Read ბიბლია რჯლ. 19 Bible Online

რჯლ. 19 - ბიბლია bible

რჯლ. 19

¹როცა მოსპობს უფალი, შენი ღმერთი, ხალხებს, რომელთა ქვეყანასაც შენ გაძლევს უფალი, შენი ღმერთი, და განდევნი მათ და დასახლდები მათ ქალაქებში და მათ სახლებში,

²სამი ქალაქი გამოყავი შენთვის შენს ქვეყანაში, რომელსაც უფალი, შენი ღმერთი, გაძლევს დასამკვიდრებლად.

³განიმზადე გზა და სამ ნაწილად გაყავი შენი ქვეყნის მიწა-წყალი, რომელსაც გიწილადებს შენ უფალი, შენი ღმერთი. და ის იქნება თავშესაფარი ყველა მკვლელისთვის.

⁴და აჰა, როგორ მკვლელს შეუძლია თავი შეაფაროს იქ და გადარჩეს: ვინც მოკლავს თავის მოყვასს უნებლიეთ და არ სძულებია იგი არც გუშინ და არც გუშინწინ,

⁵ან ვინც წავა თავის მოყვასთან ერთად ტყეში შეშის მოსაჭრელად და ხელით ცულს მოიქნევს ხის მოსაჭრელად, და ტარს რკინა გაძვრება და მოხვდება მოყვასს და მოკლავს, გაიქცეს იგი ერთ-ერთში ამ ქალაქთაგან, რათა გადარჩეს.

⁶რომ არ დაედევნოს მესისხლე მკვლელს ცხელ გულზე, არ დაეწიოს, თუ შორი იქნება გზა, და არ მოკლას მკვლელი, ის კი არ იმსახურებს სიკვდილს, რადგან არ სძულებია იგი არც გუშინ და არც გუშინწინ.

⁷ამიტომ გიბრძანებ ასე: სამი ქალაქი გამოყავი.

⁸და როცა გააფართოვებს უფალი, შენი ღმერთი, შენს საზღვრებს, როგორც შეჰფიცა შენს მამებს, და მოგცემს მთელს ქვეყანას, რომლის მიცემაც აღუთქვა შენს მამებს,

⁹და თუ დაიცავ ყველა ამ მცნებას შესასრულებლად, რომელსაც გიბრძანებ დღეს, რათა გიყვარდეს უფალი, შენი ღმერთი, და იარო მის გზაზე დღენიადაგ, დაუმატე კიდევ სამი ქალაქი ამ სამ ქალაქს.

¹⁰და ნუ დაიღვრება უდანაშაულო სისხლი შენს ქვეყანაში, რომელსაც უფალი, შენი ღმერთი, გაძლევს სამკვიდროდ, და არ იქნება შენზე სისხლი.

¹¹ხოლო თუ ვინმეს ეძულება თავისი მოყვასი და ჩაუსაფრდება მას, აღდგება მის წინააღმდეგ, სცემს და შემოაკვდება იგი და თავს შეაფარებს ერთერთს ამ ქალაქთაგან,

¹²მიავლინონ მისი ქალაქის უხუცესებმა და მოიყვანონ იგი იქიდან, და გადასცენ იგი მესისხლის ხელს, რათა მოკვდეს.

¹³ნუ შეიბრალებს შენი თვალი მას, და განაშორე უდანაშაულო სისხლი ისრაელს და კარგი იქნება შენთვის.

¹⁴არ გადაწიო შენი მოყვასის მიჯნა, წინაპრებმა რომ გამიჯნეს შენს სამკვიდროში, რომელსაც დაიმკვიდრებ ქვეყანაში, რომელსაც უფალი, შენი ღმერთი გაძლევს.

¹⁵საკმარისი არ არის მხოლოდ ერთი მოწმე ვინმეს წინააღმდეგ რაიმე დანაშაულისათვის და რაიმე ცოდვისათვის, რითაც შესცოდავს. ორი მოწმის პირით ან სამი მოწმის პირით დადგინდეს საქმე.

¹⁶თუ გამოვა ბოროტი მოწმე ვინმეს წინააღმდეგ, რათა რაიმე ბრალი დასწამოს მას,

¹⁷მაშინ წარდგეს ეს ორი მოდავე კაცი უფლის წინაშე, მღვდელთა და მსაჯულთა წინაშე, რომელნიც იქნებიან იმ დღეებში,

¹⁸და კარგად გამოიძიონ მსაჯულებმა, და თუ ეს მოწმე ცრუ მოწმეა, ცილი დასწამა თავის ძმას,

¹⁹გაუკეთეთ მას, რისი გაკეთებაც ჰქონდა განზრახული თავისი ძმისათვის. და აღმოფხვრით ბოროტებას შენი წიაღიდან.

²⁰და დანარჩენები მოისმენენ და შეშინდებიან, და აღარ ჩაიდენენ ამ ბოროტებას შენს წიაღში.

²¹და არ შეიბრალოს ის შენმა თვალმა: სული სულის წილ, თვალი თვალის წილ, კბილი კბილის წილ, ხელი ხელის წილ, ფეხი ფეხის წილ.