Read ბიბლია რჯლ. 33 Bible Online

რჯლ. 33 - ბიბლია bible

რჯლ. 33

¹ეს არის კურთხევა, რომლითაც აკურთხა მოსემ, ღვთისკაცმა, ისრაელის ძენი თავისი სიკვდილის წინ.

²და თქვა: „უფალი მოვიდა სინაიდან და ამოუბრწყინდა მათ სეყირიდან, გამოჩნდა ფარანის მთიდან და მოვიდა ათი ათასობით წმიდათაგან. მის მარჯვნივ იყო რჯულის ცეცხლი მათთვის.

³ნამდვილად უყვარს ხალხები. მათი ყოველი წმიდა შენს ხელშია და ისინი ღებულობენ შენს სიტყვებს და ისინი დაემხენ შენს ფერხთით.

⁴რჯული გვიბრძანა ჩვენ მოსემ, იაკობის კრებულის წილხვედრი.

⁵ის იყო მეფედ იეშურუნში, როცა შეიკრიბნენ ხალხის მთავრები ისრაელის ტომებთან ერთად.

⁶იცოცხლოს რეუბენმა და არ მოკვდეს, და ნუ იქნება მისი ხალხი მცირერიცხოვანი!“

⁷და ეს თქვა იუდაზე: „ისმინე, უფალო, იუდას ხმა და მიიყვანე თავის ხალხთან იგი. მისი ხელი იბრძოლებს მისთვის და მტერთაგან შემწედ შენ ეყოლები.“

⁸და ლევიზე თქვა: „შენი თუმიმი და ურიმი შენს წმიდა კაცს, რომელიც მასაში გამოსცადე, და ედავე მერიბას წყლებთან,

⁹რომელიც ამბობს თავის მამაზე და თავის დედაზე: ‘მე ისინი არ მინახავს.’ და არ იცნობდა თავის ძმებს და არ ცნობდა თავის ძეთ, რადგან იცავდნენ ისინი შენს ნათქვამს და ინახავდნენ შენს აღთქმას.

¹⁰და ასწავლონ შენი სამართალნი იაკობს და შენი რჯული — ისრაელს. დადონ საკმეველი შენს წინაშე და სრულადდასაწველი — შენს სამსხვერპლოზე.

¹¹აკურთხე, უფალო, მისი ძალა, და მოიწონე მისი ხელის ნამოქმედარი. მოსწყვიტე წელი მის მოწინააღმდეგეებს და მოძულეებს, რომ ფეხზე ვეღარ დადგნენ“.

¹²და ბენიამინზე თქვა: „უფლის მოყვარულმა უშიშრად დაივანოს მისით. იგი მფარველობს მას დღენიადაგ და დავანებულია მის მხრებს შორის.“

¹³და იოსებზე თქვა: „აკურთხოს უფალმა მისი ქვეყანა ცის მადლით, ცვარითა და ქვეშ განრთხმული უფსკრულით,

¹⁴და მზის მადლიანი მოსავლითა და მთვარის მადლიანი ნაყოფით,

¹⁵და ძველი მთების პირველნაყოფით, და საუკუნო ბორცვების მადლით,

¹⁶და მიწის მადლით და მისი სისავსით. მაყვლოვანში დავანებულის წყალობა გადმოვიდეს იოსების თავზე და მის ძმათა შორის გამორჩეულის თხემზე.

¹⁷მას პირველშობილი კუროს ბრწყინვალება აქვს, მისი რქები მარტორქის რქებია. ამით ურქენს ხალხებს ერთიანად ქვეყნის კიდემდე. და ესენია ათი ათასები ეფრემისა და ესენია ათასეულები მენაშესი.“

¹⁸და ზებულუნზე თქვა: „იხარე, ზებულუნ, შენი გამოსვლისას, და, ისაქარ, შენს კარვებში.

¹⁹და მოიწვევენ მთაზე ხალხებს, იქ შესწირავენ სიმართლის მსხვერპლებს, რადგან ისინი გამოწოვენ ზღვის სიუხვეს და ქვიშაში ჩამალულ საგანძურებს.“

²⁰და გადზე თქვა: „კურთხეულია გადის განმვრცობი. ლომივით განისვენებს და გლეჯს მკლავსაც და თხემსაც.

²¹და ნახა თავისთვის საუკეთესო წილი, რადგან იქაა რჯულმდებლის წილი გადანახული. მოვიდა იგი ხალხის მთავრებთან ერთად და შეასრულა უფლის სიმართლე და მისი სამართალი ისრაელთან.“

²²და დანზე თქვა: „დანი ბოკვერია ლომისა, რომელიც ხტება ბაშანიდან.“

²³და ნაფთალზე თქვა: „ნაფთალი მაძღარია წყალობით და აღსავსეა უფლის კურთხევით. დასავლეთით და სამხრეთით დაემკვიდრება.“

²⁴და აშერზე თქვა: „კურთხეულია ძეთაგან აშერი. თავისი ძმების სასურველი იქნება და ფეხს ზეთში ჩადგამს.

²⁵რკინა და სპილენძი იყოს შენი ურდულები. და დღეებივით იყოს შენი დოვლათი.

²⁶არ არის იერუშუნის ღმერთის სადარი, რომელიც ცაზეა ამხედრებული შენს შემწედ და ღრუბლებზე თავისი დიდებით.

²⁷თავშესაფარია პირვანდელი ღმერთი და ქვემოდანაა საუკუნო მკლავები. და განდევნა მტერი შენი პირისაგან, და თქვა: ‘გაანადგურე!’

²⁸და დაივანებს ისრაელი უშიშრად, მარტო. იაკობის წყარო მარცვლეულის და მაჭრის ქვეყანაში, მისი ციდან ცვარი მოწვეთავს.

²⁹ნეტარი ხარ შენ, ისრაელ! ვინ შეგედრება? შენ, ერო, გამოხსნილო უფლის მიერ, რომელიც შენი შეწევნის ფარია, და შენი ბრწყინვალების მახვილი! შენი მტრები ფეხქვეშ გაგეგებიან, და შენ გათელავ მათ გორაკებს.“