათ უკან მას შემდეგ, რაც მოისპობიან შენი პირისაგან და არ დაუწყო ძებნა მათ ღმერთებს და არ თქვა: „როგორც ეს ხალხები ემსახურებიან თავიანთ ღმერთებს, მეც ისე მოვიქცევი.“

³¹და არ გაუკეთო ასე უფალს, შენს ღმერთს, რადგან ყველა სისაძაგლეს, რაც უფალს ეჯავრება, ისინი თავიანთ ღმერთებს უკეთებენ: თავიანთ ძეებსა და თავიანთ ასულებს ცეცხლში უწვავენ თავიანთ ღმერთებს.

³²ყოველი სიტყვა, რომელსაც მე გიბრძანებთ, დაიცავით შესასრულებლად. ნურც დაუმატებ მას და ნურც მოაკლებ.