Read ბიბლია რჯლ. 6 Bible Online

რჯლ. 6 - ბიბლია bible

რჯლ. 6

¹და აჰა, მცნებები, წესები და სამართალნი, რომელნიც გიბრძანათ უფალმა, თქვენმა ღმერთმა, რომ გასწავლოთ თქვენ, რათა შეასრულო იმ ქვეყანაში, რომლის დასამკვიდრებლადაც მიდიხართ.

²რათა გეშინოდეს უფლისა, შენი ღვთისა, რომ დაიცვა ყველა მისი წესი და მისი მცნება, რომელთაც მე გიბრძანებთ, შენ და შენს ძეს, და შენი ძის ძეს, მთელი შენი სიცოცხლის დღეებში, რათა დღეგრძელი იყო.

³ისმინე, ისრაელ, და დაიცავი შესასრულებლად, რათა კარგად იყო, და რათა გამრავლდე ძალზე, როგორც გითხრა უფალმა, შენი მამების ღმერთმა, [რომ მოგცემს იმ] ქვეყანას, სადაც მოედინება რძე და თაფლი.

⁴ისმინე, ისრაელ: უფალი, ჩვენი ღმერთი, ერთი უფალია.

⁵და შეიყვარე უფალი, ღმერთი შენი, მთელი შენი გულითა და სულით, და მთელი შენი ძალით.

⁶და იყოს ეს სიტყვანი, რომელთაც მე გიბრძანებ დღეს, შენს გულში.

⁷ჩაუნერგე ისინი შენს ძეთ და ელაპარაკე მათზე სახლში ჯდომისას, და გზაზე სიარულისას, დაწოლისას, და ადგომისას.

⁸და შეიბი ისინი ნიშნად ხელზე, და იყოს ისინი შუბლსაკრავად შენს თვალებს ზემოთ,

⁹და დააწერე ისინი შენი სახლის კარის წირთხლებსა და შენს კარიბჭეებს.

¹⁰და როცა შეგიყვანს უფალი, შენი ღმერთი, იმ ქვეყანაში, რომლის გამოც შეჰფიცა თქვენს მამებს — აბრაამს, ისაკსა და იაკობს, რომ შენ მოგცემდა დიდ და კარგ ქალაქებს, რომელნიც შენ არ აგიშენებია,

¹¹და ყოველნაირი სიკეთით სავსე სახლებს, რომელნიც შენ არ აგივსია, და ამოკვეთილ ჭებს, რომელნიც შენ არ ამოგიკვეთია, ბაღ-ვენახებსა და ზეთისხილის ხეებს, რომელნიც შენ არ გაგიშენებია, და შეჭამ და გაძღები,

¹²გაფრთხილდი, რათა არ დაივიწყო უფალი, რომელმაც გამოგიყვანა ეგვიპტის ქვეყნიდან, მონობის სახლიდან.

¹³გეშინოდეს უფლისა, შენი ღვთისა, და მას ემსახურე, და მის სახელს ფიცულობდე.

¹⁴არ გაჰყვეთ უცხო ღმერთების კვალს, იმ ხალხების ღმერთთაგან, რომელნიც თქვენ ირგვლივ არიან,

¹⁵რადგან უფალი, შენი ღმერთი, რომელიც შენს შორისაა, შურისმგებელი ღმერთია. თორემ აღეგზნება უფლის, შენი ღვთის, რისხვა შენზე და მოგსპობს მიწის პირისაგან.

¹⁶არ გამოსცადოთ უფალი, თქვენი ღმერთი, როგორც გამოსცადეთ მასაში.

¹⁷მტკიცედ დაიცავით უფლის, თქვენი ღმერთის, მცნებები, მისი მოწმობანი და მისი წესები, რომელნიც გიბრძანა შენ.

¹⁸და სწორად და კეთილად მოიქეცი უფლის თვალში, რათა კარგად იყო, რომ მიხვიდე და დაიმკვიდრო კარგი ქვეყანა, რომელიც შეჰფიცა უფალმა შენს მამებს,

¹⁹რომ განდევნოს მთელი შენი მტრები შენი პირისაგან, როგორც ნათქვამი აქვს უფალს.

²⁰თუ შეგეკითხება ხვალ შენი შვილი და გეტყვის: „რა არის ეს მოწმობანი, წესები და სამართალნი, რომელიც გიბრძანათ თქვენ უფალმა, ჩვენმა ღმერთმა“?

²¹უთხარი შენს შვილს: „მონებად ვიყავით ფარაონთან ეგვიპტეში, და გამოგვიყვანა ჩვენ უფალმა ეგვიპტიდან ძლიერი ხელით.

²²მოუვლინა უფალმა დიდი და საშინელი ნიშნები და სასწაულები და სასჯელები ეგვიპტეს, ფარაონსა და მთელ მის სახლს ჩვენს თვალწინ.

²³და ჩვენ გამოგვიყვანა იქიდან, რათა აქ მოვეყვანეთ, რათა მოეცა ჩვენთვის ქვეყანა, რომელიც შეჰფიცა ჩვენს მამებს.

²⁴და გვიბრძანა ჩვენ უფალმა აღსრულება ყველა იმ წესისა, რათა გვეშინოდეს უფლისა, ჩვენი ღმერთისა, დღენიადაგ კარგად ვიყოთ, რომ ცოცხალი დავრჩეთ, როგორც ამ დღესა ვართ.

²⁵და ჩვენ ჩაგვეთვლება სიმართლედ, თუ დავიცავთ შესასრულებლად ყველა ამ მცნებას უფლის, ჩვენი ღმერთის წინაშე, როგორც მან გვიბრძანა.“