Read ბიბლია რჯლ. 16 Bible Online

რჯლ. 16 - ბიბლია bible

რჯლ. 16

¹დაიცავი აბიბის თვე და შეასრულე პასექი უფლისა, შენი ღმერთისა, რადგან აბიბის თვეში გამოგიყვანა უფალმა, შენმა ღმერთმა, ეგვიპტიდან ღამით.

²და დაკალი პასექი უფლისათვის, შენი ღმერთისათვის, წვრილფეხა და მსხვილფეხა პირუტყვი იმ ადგილზე, რომელსაც ამოირჩევს უფალი, თავისი სახელის იქ დასავანებლად.

³არ ჭამო მასთან ერთად საფუარიანი. შვიდი დღე ჭამე მასთან ერთად ხმიადი, პური გაჭირვებისა (რადგან ნაჩქარევად გამოხვედით ეგვიპტის ქვეყნიდან), რათა გახსოვდეს ეგვიპტის ქვეყნიდან შენი გამოსვლის დღე მთელი შენი სიცოცხლე.

⁴და არ გამოჩნდეს საფუარიანი მთელს შენს არემარეში შვიდ დღეს, და დილამდე არ დარჩეს იმ ხორციდან, რომელსაც შენ მსხვერპლად შესწირავ პირველი დღის საღამოს.

⁵ვერ დაკლავ პასექს შენს რომელიმე კარიბჭეში, რომელსაც უფალი, შენი ღმერთი, გაძლევს,

⁶არამედ მხოლოდ იმ ადგილას, რომელსაც ამოირჩევს უფალი, შენი ღმერთი, თავისი სახელის იქ დასავანებლად, იქ დაკალი პასექი საღამოს, მზის ჩასვლისას, ეგვიპტიდან შენი გამოსვლის დროს.

⁷და გააკეთე და ჭამე იმ ადგილზე, რომელსაც ამოირჩევს უფალი, შენი ღმერთი, და განთიადზე დაბრუნდი და წადი კარვებისაკენ.

⁸ექვსი დღე ჭამე ხმიადი და მეშვიდე დღეს დღესასწაულია უფლისა, შენი ღმერთისა. არ აკეთო არანაირი საქმე.

⁹შვიდი შვიდეული გადაითვალე, სამკალში ნამგლის შეტანიდან დაიწყე თვლა შვიდი შვიდეულისა,

¹⁰და გადაუხადე შვიდეულთა დღესასწაული უფალს, შენს ღმერთს, შენი ნებით, რასაც გასცემ, როგორც გაკურთხებს უფალი, შენი ღმერთი.

¹¹და იხარე უფლის, შენი ღმერთის, წინაშე, შენ და შენმა ძეებმა, შენმა ასულებმა, შენმა მსახურებმა, შენმა მხევლებმა და ლევიანმა, რომელნიც შენს კარიბჭეებშია, და ხიზანმა, ობოლმა და ქვრივმა, რომელნიც შენს შორის არიან, იმ ადგილზე, რომელსაც ამოირჩევს უფალი, თქვენი ღმერთი, თავისი სახელის იქ დასავანებლად.

¹²და გახსოვდეს, რომ მონა იყავი ეგვიპტეში, და დაიცავი და შეასრულე ეს წესები.

¹³იზეიმე კარვობის დღესასწაული შვიდ დღეს, როდესაც შენი კალოდან და საწნახლიდან მოიწევ მოსავალს.

¹⁴და იხარე შენს დღესასწაულებში, შენ და შენმა ძეებმა, შენმა ასულებმა, შენმა მსახურებმა, შენმა მხევლებმა და ლევიანმა, რომელიც შენს კარიბჭეებშია, და ხიზანმა, ობოლმა და ქვრივმა.

¹⁵შვიდი დღე იდღესასწაულეთ უფლის, შენი ღმერთისათვის, იმ ადგილზე, რომელსაც ამოირჩევს იგი, რადგან გაკურთხებს უფალი, შენი ღმერთი, მოსავლითა და შენი ხელის ყოველი ნაქმარით, და სულ მხიარული იქნები.

¹⁶წელიწადში სამჯერ გამოცხადდეს ყველა შენი მამაკაცი უფლის, შენი ღმერთის, წინაშე იმ ადგილას, რომელსაც ის ამოირჩევს: უფუარობის დღესასწაულზე, შვიდეულის დღესასწაულზე და კარვობის დღესასწაულზე. და არავინ არ გამოცხადდეს უფლის წინაშე ხელცარიელი,

¹⁷არამედ თითოეულმა, რაც შეძლოს, ის უძღვნას უფლის, შენი ღმერთის, კურთხევის კვალობაზე, რაც უფალს შენთვის მოუცია.

¹⁸მსაჯულნი და ზედამდგომნი დაიყენე ყველა შენს კარიბჭეში, რომელსაც უფალი, შენი ღმერთი, გაძლევს შენი ტომების მიხედვით, რათა განსაჯონ ხალხი, მართალი სამართლით.

¹⁹არ გაამრუდო სამართალი, მიკერძოება არ გამოიჩინო და ქრთამი არ აიღო, რადგან ქრთამი თვალს უბრმავებს ბრძენკაცებს და აუკუღმართებს მართალთა საქმეებს.

²⁰სიმართლეს, სიმართლეს მისდიე, რათა იცოცხლო და დაიმკვიდრო ის ქვეყანა, რომელსაც უფალი, შენი ღმერთი, გაძლევს შენ.

²¹არ დაირგო აშერა, რა ხისაც არ უნდა იყოს, უფლის, შენი ღმერთის, სამსხვერპლოსთან, რომელსაც შენთვის გაიკეთებ.

²²და არ აღიმართო ძეგლები, რადგან სძულს იგი უფალს, შენს ღმერთს.