Read ბიბლია რჯლ. 15 Bible Online

რჯლ. 15 - ბიბლია bible

რჯლ. 15

¹ყოველი მეშვიდე წელს პატიება ყავ.

²აი, პატიების რაობა: აპატიოს გამსესხებელმა, რომელიც სესხს მისცემს თავის მოყვასს, და არ გადაახდევინოს თავის მოყვასს და თავის ძმას, რადგან ცხადდება პატიება უფლისათვის.

³უცხოელს გადაახდევინე, მაგრამ რაც შენი ემართოს შენს ძმას, უნდა აპატიოს შენმა ხელმა.

⁴თუმცა არავინ იქნება შენთან გლახაკი, რადგან კურთხევით გაკურთხებს უფალი იმ ქვეყანაში, რომელსაც უფალი, შენი ღმერთი, გაძლევს დასამკვიდრებლად,

⁵ოღონდ თუ შეისმენ უფლის, შენი ღმერთის, ხმას, რათა დაიცვა შესასრულებლად ყველა ის მცნება, რომელსაც მე გიბრძანებ დღეს.

⁶რადგან უფალი, თქვენი ღმერთი, გაკურთხებს, როგორც გაუწყა, და შენ ასესხებ მრავალ ხალხს, და შენ კი არ ისესხებ. შენ იბატონებ ბევრ ხალხებზე, ისინი კი არ იბატონებენ შენზე.

⁷თუ იქნება შენთან გლახაკი, ერთი შენი ძმათაგანი, ერთ-ერთ შენს კარიბჭეში, იმ მიწაზე, რომელსაც უფალი, შენი ღმერთი, გაძლევს, არ გაიქვაო გული და ხელმოჭერილი ნუ იქნები შენი გლახაკი ძმის მიმართ,

⁸არამედ ხელგაშლილი იყავი და ასესხე მას მისი გასაჭირისამებრ, რაც მას სჭირდება.

⁹გაფრთხილდი, რომ გულში უღირსი ფიქრი არ შეგეპაროს და არ თქვა: „მოახლოვდა მეშვიდე წელი, წელიწადი პატიებისა“, და არ აითვალწუნო შენი გლახაკი ძმა და უარი არ უთხრა მას. ის შეჰღაღადებს შენზე უფალს და შენზე იქნება ცოდვა.

¹⁰მიცემით მიეცი მას, და მიცემისას ნუ იწუხებს შენი გული, რადგან გაკურთხებს ამისათვის უფალი, შენი ღმერთი, ყოველ შენს საქმეში და შენი ხელის ყოველ ნაამაგარში.

¹¹რადგან არ დაილევა გლახაკი ქვეყანაში, ამიტომ გიბრძანებ ხელგაშლილი იყო შენი ძმის მიმართ, შენი ღარიბისა და შენი გლახაკის მიმართ შენს ქვეყანაში.

¹²თუ მოგეყიდოს ებრაელი, ქალი ან კაცი, გემსახუროს ექვსი წელი, და მეშვიდე წელს კი გაათავისუფლე შენგან.

¹³და როცა გაათავისუფლებ შენგან, არ გაუშვა ხელცარიელი:

¹⁴დაასაჩუქრე შენი ფარიდან, შენი კალოდან და შენი საწნახლიდან. რითაც გაკურთხა უფალმა, შენმა ღმერთმა, მიეცი მას.

¹⁵გახსოვდეს, რომ შენც მონა იყავი ეგვიპტის ქვეყანაში და გამოგიხსნა უფალმა, შენმა ღმერთმა. ამისათვის გიბრძანებ ამ სიტყვას დღეს.

¹⁶და თუ გითხრას: „არ წავალ!“, რადგან შეგიყვარა მან შენ და შენი სახლი, ვინაიდან კარგად იყო შენთან,

¹⁷მაშინ აიღე სადგისი და ყური გაუხვრიტე კარზე, და შენი მსახური იყოს საუკუნოდ. და შენს მხევალსაც ასე მოექეცი.

¹⁸საძნელოდ ნუ გეჩვენება მისი გათავისუფლება შენგან, რადგან მოჯამაგირის ორმაგი ქირა დაიმსახურა შენგან ექვს წელიწადში. და გაკურთხებს უფალი, შენი ღმერთი, ყოველივეში, რასაც გააკეთებ.

¹⁹შესწირე უფალს, შენს ღმერთს, ყოველი პირველმოგებული, რომელიც მამალი დაიბადება წვრილფეხა და მსხვილფეხა საქონელში. არ ამუშაო შენი პირველმოგებული ხარი და არ გაპარსო წვრილფეხა პირუტყვის პირველმოგებული.

²⁰უფლის, შენი ღმერთის, წინაშე ჭამეთ იგი ყოველწლიურად შენ და შენმა სახლმა იმ ადგილას, რომელსაც ამოირჩევს უფალი.

²¹და თუ რამე ნაკლი ჰქონდეს, სიკოჭლე ან სიბრმავე, ან რაიმე ცუდი ხინჯი, ნუ შესწირავ მას უფალს, შენს ღმერთს.

²²შენს კარიბჭეებში შეჭამე იგი. გაუწმიდურებულსაც და განწმედილსაც შეუძლია ჭამოს იგი, როგორც ქურციკი და ირემი.

²³ოღონდ მისი სისხლი არ ჭამო, წყალივით დაღვარე.