Read ბიბლია რჯლ. 14 Bible Online

რჯლ. 14 - ბიბლია bible

რჯლ. 14

¹თქვენ ხართ ძენი უფლისა, თქვენი ღმერთისა. ტანს ნუ დაისერავთ და წარბებს ნუ გადაიპარსავთ მკვდრის გამო.

²რადგან წმიდა ხალხი ხარ შენ უფლისათვის, შენი ღმერთისათვის, და შენ ამოგირჩია უფალმა, რომ მისი უნჯი ხალხი ყოფილიყავი, ყველა ხალხს შორის დედამიწის ზურგზე.

³არ ჭამო არავითარი სისაძაგლე.

⁴ეს ცხოველებია, რომელთა ჭამაც შეგიძლია: ხარი, ცხვარი, თხა,

⁵ირემი, ქურციკი, შველი, ჯიხვი, ანტილოპა, კამეჩი და ნიამორი.

⁶და ყოველი ჩლიქგაყოფილი პირუტყვი, თუ გაჭრილი აქვს ორივე ჩლიქი მთლიანად და პირუტყვი, რომელიც იცოხნის, ის ჭამეთ.

⁷ოღონდ მცოხნელთაგან და ჩლიქგაყოფილთაგან, რომელთაც გაჭრილი აქვთ ჩლიქი, ამათგან არ ჭამოთ: აქლემი, კურდღელი და ბოცვერი, რადგან იცოხნიან და ჩლიქი კი არა აქვთ გაყოფილი მთლიანად. უწმიდურებია ისინი თქვენთვის.

⁸და ღორი, რომელსაც ჩლიქი აქვს გაყოფილი, მაგრამ არ იცოხნის, უწმიდურია თქვენთვის. მათი ხორცი არ ჭამოთ და მათ მძორსაც ნუ მიეკარებით.

⁹და ყოველთაგან, რაც წყალშია, ჭამეთ შემდეგი: ყოველი, რასაც ფარფლი და ქერცლი აქვს, ჭამეთ.

¹⁰და ყოველი, რასაც არა აქვს ფარფლი და ქერცლი, არ ჭამოთ, უწმიდურია თქვენთვის.

¹¹ყოველი სუფთა ფრინველი ჭამეთ.

¹²და აი, რა არ უნდა ჭამოთ: არწივი, ორბი, სვავი,

¹³ძერა, შევარდენი, სონღული მათი გვარითურთ,

¹⁴ყველა ყორანი მისი გვარითურთ,

¹⁵სირაქლემა, ბუ, თოლია, ქორი მათი გვარითურთ,

¹⁶კიოტა, ბუკნაჭო, ჭოტი,

¹⁷ვარხვი, ფსოვი, ჩვამა,

¹⁸ყარყატი, ყანჩა თავისი გვარითურთ, ოფოფი და ღამურა.

¹⁹და ყოველი ფრთოსანი მწერი უწმიდურია თქვენთვის, არ იჭმება.

²⁰ყოველი სუფთა ფრინველი ჭამეთ.

²¹არ ჭამოთ არავითარი ლეში. ხიზანს მიეცი, რომელიც შენს კარიბჭეებშია, და ჭამოს, ან მიჰყიდეთ უცხოელს. რადგან წმიდა ხალხი ხართ უფლისათვის, შენი ღმერთისათვის. ნუ მოხარშავთ თიკანს თავისი დედის რძეში.

²²აიღე მეათედი შენი ნათესის მთელი მოსავლიდან, რომელიც მოდის ყანაში ყოველწლიურად,

²³და ჭამე უფლის, შენი ღმერთის, წინაშე იმ ადგილზე, რომელსაც ის ამოირჩევს თავისი სახელის იქ დასავანებლად: მეათედი შენი მარცვლეულისა, შენი ღვინისა და შენი ზეთისა, და თქვენი მსხვილფეხა და წვრილფეხა საქონლის პირველმოგებულები, რათა ისწავლო უფლის, შენი ღმერთის შიში შენი დღენი.

²⁴და თუ დიდი გზა იქნება შენთვის და ვერ შეძლებ მის ტარებას, რადგან შორს იქნება შენგან ის ადგილი, რომელსაც ამოირჩევს უფალი, შენი ღმერთი, თავისი სახელის დასადებად, რათა გაკურთხოს უფალმა, შენმა ღმერთმა,

²⁵გადაცვალე ის ვერცხლზე და აიღე ეს ვერცხლი ხელში და წადი იმ ადგილისკენ, რომელსაც ირჩევს უფალი, შენი ღმერთი.

²⁶და მიეცი ფული ყველაფერში, რასაც შენი სული ისურვებს: მსხვილფეხა და წვრილფეხა საქონელი, ღვინო, მაგარი სასმელი, ყველაფერი, რასაც შენი სული მოგთხოვს. და ჭამე იქ უფლის, შენი ღმერთის, წინაშე, და გაიხარე შენ და შენმა სახლმა.

²⁷და ლევიანი, რომელიც შენს კარიბჭეებშია, არ მიატოვო, რადგან მას შენთან არა აქვს წილი და სამკვიდრო.

²⁸სამი წლის ბოლოს აიღე მეათედი იმ წლის მოსავლიდან და დააწყვე შენს კარიბჭეებში.

²⁹და მოვიდეს ლევიანი, რადგან არ გააჩნია მას წილი და სამკვიდრო; ობოლი და ქვრივი, რომელნიც შენს კარიბჭეებში არიან, და ჭამონ და გაძღნენ, რათა გაკურთხოს უფალმა, შენმა ღმერთმა, შენი ხელის ყოველ ნაქმარში, რასაც გააკეთებ.