Read ბიბლია იესო. 10 Bible Online

იესო. 10 - ბიბლია bible

იესო. 10

¹და როცა გაიგო ადონი-ცედეკმა, იერუსალიმის მეფემ, რომ აიღო იესომ ქალაქი ჰაღაი და დაარისხა იგი და ასევე მოექცა ჰაღაისა და მის მეფეს, და რომ დაეზავნენ გაბაონის მკვიდრები ისრაელს და დარჩნენ მათ შორის,

²დიდად შეშინდა, რადგან დიდი ქალაქი იყო გაბაონი, ერთ-ერთი სამეფო ქალაქივით, აღემატებოდა იგი ჰაღაის და ყველა მისი კაცი მამაცი იყო.

³ამიტომ შეუთვალა ადონი-ცედეკმა, იერუსალიმის მეფემ, ჰოჰამს — ხებრონის მეფეს, ფირამს — იარმუთის მეფეს, იაფიაყს — ლაქიშის მეფეს და დებირს — ყეგლონის მეფეს, და უთხრა:

⁴„ამოდით ჩემთან და შემეწიეთ მე, და მოვსრათ გაბაონი, რადგან იგი დაეზავა იესოს და ისრაელის ძეთ.“

⁵და შეიყარა და ავიდა ხუთი ამორეველი მეფე: იერუსალიმისა, ხებრონისა, იარმუთისა, ლაქიშისა და ყეგლონისა, ისინი და მთელი მათი ლაშქარი, და დაიბანაკეს გაბაონთან, და ბრძოლა გაუმართეს მას.

⁶და შეუთვალეს გაბაონის კაცებმა იესოს გილგალის ბანაკში, და უთხრეს: „ნუ აიღებ ხელს შენს მსახურებზე. ჩქარა ამოდი ჩვენთან და გვიხსენი და შეგვეწიე, რადგან შეიყარა ჩვენს წინააღმდეგ ყველა ამორეველი მეფე, მთის მკვიდრნი.“

⁷და გავიდა იესო გილგალიდან ყველა ბრძოლისუნარიანი ხალხითა და ყველა მამაცი მებრძოლით.

⁸და უთხრა უფალმა იესოს: „ნუ გეშინია მათი, რადგან ხელში ჩაგიგდე ისინი, წინ ვერ დაგიდგება ვერცერთი მათგანი.“

⁹და ანაზდეულად მიადგა მათ იესო, მთელ ღამეს გილგალიდან ნავალი.

¹⁰და თავზარი დასცა მათ უფალმა ისრაელის წინაშე და შემუსრა ისინი დიდი შემუსვრით გაბაონში, დაედევნა ბეთ-ხორონის აღმართ გზაზე და მუსრავდა მათ ყაზეკამდე და მაკედამდე.

¹¹და იყო, როცა ისინი ისრაელს გაურბოდნენ ბეთ-ხორონის ფერდობზე, უფალი დიდ ქვებს უშენდა ზეციდან ყაზეკამდე, და იხოცებოდნენ. და ვინც სეტყვის ქვებით დაიხოცნენ, უფრო მეტნი იყვნენ, ვიდრე ისინი, ვინც ისრაელის ძეთ გაწყვიტეს მახვილით.

¹²მაშინ ელაპარაკა იესო უფალს იმ დღეს, როდესაც უფალმა ამორეველები ჩაუგდო ხელში ისრაელის ძეთ, და თქვა ისრაელის თვალწინ: „მზეო, შეჩერდი გაბაონზე და მთვარევ — აიალონის ველზე!“

¹³და შეჩერდა მზე, და მთვარე დადგა, ვიდრე არ იძია ერმა შური თავის მტრებზე. და განა არ სწერია ეს სიმართლის წიგნში: „და მზე იდგა ცის შუაგულში მთელი დღე და ჩასვენებას არ ჩქარობდა“?

¹⁴და არ ყოფილა ასეთი დღე არც უწინ და არც მის შემდგომ, რომ [ასე] შეესმინოს უფალს კაცის ხმა, რადგან უფალი იბრძოდა ისრაელისთვის.

¹⁵და დაბრუნდა იესო და მასთან ერთად მთელი ისრაელი გილგალის ბანაკში.

¹⁶და გაიქცა ის ხუთი მეფე და დაიმალა მაკედას მღვიმეში.

¹⁷და ამბავი მიუტანეს იესოს: „ხუთი მეფე მაკედას მღვიმეში დამალული აღმოჩნდა“.

¹⁸და თქვა იესომ: „მიაგორეთ დიდრონი ქვები მღვიმის პირს და მიუჩინეთ მას კაცები საყარაულოდ.

¹⁹თქვენ ნუ შეჩერდებით, დაედევნეთ უკან თქვენს მტრებს და მოსწყვიტეთ კუდი, და ნუ დაანებებთ მათ თავიანთ ქალაქებში შესვლას, რადგან ხელში ჩაგიგდოთ ისინი უფალმა, თქვენმა ღმერთმა.“

²⁰და როცა მორჩნენ იესო და ისრაელის ძენი მათ მუსვრას ძალზე დიდი მუსვრით, ვიდრე არ განადგურდნენ, ხოლო გადარჩენილნი გაექცნენ მათ და მივიდნენ გამაგრებულ ქალაქებში,

²¹დაბრუნდა მთელი ხალხი იესოსთან მაკედას ბანაკში მშვიდობიანად. კაციშვილმა ვერ დაძრა ენა ისრაელის ძეთა წინააღმდეგ.

²²და თქვა იესომ: „გახსენით მღვიმის პირი და გამოიყვანეთ ჩემთან ის ხუთი მეფე მღვიმიდან.“

²³და გააკეთეს ასე, და გამოუყვანეს მას ის ხუთი მეფე მღვიმიდან — მეფე იერუსალიმისა, მეფე ხებრონისა, მეფე იარმუთისა, მეფე ლაქიშისა და მეფე ყეგლონისა.

²⁴და როცა გამოუყვანეს ეს ხუთი მეფე იესოს, მოუხმო იესომ მთელ ისრაელს და უთხრა მხედართმთავრებს, რომელნიც იყვნენ მასთან: „ახლოს მოდექით, დაადგით თქვენი ფეხი ქედზე ამ მეფეებს.“ და ახლოს მოდგნენ და ქედზე დაადგეს მათ თავიანთი ფეხი.

²⁵და უთხრა იესომ მათ: „ნუ შეგეშინიდებათ და ნურც შეძრწუნდებით, გაძლიერდით და განმტკიცდით, რადგან ასე მოექცევა უფალი ყველა თქვენს მტერს, ვისაც კი შეებრძოლებით.“

²⁶და შემდეგ განგმირა ისინი იესომ, და მოკლა ისინი და ჩამოკიდა ხუთ ხეზე. და ეკიდნენ ისინი ხეებზე საღამომდე.

²⁷და მზის ჩასვლისას ბრძანა იესომ და ჩამოხსნეს ისინი ხეებიდან, და გადაყარეს ისინი მღვიმეში, რომელშიც იმალებოდნენ, და დიდრონი ქვები მიაყარეს მღვიმის პირს. და ასეა დღევანდლამდე.

²⁸და მაკედა აიღო იესომ იმავე დღეს, და მოსრა იგი და მისი მეფე მახვილის პირით, დაარისხა ისინი და ყველა სულდგმული, რაც კი იქ იყო, არავინ დაუტოვებია ცოცხალი. და მაკედას მეფეს ისე მოექცა, როგორც იერიხოს მეფეს მოექცა.

²⁹და წავიდა იესო, და მთელი ისრაელი მასთან ერთად მაკედადან ლიბნასაკენ, და ბრძოლა გაუმართა ლიბნას.

³⁰და ხელში ჩაუგდო უფალმა ისიც და მისი მეფეც ისრაელს. და განგმირა მახვილის პირით იგი და ყველა სულდგმული, რაც კი იქ იყო; არავინ დაუტოვებია ცოცხალი. და მის მეფეს ისე მოექცა, როგორც იერიხოს მეფეს მოექცა.

³¹და წავიდა იესო, და მთელი ისრაელი მასთან ერთად, ლიბნადან ლაქიშისაკენ, და დაიბანაკეს მის ახლოს, და ბრძოლა გაუმართეს.

³²და ხელში ჩაუგდო უფალმა ლაქიში ისრაელს და აიღო იგი მეორე დღეს, და მოსრა მახვილის პირით იგი და ყველა სულდგმული, რაც კი იქ იყო, ისევე, როგორც ლიბნაში.

³³და მაშინ გამოვიდა ჰორამი, მეფე გეზერისა ლაქიშის საშველად, და იესომ განგმირა იგი და მისი ხალხი ისე, რომ არავინ დაუტოვებია მათგან ცოცხალი.

³⁴და წავიდა იესო, და მთელი ისრაელი მასთან ერთად, ლაქიშიდან ყეგლონისაკენ, და დაიბანაკა მის ახლოს, და ბრძოლა გაუმართა.

³⁵და იმავე დღეს აიღო იგი, და მოსრა მახვილის პირით ყოველი სული, ვინც იქ იყო, და იმავე დღეს გაანადგურა ისე, როგორც ლაქიში.

³⁶და წავიდა იესო, და მთელი ისრაელი მასთან ერთად, ყეგლონიდან ხებრონისაკენ და ბრძოლა გაუმართა.

³⁷და აიღეს იგი, და მოსრეს მახვილის პირით მისი მეფეც, და ყოველი მისი ქალაქი, და ყოველი სული, ვინც იქ იყო და არავინ დაუტოვებიათ ცოცხალი, როგორც ყეგლონში. და მოსპეს იგი და ყოველი სული, რაც იქ იყო.

³⁸და მობრუნდა იესო, და მთელი ისრაელი მასთან ერთად დებირისაკენ, და ბრძოლა გაუმართა.

³⁹და მან აიღო იგი, და მისი მეფეც და მისი ყველა ქალაქი, და განგმირა ისინი მახვილის პირით, და მოსპეს ყოველი სული ვინც იქ იყო, არავინ დაუტოვებიათ ცოცხალი. როგორც მოექცნენ ხებრონს, ეგრე მოექცნენ დებირს და მის მეფეს, და ლიბნას და მის მეფეს.

⁴⁰და მოსრა იესომ მთელი მთიანეთი, სამხრეთი მხარე, ვაკობი, ფერდობები და ყველა მათი მეფე. არავინ დაუტოვებია ცოცხალი და გაანადგურა ყოველი სული, როგორც უბრძანა ისრაელის უფალმა ღმერთმა.

⁴¹და მოსრა ისინი იესომ კადეშ-ბარნეაყიდან ვიდრე ღაზამდე, და მთელი ქვეყანა გოშენისა ვიდრე გაბაონამდე.

⁴²და ყველა ეს მეფე და მათი ქვეყანა აიღო იესომ ერთ ჯერზე, რადგან უფალი, ისრაელის ღმერთი, იბრძოდა ისრაელისათვის.

⁴³და დაბრუნდა იესო, და მთელი ისრაელი მასთან ერთად ბანაკში, გილგალს.