Read ბიბლია იესო. 11 Bible Online

იესო. 11 - ბიბლია bible

იესო. 11

¹და როცა გაიგო ეს იაბინმა, ხაცორის მეფემ, მაშინვე შეუთვალა იობაბს, მადონის მეფეს, და შიმრონისა და აქშაფის მეფეებს,

²და აგრეთვე მეფეებს, რომელნიც მკვიდრობდნენ ჩრდილოეთში, მთაში და ბარში, ქინერეთის სამხრეთით, და ყარაბაში, და დორის ბორცვებზე, დასავლეთით.

³ქანაანელებს, რომლებიც მკვიდრობდნენ აღმოსავლეთით და დასავლეთით, და ამორეველებს, ხეთელებს, ფერიზელებს და იებუსელებს — მთაში, ხიველებს ხერმონის ძირას, მიცფას ქვეყანაში.

⁴და გამოვიდნენ ისინი და მთელი ბანაკი მათთან ერთად, მრავალრიცხოვანი ხალხი, იმ ქვიშასავით უთვალავი, ზღვის ნაპირზე რომაა; ძალზე მრავალი იყო ცხენი და ეტლი.

⁵და შეიყარა ყველა ეს მეფე, და მოვიდნენ, და დაიბანაკეს ერთად მერომის წყლებთან, რათა ისრაელს შებრძოლებოდნენ.

⁶და უთხრა უფალმა იესოს: „ნუ გეშინია მათი, რადგან ხვალ, ამ დროისთვის, ყველა მათგანს შევმუსრავ ისრაელის წინაშე; მყესები გადაუჭერით მათ ბედაურებს და მათი ეტლები დაწვით ცეცხლში.“

⁷და მივიდა ანაზდეულად იესო, და მთელი მებრძოლი ხალხი მასთან ერთად მერომის წყლებთან, და თავს დაესხნენ მათ.

⁸და ხელში ჩაუგდო ისინი უფალმა ისრაელს, და მოსრეს ისინი, და სდიეს მათ დიდ ციდონამდე, და მისრეფოთ-მაიმამდე, და მიცფას ველამდე აღმოსავლეთით, და მოსრეს ისინი, და არავინ დაუტოვებიათ მათგან ცოცხალი.

⁹და ისე მოექცა მათ იესო, როგორც უთხრა მას უფალმა: მათ ცხენებს მყესები გადაუჭრა და მათი ეტლები დაწვა ცეცხლში.

¹⁰და დაბრუნდა იესო იმავ დროს და დაიპყრო ხაცორი, და მოკლა მისი მეფე მახვილით.

¹¹და მახვილის პირით მოსრეს ყოველი სული, ვინც კი იქ იყო, და გაანადგურეს. არავინ დარჩენილა ცოცხალი და ხაცორი დაწვეს ცეცხლით.

¹²და ამ მეფეთა ყველა ქალაქი და ყველა მეფე ჩაიგდო ხელში იესომ, და გაანადგურა ისინი მახვილის პირით, და დაარისხა, როგორც უბრძანა მას მოსემ, უფლის მსახურმა.

¹³ისრაელს არ დაუწვავს არცერთი ბორცვებზე გაშენებული ქალაქი, გარდა ხაცორისა, მხოლოდ ის დაწვა იესომ.

¹⁴და მთელი ნადავლი ამ ქალაქებისა და პირუტყვი დაიტაცეს თავიანთთვის ისრაელის ძეთ. ხოლო ყველა ადამიანი მოსრეს მახვილის პირით მათ, ვიდრე არ გაანადგურეს, ერთიც არ დაუტოვებიათ ცოცხალი.

¹⁵როგორც უბრძანა უფალმა მოსეს, თავის მსახურს, ასევე უანდერძა მოსემ იესოს, და ასევე შეასრულა იესომ, ერთი სიტყვითაც არ გადაუხვევია იმისაგან, რაც უბრძანა უფალმა მოსეს.

¹⁶და აიღო იესომ მთელი ეს მთიანი ქვეყანა და მთელი სამხრეთის ქვეყანა, და მთელი გოშენის ქვეყანა, ვაკობები და ყარაბა, ისრაელის მთა და ბარი.

¹⁷ხალაკის მთიდან მოკიდებული სეყირისაკენ, ვიდრე ბაყალ-გადამდე, ლიბანის ველზე, ხერმონის მთის ძირას, და ყველა მათი მეფე შეიპყრო, და მოსრა ისინი, და დახოცა.

¹⁸მრავალი დღე ეწეოდა იესო ომს ყველა ამ მეფესთან.

¹⁹და არ ყოფილა ქალაქი, რომელიც დაზავებოდეს ისრაელის ძეთ, ხიველების, გაბაონის მკვიდრთა გარდა: ყველა ბრძოლით აიღეს.

²⁰რადგან უფლისგან იყო, გული რომ გაისასტიკეს, და ბრძოლით ხვდებოდნენ ისრაელს, იმისათვის, რომ მისცემოდნენ დარისხებას, და არ ჰქონოდათ შეწყალება, არამედ ისე მომსპარიყვნენ, როგორც უბრძანა მას მოსემ.

²¹და მოვიდა იესო იმ დროს და ამოწყვიტა ყენაკელნი მთიდან, ხებრონიდან, დებირიდან, ყანაბიდან და იუდასა და ისრაელის მთელი მთიდან. მათი ქალაქებიანად დაარისხა ისინი იესომ.

²²არავინ დარჩენილა ყენაკელთაგან ისრაელის ძეთა ქვეყანაში. მხოლოდ ღაზაში, გათში და აშდოდში დარჩნენ ისინი.

²³და დაიპყრო იესომ მთელი ქვეყანა, როგორც უთხრა უფალმა მოსეს, და მისცა იგი იესომ ისრაელს სამკვიდროდ, მათი ტომების მიხედვით. და ქვეყანამ მოისვენა ომისაგან.